1 SAMUEL 13 - AMÜSA BAIBEL (BSI)

Filistinrü Nyüm Khata

¹ Saul yangthsanung dikehde abi kang … azirü thsacho, ko abinü Israel michah kang anyüh yangthsacho.

² Saul-nü Israelrü nyüh hajar asang throchehcho ko azong lih Bethel la Mikmash la abi te hajar anyüh yohpücho ko Benjamin la Gibea lang Jonathan yola hajar khüdu müthehcho. Ko anyingcho tsü palu kulang müthehcho.

³ Jonathan-nü Filistinrü anüchiba tsü Geba la kyüsehcho ko hütsü Filistinrü atümungnü yuchicho. Hütsüpü Saul-nü yanglih apümlang rühti mehnü khata wünung Ibrirü dsinung yuhirü müthehcho.

⁴ Saul-nü Filistinrü anüchiba kyüsehko, hütsünü Filistinrünü arüh thrünyirepü Israel atümungnü müdhecho. Achotsü müyurünü Saul yola zehnung Gilgal la shibülungcho.

⁵ Israelrü te khatanung Filistinrü shimükhongcho; arüh kheh la nyübong akhüluba hajar sangre, kuri chah shangrü nyüh hajar dhüroh ko rothsarü tsü kihbekhümla lihpi roh-i mükhilongcho. Arühnü Bethaven nyüchürolang wü Mikmash la müdongcho.

⁶ Hütsüpü arühnü Israelrü dee mütsa mahcho ko khüta müthsa kangsohcho. Israelrü khürü lungkoh ko lungkhi la, khürü lung la mahkhang mütrüm ko kihkong la rangcho;

⁷ ko khürü Jordan yongkhi keh Gad ko Gilead-rü lih lang tsicho. Saul tsü Gilgal la du liyacho ko abi te liba müyurü tsü adrüchonü dhridhricho.

⁸ Samuel-nü abi te yocho kyo, abinü nyümong dhünyeh Samuel yingcho, ta hütsü chii Samuel tsü Gilgal ro müchicho. Müyurünü Saul pehjümüsucho,

⁹ achotsü abinü arüh te yocho, “I yanglang trüp mübü ko akehta mübü hirung.” Abinü trüp mübü mübücho,

¹⁰ ko abi thümyade, Samuel ro chihcho. Saul-nü chüdu abi mütohcho ko abi khyüchocho,

¹¹ ta Samuel-nü yocho, “Nühnü hi tu nguchicho?” Saul-nü lalingcho, “Müyurütinü Ih pehjümüsucho ko nühsü bechola mürocho; hütsü du mah, Mikmash la Filistinrü shibülungre.

¹² Hütsünü Ihnü lümcho, ‘Filistinrünü Ih Gilgal hila mahnung ko Ihnü Abüdongba lümcho yangchinung mümüküp.’ Hütsünü Ihnü kangmübü jübaepü lümchehcho.”

¹³ Samuel-nü yocho, “Hütsü amüthsalang nguchiko. Nühnü Abüdongba nü Tsingrang-nü nü khyang jücho yuzeng mühnyi. Nühnü nyirelanglü, Abinü nüh ko nü shümtsurü khyang Israel michah müchangkapü yangthsasohba thsako.

¹⁴ Ta ade nü yangthsathsaba achang müchinung. Tunüo nühnü abi yocho münyichonü, Abüdongba-nü abi müyurü michah yangthsanung Abinü khyünyücho khüdu throchehnung.”

¹⁵ Samuel-nü Gilgal pehjücho ko abi langlang wücho. Müyurü anyingcho tsü Saul yola abi rothsarü yanglang wücho. Arühnü Gilgal lanü Benjamin lih la Gibea lang wücho. Saul-nü arothsarüti xodhingcho ko arüh thsih dhüroh-o du nying licho.

¹⁶ Saul, atsurü Jonathan ko abi nyitsarütinü Benjamin lih la Geba la müdongcho; Filistinrü tsü Mikmash la müdong licho.

¹⁷ Filistinrü rothsarütinü mülung asang kang changpü arüh müdongchahnü shemüsucho. Mülung khüdu Shual lih la Ofra lahpi,

¹⁸ mülung khüdu Beth Horan lahpi ko mülung khüdu lurü lahpi Zeboim Ngah ko akungaselih chahchü nguba lang wücho.

¹⁹ Israel la ikengrü mülicho, tunüo Filistinrünü Ibrirü khyang thsunohrü mükengsohcho.

²⁰ (Israelrünü arüh luh xüba, fühjeng, püh ko yavi zanung Filistin lang jowücho;

²¹ püh ko fühjeng chah rahkehba zacho ngang shekel nohlüm asangla khüdu ko luh xüba ko mükheh zacho ngang shekel nohlüm müyüla anyüh khyücho.)

²² Hütsü khu khata nyümong tsü Saul ko atsurü Jonathan nyüh chah khu sü khehlasü thsunohrü müzehcho.

²³ Filistinrünü rothsarü mülung khüdu Mikmash lang yatinung müthehcho.