1 SAMUEL 20 - AMÜSA BAIBEL (BSI)

Jonathan-nü David Trocho

¹ Hütsüde David-nü Rama lang Naioth lanü Jonathan yanglang wücho. Abinü abi te tsingdhingcho, “Ihnü tu nguchicho? Ihnü tu thsamehcho? Ih kyüsehnungthsa Ihnü nüu te tu amüthsalang nguchicho?”

² Jonathan-nü lalingcho, “Nüh müsünung, Tsingrangba-nü yatieng! Uwa-nü khiyu aikyah ko amülah Ite yore, ko abinü hisü Ite rang müyohpünung!”

³ Ta David-nü lalingcho, “Nühnü Ih khütoi müphahro hütsü nüunü khütang müdhele, ko abinü tu chungro hütsü nüte müyonung, tunüo hütsünü nüh lerohpehnung. Ihnü akang liba Abüdongba nengla yore, Ih sünung khitahko!”

⁴ Jonathan-nü yocho, “Nühnü tu yonang hütsü Ihnü nguchinung.”

⁵ David-nü yocho, “Atu choo asi thsüti lile, ko Ih yangthsaba yola tsuyongnung lile. Ta nühnü hi tsalekhang, Ih wü rangmü la tsü zihtu anyüzehlang chii rangnung.

⁶ Ko Ih mülicho nüunü müdhekhang, kang khüdula kukhi apüm nengdang kangmübü jünung Bethlehem lang dhsüdhsa wüko, mülang pehjüng pü abi te yojüng.

⁷ Abinü, ‘tumüthsa khang’ Ih khümchoko; ta abi zichürokhang, abinü Ih dhsakehjünungepü nühnü müdheing.

⁸ Yanglilüm I khyang hi nguchijüng ko nühnü Ite nyengchocho amüsa hi yohpüng. Ta Ih mülangkhang, nüpunü Ih kyüsehng. Tuepü Ih nüu yanglang kyüsehsohnung wünung?”

⁹ Jonathan-nü lalingcho, “Hütsü chilü tülüm! Uwa-nü nüh dhsakehjünung dhrongchehcho müdhelang, Ihnü nüte müyonung ang?”

¹⁰ Hütsüde David-nü yocho, “Nüunü nüte zichüro lalingnye hütsü sünü Ite yonung?”

¹¹ Jonathan-nü yocho, “Ihjünü rangmülang wünung.” Achotsü anyünü wücho,

¹² ko Jonathan-nü David te yocho, “Ihjü kahla Abüdongba Israel Tsingrang yuzithsaang. Atu ko zihtu hitade, Ihnü uwa te tsingdhingnung. Abinü nü nengdang tsa lümkhang; Ihnü yu jünung.

¹³ Abinü nüh dhsakehjünung lümkhang; ko hütsü Ihnü nüte müyokhang ko nüh mükhümchokhang, Ih süsohng. Abüdongba uwa te zehcho kyo nütesü zeh lieng.

¹⁴ Ko Ih akang likhang, nüh amüsa anyengchotaba Ite yohpüng ko Ite yuje cho lieng; ta Ih sükhang,

¹⁵ I kukhi te hütsüta lede yuje cho lieng. Ko Abüdongba-nü nü rorüh apüm changsohde,

¹⁶ Ihjü kahla azengtacho hi tüthsangnyang. Hi thsangnyangkhang, Abüdongba-nü nüh khingchinung.”

¹⁷ Anyüpiusü Jonathan-nü David khyang abi müinungepü nyengchosohcho, tunüo Jonathan-nü apu müicho roh-i David müicho.

¹⁸ Hütsüpü Jonathan-nü abi te yocho, “Atu tsü Chonu Asi Thsütieko, tsuyongchah nüh mülicho tsü müdhenung.

¹⁹ Zihtu tsü nüh mülicho alaa müdhenung, hütsüeko nüh akhudi rangbalang tsü wüng ko lungsüh khanglang tsü rangpüm.

²⁰ Hütsüpü Ihnü hütsü chah kyarü roh-i tbüdeng asang kyanung.

²¹ Hütsüpü Ihnü I kulirü te wü hütsüri throbülungnung yonung. Ko Ihnü abi te, ‘Dhing, tbüdeng tsü nüh ko hilangthring lile, throrung pü yokhang, nüh khümcho lile, chürung. Ihnü akang liba Abüdongba nengla yore, nüh tumüthsanung.

