1 SAMUEL 17 - AMÜSA BAIBEL (BSI)

Goliath-nü Israelrü Khyangchicho

¹ Filistinrünü chitanung Juda yangdi khüdu Soko la shibülungcho; arühnü Soko e Azeka nyüh kahla müdüm khüdu Efes Damim la müdongcho.

² Saul ko Israelrüsü Filistinrü te chitanung Elah ngah la shimükhong rungnüm licho.

³ Filistinrü akhang khüdu chah ko akhang akhüu chah Israelrü, arüh kahla angah khüdu zehpü licho.

⁴ Gath yangdi lanü nyüh khüdu anengnü Goliath Filistinrü yolanü chüro Israelrü khyangchicho.

⁵ Abi athsenglang khehap dhürohpü kyaa-oshi, ko imüyeng rothsa jengki süreh dhünyangpü dhünyeh amüling ko imüyeng kuthri thricho.

⁶ Abi jing imüyengnü khümticho ko imüyeng tbüza khakehcho.

⁷ Abi thsuh tsü kihdüm roh-i, thsuhmüle tsü amülinglang süreh dhünyeh thsacho. Ko rothsarü khüdu abi tsung bipü abekhu wücho.

⁸ Goliath-nü shemüsu Israelrü chah züdekehjücho, “Nührü chitanung hütsüla tu chung yaro? Ih Filistinrü, nührü Saul yurü! Ite chitanung nührü yolanü nyüh khüdu throchehng.

⁹ Abinü Ih kyüsehkhang, ihrü nührü yurü kangnung; ta Ihnü abi kyüsehkhang, nührü ihrü yurü kangnung.

¹⁰ Ade hila Ihnü Israelrü rothsarü khyangchire. Ite chitanung nyüh khüdu throcheh müthehng.”

¹¹ Saul ko abi nyitsarütinü hi yuchide, arüh drümüyangcho.

David Saul Müdongchah

¹² David tsü Juda la Bethlehem lanü Efrathrü anengnü Jesse tsurü licho. Jesse atsurü keh licho ko Saul yangthsaba bekhyah tsü abilü dee shipü licho.

¹³ Atsurü azibarü asang Saul yola chitanung wüpü licho. Aziba Eliab, anyüuba Abinadab ko asanguba Shama licho.

¹⁴ David tsü achangba thsacho ko amung azibarü asang Saul yola liyade,

¹⁵ au san nyahnung bekhyah-bekhyahla David tsü Bethlehem lang wücho.

¹⁶ Goliath-nü nyümong yüre nyangnyü mükhu ko romang mükhu Israelrü khyangchicho.

¹⁷ Nyümong khüdu Jesse-nü David te yocho, “Aruhcho tsang süreh dhüre hipü nü mungrü yanglang arüh lichah tsü dhsüdhsa wüng.

¹⁸ Ko nyikihmülung dhüre hi rothsarü anüchiba khyang hijüng. Nü mungrü khüta lirünang shirüng ko arüh tsa licho ko nühnü arüh shirücho müdhenung lango hirung.

¹⁹ Yangthsaba Saul, nü mungrüti ko Israelrü apüm Elah Ngah la Filistinrü te chitala lile.”

²⁰ David-nü nyangnyü khüu mütoh surocho ko san xükümnung khürü khyang pehjüpü Jesse-nü yocho kyo tsuyongba hijüpü wücho. Abi wü arüh müdongchah tsü chihde, Israelrü tsü chitalang rose shemüsuyacho.

²¹ Filistinrü ko Israelrü tsü chitanung be pitapü yacho.

²² David-nü tsang tsü anyokhurü khüdu kheh la pehjüpü, rothsa ngahlang tsü shang wünü amungrüti shirücho.

²³ Abinü arüh te chotayade, Goliath-nü lede roh-i bekhu chüro Israelrü khyangchicho. Ko hütsü David-nü yuchicho.

²⁴ Ko Israelrünü Goliath ngude, arühnü drü tsipehcho.

²⁵ Arüh-e arührü chota yocho, “Abi tsü dhing, abinü khyangchiba tsü nyidhing. Sünü hütsüvi kyüsehnang jiyü arangcheh jünung yangthsaba Saul-nü nyengchoko; Yangthsabanü atsulatpü jünung ko arüh tsutpu te alih müthsüh müchingnung nyengchoko.”

²⁶ David-nü abi shündhün yarü te tsingdhingcho, “Sünü Filistinba hi kyüsehnang ko hiba ashahkhyü lanü Israelrü nüchehnang, abi khyang tu jünung? Ko müyudsirü Filistinrü hinü akang liba Tsingrang rothsarü khüta sehchinung?”

²⁷ Arühnü abi te sünü Goliath kyüsehnang anyengchocho tsü yocho.

²⁸ David amung aziba Eliab-nü David-nü hütsüta chota yaba tsü yuchicho. Abinü David te zichüro yocho, “Nüh hila tu nguchiro? Ko rangmü la san tsü sünü nyahro? Ihnü nü rah tsü müdhele. Nüh chitacho dhingnung jüroko.”

²⁹ David-nü yocho, “Ade Ihnü tu nguchicho? Ihlü tusü mütsingdhingnung do?”

³⁰ Abinü ximüla aparü khüdu tesü tsingdhingcho, ko abinü tsingdhing müipi abi te akyokyo du tsü lalingcho.

³¹ Khürünü hütsü yuchi Saul te yocho ko Saul-nü abi dsinung müthehcho.

