1 SAMUEL 15 - AMÜSA BAIBEL (BSI)

Amalek-rü Nyüm Khata

¹ Samuel-nü Saul te yocho, “Abüdongba-nü Abi müyurü Israelrü michah yangthsaba müyühjü thronung müthehba tsü Ih lile. Ade, Akohba Abüdongba-nü tu yoro nyieng.

² Abinü Amalek-rü khingchinung tunüo arüh jümürünü Israelrü Ijip lanü chürode arüh nyümcho.

³ Wüng ko Amalek-rü tsü mahng ko arüh licho lüpcho riri changsohng. Tusü tünyingjü; adhrerü, khingkurü, azarü, akhungarü, misü san, ut ko gadu hiri apüm kyüsehjüng.”

⁴ Saul-nü abi rothsarüti dsibülung Telem la khidhingcho: ko Israel lanü rothsarü arüh lakh anyüh ko Juda lanü hajar dhüre thsacho.

⁵ Hütsüpü abi ko abi nyitsarütinü Amalek yangdi lang wücho ko yongkhi ngah la thseh pümcho.

⁶ Abinü Israelrü jümürü Ijip lanü chürode arüh te yanglih nguba nyitsarü Ken-rü yang amüzahnung yu jücho: “Ihnü Amalek-rü yola nührüsü kyüsehkhang mütsa, arüh yolanü tsipehng.” Achotsü Ken-rünü tsicho.

⁷ Saul-nü Amalek-rü te nyüchüro lahpi Ijip lang Havila lanü Shur chii khata jowü kohcho;

⁸ abinü Amalek-rü yangthsaba Agag akangnü rangcho ko müyurü apüm kyüsehcho.

⁹ Ta Saul ko abi nyitsarünü Agag akang khümchocho ko misü ko san atsauba, misüza ko sanza atsauba atsaecho lüpcho mükyüsehcho; arühnü akhyüchah müliba ko amii müliba du kyüsehcho.

Saul Mükhyüchocho

¹⁰ Abüdongba-nü Samuel te yocho,

¹¹ “Ihnü Saul yangthsaba kangsohcho wah lümre; abinü I tenü zako ko I yuzeng mübichire.” Samuel zichürocho ko müyüp abinü Abüdongba te kihchicho.

¹² Nyangnyü khüu mütoh abinü Saul shirünung wücho. Ta abi Karmel yangdi lang wükopü yocho. Hütsüla abinü apu nengdang Lung dongdi khüdu külüpcho ko hütsülanü müchikeh Gilgal lang wücho.

¹³ Samuel-nü Saul yanglang tuwücho ko Saul-nü salüm jo yocho, “Abüdongba-nü nüh müwajüng, Samuel! Ihnü Abüdongba yuzeng bichiko.”

¹⁴ Samuel-nü tsingdhingcho, “Khang khütapü Ihnü misü ko san khong yuchiro?”

¹⁵ Saul-nü lalingcho, “Hütsüri I nyitsarünü Amalek-rü yo khyücho lile. Misü ko san atsaubati arühnü nü Tsingrang Abüdongba khyang kangmübü jünung yohpüle, ko anyingcholü ihrünü wohchi changsohko.”

¹⁶ Samuel-nü yocho, “Nyieng, Abüdongba-nü shomang Ite yocho Ihnü nüte yonung.” Saul-nü yocho, “Young!”

¹⁷ Samuel-nü lalingcho, “Nüpunü nüh tsü tu mahrü roh-i lümnye, nüh Israel yucho la langnüba lile.

¹⁸ Abüdongba-nü nüh Israelrü yangthsaba throcho ko abinü amütsa nyitsarü Amalek-rü changsohnung nüh müthehcho. Arüh müsüsohkhangde khatanung abinü nüte yocho.

¹⁹ Khang tuepü nühnü abi yocho münyicho? Tuepü kohro zangnung tsohkhutacho? Hütsünü Abüdongba mükünyangsohko.”

²⁰ Saul-nü lalingcho, “Ihnü Abüdongba yochonyiko. Abinü yocho kyo Ihnü wücho, yangthsaba Agag rangcho ko Amalek-rü atümung kyüsehcho.

²¹ Ta I nyitsarünü arühnü mahchehchola misü ko san atsauti mükyüseh, ta nü Tsingrang Abüdongba khyang kangmübü jünung arühnü hila Gilgal lang norocho.”

²² Samuel-nü yocho, “Abüdongba-nü khüiba müruro: yochonyiba a mahkhang amübü ko kangmübüo? San atsauba kangmübü mübünung tenü yochonyinung tsü atsauba.

²³ Abi nyümba tsü azi-among nguchicho münyi kyo lile, ko hongzicho tsü kyothri mübücho münyi kyo lile. Nühnü Abi yuzeng dhsonglicho kyo, Abinü nüh yangthsaba thsasohnung dhsongliko.”

²⁴ Saul-nü lalingcho, “Ho, Ihnü amünyi shitpahko. Ihnü Abüdongba yuzeng ko nü athülaba mübichi. Ihnü I nyitsarü drüchonü arühnü khyünyücho nguchiko.

²⁵ Ta Ihnü ade kihchire, I khyang mülang pehjüng ko Ihnü Abüdongba mübünung I yola Gilgal lang thali rung.”

²⁶ Samuel-nü yocho, “Ih nü yola thali müwünung. Nühnü Abüdongba yuzeng mükhyücho, ko Abinü nüh Israel yangthsaba thsasohnung dhsongliko.”

²⁷ Hütsüpü Samuel-nü tsinung ximülacho, ta Saul-nü abi fükhüm chah ranglicho ko hütsü rohrüpcho.

²⁸ Samuel-nü abi te yocho, “Abüdongba-nü chünye nü chahnü Israel yanglih rohrüpre ko nü tenü atsauba khüdu khyang jüre.”

²⁹ “Israel ahechibong Tsingrang-nü arahkheh müchore mahkhang lasih mümülichire. Abi nyitsarü kyo alasih mümülichire.”

³⁰ Saul-nü lalingcho, “Ihnü amünyi shitpahko. Ta langnürüti ko Israelrü betelü Ih ashah tükhyüsoh. Ihnü nü Tsingrang Abüdongba mübünung I yola thalieng.”

³¹ Achotsü Samuel-nü Gilgal lang abi yola thali wücho ko Saul-nü Abüdongba mübücho.

³² Samuel-nü yocho, “Yangthsaba Agag tsü hila Ih yang norung.” Agag-nü adrüchonü dhridhriseh abi yang, “Sünungba hi khüta akhaopü lüm rocho.”

³³ Samuel-nü yocho, “Nü nohshengnü khingkurü adrong tsuzarü mühli kangsohcho kyo, nü tpasü tsuzarü mühli kangsohnung.” Ko abinü Agag Gilgal la bholu bete zangzang khanahcho.

³⁴ Hütsüpü Samuel Rama lang wücho ko yangthsaba Saul Gibea lang tsicho.

³⁵ Samuel akangli ayung, abinü yangthsaba tsü khodesü thali müshirücho; ta abi nengdang longricho. Saul Israel la yangthsaba kangsohcho nengdang Abüdongba wah lümcho.