²² Ta Ihnü abi te, tbüdeng tsü nüh khu wüpü lilepü yokhang’ tsimüing, tunüo Abüdongba-nü nüh tsisohre.

²³ Ihjü zengtaba hilü lede nengdang yohpünungepü Abüdongba-nü müdhele.”

²⁴ Achotsü David-nü rangmü la tsü rangcho. Chonu Asi Thsütila tsü, yangthsaba Saul yangtsulang tsü rocho,

²⁵ ko lede abi pümjila züdi müshüm pümcho. Abi müshüm Abner pümcho ko abi te Jonathan pümcho.

²⁶ David pümji tsü adeng licho; ta hütsü nyümong Saul-nü tu müyocho, tunüo abinü lümcho, “Lango tikehpü abi ayahnü mümüsa lile.”

²⁷ Nyümong khüu tsü, Chonu Asi Thsüti khanglang, adesü David pümji tsü adeng ngucho ko Saul-nü Jonathan te tsingdhingcho, “Tuepü atü ko chünyesü David yangtsulang müroro?”

²⁸ Jonathan-nü lalingcho, “Abi Bethlehem lang wünung Ite kihchicho.

²⁹ Abinü yocho, ‘Yanglilüm Ih wüsohng, tunüo hütsüla ihrü tsutpurü kangmübü thsüti khyüre ko I mungrü hütsüla ronung yoko. Hütsüeko Ih nü shangrü thsakhang, Ih wü ihrü tsutpurü shirüsohng.’ Hütsü khu abi ade abi pümjila mühle.”

³⁰ Saul-nü arihlongchüro Jonathan te yocho, “Nüh matsuza! Ade nüpu ko nütpa ashah khyünung nühnü David khümchorepü Ihnü müdhele.

³¹ David akang lide hiba lih la khodesü nüh yangthsaba mükangnungepü nühnü mümüdhe ang? Ade wüng ko abi hila norung, abi süsohnung.”

³² Jonathan-nü lalingcho, “Abi tu ngang sünung? Abinü tu nguchicho?”

³³ Hütsüta yode, Saul-nü abi kyüsehnung Jonathan chah abi thsuh müthehcho, ko hütsüde yuje aunü David kyüsehnung dhrongchehko pü Jonathan-nü müdhecho.

³⁴ Jonathan-nü tsingthsang chah tsünü arihlong chüro shemüsucho ko hütsü Chonu Asi Thsüti anyüu nyümong tsü tu mütsucho. Abinü David nengdang khütang mükünyangcho, tunüo Saul-nü abi mükhimüngucho.

³⁵ Nyangnyü khüu, azengtacho kyo, Jonathan-nü David shirünung rangmülang tsü wücho.

³⁶ Abi yola azarü khüdu nücho ko abi te yocho, “Ihnü tbüdeng tsü kyanungnong wünü yangching.” Azaba tsünü shangcho ko Jonathan-nü abi khu tbüdeng tsü kyamüthehcho.

³⁷ Khode azaba tsünü tbüdeng longba müdüm tsü chihcho, Jonathan-nü abi te züde yocho, “Tbüdeng tsü nüh khu wüpü lile.

³⁸ Hütsüta tüya! Zahding!” Azaba tsünü hütsü tu adüzünang mümüdhepü, tbüdeng tsü thro hiro abi abüdongba khyang jücho;

³⁹ Jonathan e David nyühnü du hütsü müdhecho.

⁴⁰ Jonathan-nü azaba khyang abi thsunohrü jücho ko yanglang hiwülungsohcho.

⁴¹ Azaba tsü tsisohpü khanglang, David lungsüh khanglang tsünü bücheh chürocho ko alih la amükhoh thungpü asangpili mükhukehcho. Anyüh shirüta be müthsüptanü Jonathan anyüding tracho; David tsü Jonathan tenü alongriu thsacho.

⁴² Hütsüpü Jonathan-nü David te yocho, “Tsingrangba nüte zeh lieng. Ihjü anyengchotaba Amüsa tsü lede nengdang nüh ko Ih, ko nü shümtsurü ko I shümtsurü kahla Abüdongba-nü lisohng.” Hütsüpü David tsicho ko Janathan yangdi lang thalicho.