1 SAMUEL 2 - AMÜSA BAIBEL (BSI)

Hanna Dangkhidangnang

¹ Hanna-nü dangkhidangnangcho: “Abüdongba-nü I lasih akünyangnü jengjüko; Ih khütoi künyangro Abi nguchi khu! Ihnü I rorüh münyodhingre; Ih khüta künyangro tunüo Tsingrangba-nü Ih troko.”

² “Süsü Abüdongba kyo Amüsa mühle; Abi kyo süsü mühle, atsungtirü Ihsa Tsingrang kyo süsü mühle.

³ Nü tüzümükhüm zahng; nü müthseh yu nyehlieng. Tunüo Abüdongba tsü müdheba Tsingrang ko Abinü müyurünü nguchicho apüm yukhare.

⁴ Athrungrü singthsalu thsangnyangko, ta remüzeh tsü rezeh zire.

⁵ Khüdupi tsa lirüsü ade arüh jangjang shehshere, ta kong lirü müyangpehko. Azarü müthsaba nitpünü tsuzarü dhünyeh nümüsuko, ta tsuzarü adrong thsarü atpa te khüdusü nying mühle.

⁶ Abüdongba-nü kyüsehre ko akang jüre; Abinü arüh asülih yang müthehre ko thali norore.

⁷ Abinü khürü ailümrü ko khürü alirü kangsohre: khürü sümsohre ko khürü disohsre.

⁸ Abinü ailümrü asongsong lanü dhimüsure ko achongcharü arüh chongcha suro lanü khamüsure. Abinü arüh yangthsarü tsudhre te müjangsohre, arüh ahechi jingdrang la yohpüre. Alimih pümji Abüdongba yo; hütsü michah Abinü limih külüpcho.”

⁹ “Abinü yuje chorü tsungtire, ta amütsarü amala chahpehre; nyitsarünü apu tasenü mükohre.

¹⁰ Abüdongba rorüh changjünung; Abinü ninglangnü arüh michah mütinung. Abüdongba-nü lihküp yu khanung; Abinü Abi Yangthsaba khyang zii jünung, Abinü throchehba Yangthsaba tsü akohrü kangsohnung.”

¹¹ Hütsüpü Elkana-nü Rama yang kulang thalicho, ta azaba Samuel tsü Shiloh la licho ko bebürü Eli pohki Abüdongba dikehcho.

Eli Tsurüti

¹² Eli tsurüti tsü amükhyu thsacho.

¹³ Arühnü Abüdongba mükhichicho mahkhang bebürünü müyurü chahnü khyünyüba yuzeng nengdang mükhichi licho. Hütsü du mah, khode nyüh khüdunü kangmübü jonang, bebüba tsurütinü athrohchehsing bipü rocho.

¹⁴ Shuh tsü chongyade, abinü füh la tsü athrohchehsing tsünü thrarangcho ko tu mütsacheh chürocho hütsü bebürü nohlüm khyücho. Shiloh lang rorüh Israelrü atümung te hütsüta bichicho.

¹⁵ Adesü asu tsü khyücheh mütrüp denü arühnü ro kangmübü jüba te tsü yonung, “Bebüba khyang ruhjünung shuh khürü khülo; shuh ashüh malü abinü achongcholü mükhyüchonung.”

¹⁶ Nyitsarüba tsünü lalingcho, “Ihsanü ayah roh-i akhudi asu tsü trüpnung, hütsüpü du nühnü tu khyünyüro hütsü khyüng” pü yokhang, bebüba tsurü tsünü, “Imoh, ade jüng. Nühnü müjükhang, I jangjang khyünung” pü yocho.

¹⁷ Eli tsurü münyi tsü Abüdongba lahpi khura mütsacho, tunüo arühnü Abüdongba khyang amübü tsü hütsüta jengreng müjo bichicho.

Shiloh la Samuel

¹⁸ Hütsüde azaba Samuel tsü bebürü jengki shünana khyüpü Abüdongba dikeh licho.

¹⁹ Kang mükhu atpanü abükyü anii yola kangmübü jünung rode, fükhüm azikyah khüdu xü hirojücho.