³² David-nü Saul te yocho, “Nüh Adibong, hiba Filistinba nengdang süsü drü tüli! Ihnü wü abi te chitanung.”

³³ Saul-nü yocho, “Nüh müwünung! Nühnü khüta abi te chitanung? Nüh azarü khüdu du, ko abilü azadenü chita rocho nyitsarü khüdu lile!”

³⁴ David-nü yocho, “Nüh Adibong, Ih Iu san nyahre. Khodederü kihkhünyingnü mahkhang shühmünü san shotsinang,

³⁵ Ihnü hütsü iiwüre, khatare ko san tsü khümchore. Ko kihkhünying mahkhang shühmü tsünü I chah mükahnung rokhang, Ihnü ahong tsünü rang müpsehre.

³⁶ Ihnü hütsüta kihkhünying ko shühmü müpsehko, ko Ihnü akang liba Tsingrang rothsarü sehchiba müyudsirü Filistinba chah tsü hütsüta nguchinung.

³⁷ Abüdongba-nü kihkhünying ko shühmü chahnü Ih khümchoko; abinü hivi Filistinba chahnüsü Ih khümchonung.” Saul-nü yocho, “Khang wüng ko Abüdongba nüte lieng.”

³⁸ Abinü apu khata jengki David khyang khümsohnung jücho: imüyeng kuthri khüdu athah la thrisohcho ko khata fükhüm khüdu afüla khümsohcho.

³⁹ David-nü Saul nohsheng yohpü tsehdhingcho, ta mütsacho, tunüo abinü hütsütari mükhyodhing. Abinü Saul te yocho, “Hiri khyüpü Ihnü müchitachehnung. Nana müthsa.” Achotsü abinü hütsü phungchehpehcho.

⁴⁰ Abinü san-nyahrü ja tsü thromüsucho ko kih lanü lung zangzang münga throrocho ko ashibha la yohcho. Abinü kyalu rungnüm bipü Goliath te dhsükehtanung wücho.

David-nü Goliath Kohcho

⁴¹ Filistinba tsünü David yang abi tsung biba tsü akhusohpü rocho,

⁴² ko abinü David shündhün ro abi ngude, abinü abi müthsamünyücho, tunüo azarü aikyah khüdu du thsacho.

⁴³ Abinü David te yocho, “Ja hütsü tu thsanung? Ih füza mah-o?” Ko abinü abi tsingrang dangchi David chokehcholacho.

⁴⁴ Abinü David khyangchi yocho, “Rung! Ihnü nü shuh tsü uza ko kanglungrü khyang tüpnung.”

⁴⁵ David-nü lalingcho, “Nühnü Ih nyüm nohsheng, thsuh ko tbüza bipü rore, ta Ihlü nüh nyüm nühnü nyüpmüsehba akang liba Israel Tsingrang nengla rore.

⁴⁶ Chünye Abüdongba-nü nüh I kheh la jünung; Ihnü nüh kohnung ko nü ku dengnung. Ko Ihnü Filistinrü rothsarü shuh tsü uzati ko kanglungrü khyang tüpnung. Hütsüde limihnü Israel Tsingrang licho müdhenung,

⁴⁷ ko hila lirü atümungnü Abüdongba-nü apu müyurü khümchonung thsunohrü müdhsütah pü müdhenung. Abi tsü chitala akohbong, ko Abinü nührü apüm ihrü kheh la jünung.”

⁴⁸ Goliath-nü anyüpiu David yang tsehwücho ko David-nü zahnü abi te khatanung Filistinba lahpi wücho.

⁴⁹ Abinü ashibha la akheh mayohchünü lung khüdu khyüchehcho ko hütsünü Goliath chah kyacho. Hütsünü akikhangla kyacho ko athahrü kyarüpcho ko Goliath alih la thsütsucho.

⁵⁰ Hütsüta, nohshengnü mahpü David-nü kyalu ko lung khüdunü Goliath kyasehnü kohcho.

⁵¹ Abinü abi yang shangwücho, apu nohtrüp lanü anohsheng tohchehcho, ko aku dengnü kyüsehcho. Ko Filistinrünü arüh akurahbong khülucho ngude, arühnü ximüla drü tsicho.

⁵² Hütsüde Israelrü ko Judarünü Gath ko Ekron tbükhüm chii arüh iijowücho. Filistinrü tsü Gath ko Ekron chii lang ayung Sharaim lang wüba lang lerohpeh jocho.

⁵³ Israelrünü Filistinrü iiwüpü thalide, arühnü arüh lichah kohro zang khyücho.

⁵⁴ David-nü Goliath thah khyo Jerusalem lang hirocho, ta Goliath thsunohrülü abi Shükuh la yohpücho.

Saul Khyang David Jücho

⁵⁵ Khode Saul-nü David tsü Goliath te chitanung wüchi ngucho, abinü abi rothsarü anüchiba Abner te tsingdhingcho, “Abner, hi sü tsurüo?” Abner-nü yocho, “Nüh Adibong! Ihnü mümüdhe.”

⁵⁶ Saul-nü yocho, “Khang wüng ko tsingdhing.”

⁵⁷ Achotsü khode David tsü Goliath kyüsehpü thalicho; Abner-nü abi Saul yanglang nowücho. Hütsüde tsü David-nü Goliath thah biyacho.

⁵⁸ Saul-nü abi te tsingdhingcho, “Dhrezaba, nüh sü tsurüo?” David-nü yocho, “Bethlehem la nü dikehrü Jesse tsurü lile.”