1 SAMUEL 21 - AMÜSA BAIBEL (BSI)

Saul tenü David Rang Tsicho

¹ David-nü Nob la bebüba Ahimelek yang wücho. Ahimelek-nü dhridhrinü chüro abi mütohcho ko tsingdhingcho, “Tuepü hila nü müleng tsatsa rocho?”

² David-nü lalingcho, “Ih hila yangthsaba nguchi nengdang rocho. Abinü Ih hila rosohba nguchi hi sütesü müyonung yoko. I nyitsarü telü müdüm khüdula ro Ih shirütanung yoko.

³ Hütsüeko ade, nüh tu liro? I khyang hümdhse münga khülo mahkhang nüh tu liro hütsü jüng.”

⁴ Bebübanü yocho, “Ih Amüsa hümdhse chah khu apa hümdhse mühle; nü nyitsarüti du tsü chünyang shomang khingkurü te mümükhongpü likhang, hütsü tsung.”

⁵ David-nü lalingcho, “Arühnü mümükhong. I nyitsarütinü ihrü nguchi apa nengdang büchehde mii mamoh yohpüre; khang khüsha hiroh-i pathsa nguchi nengdang wüde khüta alaa mümamohnung.”

⁶ Hütsünü bebübanü David khyang hümdhse tsü jücho, tunüo Tsingrangba khyang mübücho asinü mülihba hümdhse ahi du tsü abi kheh la licho.

⁷ (Hütsü nyümong Edom lanü Saul misü nyahrü ayingba Doeg tsü hütsüla li detingcho, tunüo abi yangthsa yah khürü nguchinung rocho.)

⁸ David-nü Ahimelek te yocho, “I khyang jünung thsuh ko noh mülio? Yangthsaba yuzengnü Ih khura dhsüdhsasohchonü I thsunohrü mii mükhyüpahpü rochoe.”

⁹ Abimelek-nü lalingcho, “Nühnü Elah Ngah Filistinba Goliath kyüsehba nohshengsü lile; hütsü shü la yühtipü bebürü jengki khanglang tsü lile. Khyünyükhang hütsü khyüng, alichonü hütsü due.” David-nü yocho, “hütsü I khyang jüng, hütsü tenü atsau khüdesü mühle.”

¹⁰ Hütsüpü David-nü Saul tenü rang Gath la yangthsaba Akish yang wücho.

¹¹ Yangthsaba pohki adirünü Akish te yocho, “Hi apu lih la yangthsaba David sü mahrü do? Khingkurütinü nyiichi khi thsade, ‘Saul-nü hajar kyüsehko, ta David-nü hajar dhüre kyüsehko’ pü thsaba tsü hivi nengdang lile.”

¹² Yu hiri David lasih la dee tahrangcho ko abinü yangthsaba Akish alaa drücho.

¹³ Hütsünü arüh bete David-nü abi saying mülihchicho ko mükyangrü kyo ngusohcho; ko tbükhüm yingte thrahnah ko abe nbüh chah müjü shee püm ngusohcho.

¹⁴ Hütsüde Akish-nü abi pohki adirüti te yocho, “Dhing, hivi hi amükyangrüe. Tuepü Ih yang abi norocho?

¹⁵ Amükyangrü kükyo lile. Tuepü Ih wahsohnung hila Ipu kuh la apa norocho?”