1 SAMUEL 16 - AMÜSA BAIBEL (BSI)

David Yangthsaba Kangsohcho

¹ Abüdongba-nü Samuel te yocho, “Khütoi nyahli Saul nengdang longrinung? Ihnü abi Israel yangthsaba thsanung dhsongliko. Ta ade olive tuji bieng ko Bethlehem lang, nyitsarü khüdu anengnü Jesse yang wüng, tunüo abi tsurü yolanü nyüh khüdu yangthsaba thsanung Ihnü throchehko.”

² Samuel-nü tsingdhingcho, “Ihnü hütsü khüta nguchinung? Hütsü Saul-nü yuchikhang, abinü Ih kyüsehnung!” Abüdongba-nü lalingcho, “Misüza khüdu nüng ko hütsüla Abüdongba khyang kangmübü jünungbaepü young.

³ Kangmübü jübala tsü Jesse dsiyohng, ko Ihnü nüte tu nguchinung hütsü yonung. Ihnü sü thongunang nühnü abi tsü yangthsaba kang müyühjüng.”

⁴ Samuel-nü Abüdongba-nü abi te yocho roh-i nguchicho ko Bethlehem lang wücho; hütsüla yangdi zirüti drüseh ro abi te tsingdhingcho, “Amongrü! Hi yangtsa yusi mah-o?”

⁵ Abinü lalingcho, “Ho, Ih Abüdongba khyang kangmübü mübünung rocho. Nührü müsachehng ko I yola rung.” Abinü Jesse ko atsurütisü müsachehnung yocho ko abinü arühsü kangmübü jücho la tsü dsiyohcho.

⁶ Khode arüh ro chihcho, Samuel-nü Jesse tsurü Eliab ngu alüm la lümcho, “Abüdongba bete hila yaba nyitsarü hi abinü throchehba tsü thsae.”

⁷ Ta Abüdongba-nü abi te yocho, “Abi khütoi thseng ko pümtrung tsanye pehjüng. Ihnü abi müthro, tunüo Ihnü nyitsarü kyo yu mükhare. Nyitsarünü amichah dhingre, ta Ihnü lasih du dhingre.”

⁸ Hütsüpü Jesse-nü atsurü Abinadab dsi Samuel yanglang norocho. Ta Samuel-nü yocho, “Mah, Abüdongba-nü abisü müthro.

⁹ Achotsü Jesse-nü Shama norocho, Samuel-nü yocho. Abüdongba-nü abisü müthro.”

¹⁰ Hütsüta Jesse-nü atsurü dhünyeh Samuel yanglang norocho. Ko Samuel-nü abi te yocho, “Mah, Abüdongba-nü hiri süsü müthro.”

¹¹ Hütsüta abinü abi te tsingdhingcho, “Adesü nü tsurü apa mülio?” Jesse-nü lalingcho, “Adesü achangba lile, ta abi rangmülang san nyah lile.” Samuel-nü yocho, “Abi hila dsirung. Abi mürode Ihsanü kangmübü müjünung.”

¹² Achotsü Jesse-nü abi dsinung mütheh norocho. Abi pümtrung atsa, nyükheh atsa ko abi nah ariri dhrezarü khüdu thsacho. Abüdongba-nü Samuel te yocho, “Hivie, müyühjü throchehng.”

¹³ Samuel-nü olive tuji khyo amungrüti betenü müyühjü throchehcho. Hütsüde tsünü Abüdongba nbü abi chah rocho ko hütsütinü abi chah licho. Hütsüpü Samuel-nü Rama lang thalicho.

David Saul Kuh la

¹⁴ Saul chahnü Abüdongba nbü tsicho ko Abüdongba-nü amünyi nbü khüdu mütheh abi khingchicho.

¹⁵ Abi kulirütinü abi te yocho, “Tsingrangba chahnü rocho amünyi nbü khüdunü nüh khingchilepü ihrünü müdhele.

¹⁶ Hütsüeko tbenglah tii khithsarü khüdu yangchi noronung ihrü khyang amülaba jüng. Ko khode nü chah amünyi nbü ronang, nyitsarüba tsünü tbenglah tsü tinung, khang nüh tsapenung.”

¹⁷ Saul-nü arüh te yuzengjo yocho, “Hütsütari tsa tiba nyüh khüdu yangchi I yanglang norung.”

¹⁸ Abi dikehrü khüdunü yocho, “Bethlehem yangdila Jesse tsurü ikhong tii khithsarü atsa khüdu lile. Abi müci mülah ko pümtrung atsa khüdu, rothsarü atsa ko yuchorü atsa khüdu lile. Abüdongba abi te lile.”

¹⁹ Achotsü Saul-nü Jesse yang yuhirü müthehcho, “I yanglang nü tsurü san nyahba David tsü rosohng.”

²⁰ Jesse-nü Saul yanglang David, mizaza khüdu, hümdhse khe hipü gadu khüdu ko yongkha jeng zehpü shuküp shinga khüdu te wüsohcho.

²¹ David-nü Saul yanglang rocho ko abi dikehcho. Saul-nü abi khütang mürüpcho ko abi thsunohrü bisohnung throchehcho.

²² Hütsüpü Saul-nü Jesse yang yusi hita müthehcho: “Ihnü David mürüpre. Abi Ih dikehnung hila lisohng.”

²³ Hütsütinü khode amünyi nbü tsü Saul chah chüronang, David-nü abi tbenglah hiro tiicho. Amünyi nbünü pehjüde Saul khü atsauba kang thali tsapecho.