1 SAMUEL 19 - AMÜSA BAIBEL (BSI)

Saul-nü David Dhsümthsecho

¹ Saul-nü atsurü Jonathan ko abi pohki adirüti te abinü David kyüsehnung lümchung lilepü yocho. Ta Jonathan-nü David dee müphahcho,

² hütsünü abinü abi te yocho, “Uwa-nü nüh kyüsehnung müküple. Atunyang dee kukeng; khüdenang rangpüm.

³ Ihnü wünung ko nüh rangpümba müdümla tsü uwa te yanung ko Ihnü abi te nü nengdang chotanung. Ihnü rangchehkhang, nüte yonung.”

⁴ Jonathan-nü Saul te David se yocho, “Adirü, nü dikehrü David chah amüthsalang tu tünguchi; abinü nüte tu müthsameh; hütsümahpü abinü nguchicho apüm tsü nü nengdang atsa du nguchiko.

⁵ Abinü Goliath kyüsehnung abi akang jücho ko Abüdongba-nü Israel nengdang akoh amülah jücho. Nühnü hütsü khu künyangcho. Khang tuepü nühnü achomükeh hütsü chah amüthsalang nguchinyüro ko tu yuzi mülipü David kyüsehnyüro?”

⁶ Jonathan-nü yoba tsünü abi chah thahpücho ko abinü David mükyüsehnung Abüdongba nengla yuchümcho.

⁷ Hütsüpü Jonathan-nü David dsinü hütsü apüm abi te yocho; hütsünü abinü abi Saul yanglang nowücho ko akhulang kyo David-nü yangthsaba dikehcho.

⁸ Adesü Filistinrü te chita chürocho. David-nü arüh mahcho ko sehchi kohchehde arüh drü tsishocho.

⁹ Nyümong khüdu Abüdongba amünyi nbünü Saul rangcho. Abi kuh la thsuh bipü pümcho ko David abi tbenglah tii pümyacho.

¹⁰ Saul-nü David tsü züdi chah chiikeh chinyücho, ta David-nü tsohmünyahcho ko thsuh tsü züdi chah chirangcho. Ko David hütsülanü tsicheh tsicho.

¹¹ Hütsü romang tsü Saul-nü nyitsarü khürü David kuh jümnung ko nyangnyü khüu tsü abi kyüsehnung müthehcho. David te anitpü Mikal-nü yocho, “Shomülangnü nüh rang mütsikhang, atunyanglü nüh sünung.”

¹² Abükyünü nyübongkhi lanü abi rang bücheh tsisohcho.

¹³ Hütsüpü abükyünü kuh tsingrang kyothri hiro chongnong chah yohpücho, ko athahlang tsü miza nbühnü külüpcho thahkhangsing yohcho ko shü khüdunü hütsü phatipücho.

¹⁴ Khode Saul-nü müthehrüti David yangchi rocho, abi füdhsa lilepü Mikal-nü yocho.

¹⁵ Ta Saul-nü thali wü arühbürünü dhingnung yocho. Abinü yuzengjo yocho, “Abi I yanglang chongnonglanü dhi hirung ko Ihnü abi kyüsehnung.”

¹⁶ Arühnü kuyonglang tsü züducho ko chongnong chah tsü kuh tsingrang kyothri ko athahlangthring miza nbühnü külüpcho thahkhangsing ngucho.

¹⁷ Saul-nü Mikal te yocho, “Tuepü nühnü Ih hita kihyochü I rorüh tsicheh tsisohcho?” Abükyünü lalingcho, “Ihnü abi mütrokhang, abinü Ih kyüsehnungepü yocho.”

¹⁸ David-nü tsicheh Rama lang Samuel yanglang wücho ko Saul-nü abi chah nguchicho apüm abi te yocho. Hütsüpü abi ko Samuel nyüh Naioth lang wü hütsüla licho.

¹⁹ David tsü Rama lang Naioth la lilepü Saul te yocho.

²⁰ Achotsü abinü abi rangnung khürü müthehcho. Arühnü Samuel-nü nüpü azikehrü mülung khüdu khithsa, nyiichi ngucho. Hütsüde Saul-nü müthehbarüsü Tsingrangba anbünü rangcho ko arühsü khithsa nyiichinung dikehcho.

²¹ Khode Saul-nü hütsü yuchicho, abinü yuhirü alaa müthehcho ko arühsü khithsa nyiichimüsucho. Asangpiusü abinü yuhirü müthehcho ko arüh chahsü akyokyo tsü tikehcho.

²² Achotsü Rama lang tsü apu shemüsucho. Abi Seku kihkong arangcheh tsü chii rocho ko abinü Samuel e David nyüh khüde liro pü tsingdhingde, arüh Naioth la lilepü yocho.

²³ Abi hütsülang wüde, Tsingrangba anbünü abisü rangcho ko Naioth lang ayung khithsa nyiichi wücho.

²⁴ Abinü abi jengki khohchehpü Samuel bete khithsa ko nyiichicho ko hütsü nyümong ko romang tbhüdeng pümcho. (Hütsüta choyoh hi tikehcho, “Saul mii azikehrü kangcho mah-o?”)