²⁰ Hütsüde Eli-nü Elkana ko anitpü nyüh müwajü Elkana te yocho, “Nühnü khakhuchüjüba azarü hi mülih, Abüdongba-nü nü khyang hiba khingkutpü khu azarü apa müwajüng.” Hütsüpü arühnü kulang thali tsicho.

²¹ Abüdongba-nü Hanna müwajücho ko adhrerü asang ko khingkurü anyüh licho. Azaba Samuel Abüdongba dikeh licho.

Eli ko Atsurüti

²² Adelü Eli tsü dee shi kangcho. Atsurütinü Israelrü te nguchicho lüpcho abinü yuchi licho ko arühnü Abüdongba Shükuh trahtri la nguchirü khingkurü te mii yüprepü yuchicho.

²³ Achotsü abinü arüh te yocho, “Tuepü nührünü nguchi hiri nguchiro? Nührünü nguchi amütsa nguchicho lüpcho bürünü Ite yoko.

²⁴ Hütsü zahng, I tsurüti. Abüdongba müyurünü chochiba hilü adrünung nguchi lile.

²⁵ Nyüh khüdunü aparü khüdu nyüm amünyi shitpahkhang, Tsingrangba-nü abi khümnung kohle; ta Abüdongba nyüm amünyi shitpahcholü sünü khümnung?” Ta arühnü au yu tsü mühnyicho, tunüo Abüdongba-nü arüh süsohnung dhrongchehpehko.

²⁶ Azaba Samuel tsü zicho ko nyitsarü ko Tsingrangba chahnü yanglih ngucho.

Eli Kukhi Nyüm Choyohcho

²⁷ Abüdongba chahnü azikehrü khüdu yusi hita hipü Eli yang rocho: “Nührü jümürü Aron ko abi kukhi Ijip la Yangthsaba yurüthsa lide, Ihnü Ipu jangjang Aron te mishacho.

²⁸ Ihnü Israelrü hung apüm lanü I bebürü thsanung, bholu chah dikehnung, müchiji tahnung ko Ite kihtanung bebü jengki khümnung abi tsutpu throchehcho. Ko bholu chah kangmübü trüpchola nohlüm khüdu ngunung Ihnü mülacho.

²⁹ Khang, tuepü Ihnü I müyurü chahnü chingcho kangmübü ko amübüla mii nührünü müxühmünguro? Eli! Tuepü nühnü nü tsurü khyang I müyurünü I khyang kangmübü jücho lanü atsauba khyücheh tsu hitoi tsukehsoh ko I tenü arüh alaa dhichi bichiro?

³⁰ Ih, Abüdongba Israel Tsingrang, nührü tsutpu ko nü kukhinü shang apüm la I bebürü thsasohnung atsichola Ihnü nyengchoko. Ta adelü hütsü Ihnü müyohpünung. Hütsü mülih, I dhichirü Ihnü dhichinung ko I mükhimüngurü Ihnü mülangjü bichinung.

³¹ Nyieng, nührü hung lanü adhrerü süsü shinü mülinungthsa Ihnü nührü hung ko tsutpula dhrezarü atümung kyüsehnung bekhyah khüdu role.

³² Nührü chongchanung ko Ihnü aparü Israelrü khyang jünung amüwati chah nührünü nahmoh dhingnung; ta nührü kukhi lanülü süsü shizi mülinung.

³³ Ta, Ihnü nü trah lanü nyüh khüdu nyingjünung ko abinü I bebürü kang dikehnung. Ta abi nahtohnung ko ahungti mülipehnung ko nührü trah apüm shühkhatoh sünung.

³⁴ Nü tsu nyüh Hofni ko Finehas nyümong khüdunü sünung, hütsü khu Ihnü yocho apüm tikehnungepü ngusohre.

³⁵ Ite yuje cho ko Ihnü khyünyücho roh-i dikehnungthsa Ihnü bebürü khüdu throchehnung. Ihnü throchehcho yangthsaba te lede dikehnungthsa, Ihnü abi chahnü majüh trahchosohnung.

³⁶ Nührü trah lanü khürü nyingkhang, arühnü wü hütsüba bebüba te thsi ko tsuyongnung chingnung ko lango dusü tüpsohnung nengdang bebürü tronung mülajüng pü kihchinung.”