1 SAMUEL 12 - AMÜSA BAIBEL (BSI)

Samuel Aza Yu

¹ Hütsüpü Samuel-nü Israelrü te yocho, “Nührünü khyünyücho kyo Ihnü nguchiko. Nührü michah yangthsanung Ihnü yangthsarü khüdu jüko,

² ko adelü abi khyang nührü nüsohng. Adelü Ih shiko ko kutpoh chüroko ko I tsurüti nührü te lile. I zadenü ade yingcheh Ih nührü langnürü thsa liroko.

³ Ih hila lile. Ihnü lango dusü thsameh likhang ade Abüdongba ko abi throchehcho yangthsaba bete I khyang mülang pehjüng. Ihnü khürü yo misü mahkhang gadu khyo lirü mah-o? Ihnü khürü kihyochü mahkhang khürü sehchi bichi lirü mah-o? Khürü chahnü pohsa khyo lirü mah-o? Ihnü hütsüta nguchi likhang, Ihnü thali jünung.”

⁴ Müyurünü lalingcho, “Mah, nühnü ihrü mükihyochü mahkhang müsehchi: ko nühnü sü chah nüsü tusü mükhyü.”

⁵ Samuel-nü lalingcho, “Nührünü I chah tu achomükeh pü rangchehcho yuzi tsü Abüdongba ko Abinü throchehcho yangthsaba lile.” Arühnü lalingcho, “Ho, Abüdongba Ihsa yuzi lile.”

⁶ Samuel-nü yocho, “Mosa ko Aron throchehba ko nührü jümürü Ijip lanü nüchehba tsü Abüdongba lile.

⁷ Ade müshehchipü yaang ko nührü ko nührü jümürü khüta Abüdongba akohba nguchi khu khümchocho hütsüri khohcheh yonung.

⁸ Khode Jakob ko abi tsutpu Ijip lang wücho ko Ijiprünü arüh sehchi bichicho, nührü jümürünü Abüdongba yang züdecho ko Abinü arüh yang Mosa e Aron nyüh mütheh Ijip lanü arüh nücheh noro hila lisohcho.

⁹ Ta müyurünü Abüdongba arüh Tsingrang nbüchücho, hütsü khu Filistinrü Moab yangthsaba ko Hazor yangdi rothsarü anüchiba Sisera-rü khyang nührü jümürü nyüm khata kohsohcho.

¹⁰ Hütsüde arühnü Abüdongba te züde yocho, ‘Ihrünü amünyi shitpahko, tunüo ihrü Nü tenü za tsiko, ko Baal ko Astarte kyothri mübüko. Ihrü rorüh khehlanü ihrü khümchoung, ko ihrünü Nüh mübünung!’

¹¹ Ko Abüdongba-nü Gideon, Barak, Jeftha ko achangkathsa Ih müthehcho. Ihrü müipinü nührü rorüh khehlanü nührü khümchocho ko nührü tbachi licho.

¹² Ta khode Amon yangthsaba Nahash-nü nührü mahnung thsacho, hütsüde du nührünü Abüdongba nührü yangthsaba mükhyüchocho Ite yocho, ‘Ihrü yangthsarü khüdu khyünyüre.’

¹³ “Ade nührünü throchehba yangthsaba tsü hila lile; nührünü abi chingcho ko ade Abüdongba-nü nührü khyang abi jüko.

¹⁴ Nührünü Abüdongba drükhang ko Abi yu nyi Abi dikehkhang ko Abi yuzeng münyümpü nührü ko nührü yangthsabanü Abi khanglang iiwükhang, lüpcho tsa linung.

¹⁵ Ta nührünü Abüdongba te münyikhang ko Abi yuzeng mübichikhang, Abinü nührü ko nührü yangthsaba nyüm yanung.

¹⁶ Hütsüeko, nü yacho lanü tüshehmüi ko Abüdongba-nü amülah nguchinung liba tsü nührünü ngunung.

¹⁷ Ade hi kungseh bekhyah! Ta Ihnü dangkhidangnangnung ko Abüdongba-nü ningki tsing rosohnung, ko khode hi tikehnang, nührünü yangthsarü chingba tsü Abüdongba nyüm amünyi arangcheh shitpahko pü nührünü müdhenung.”

¹⁸ Hütsüpü Samuel-nü dangkhidangnangcho ko hütsü nyümong tsünü Abüdongba-nü ningki tsing rosohcho. Hütsüde müyurü atümungnü Abüdongba ko Samuel drücho,

¹⁹ ko arühnü Samuel te yocho, “Ihrü tüsüsoh pü Abüdongba-nü Tsingrang te kihchijüng. Ihrü münyi apa chah lahkeh, ihrünü yangthsarü khüdu chingba tsü amünyi shitpahko pü chünye ihrünü lümchehre.”

²⁰ Samuel-nü yocho, “Tüdrü! Nührünü hütsüta amünyi nguchinye, Abüdongba chahnü za tütsi, ta nührü lasih apümnü Abi dikehng.

²¹ Arahkheh tsingrang khanglang tüwü; arühnü nührü mütrochehnung, mahkhang mükhümchonung, tunüo arüh tsü yujeba mah.

²² Abüdongba-nü yuchümko ko Abinü nührü müpehjünung, tunüo Abinü nührü tsü apu müyurü kangsohnung dhrongchehpehko.

²³ I nengdanglü, nührü khyang müdangkhidangnangjükhang Ih amünyi shitpahnung lanü Abüdongba-nü yatieng. Hütsü mülih, Ihnü atsa ko amütsa nengdang nührü te donung.

²⁴ Abüdongba yocho nyieng ko nührü lasih apümnü Abi dikehng. Abinü nührü nengdang khütoi nguchicho hütsü lümchehng.

²⁵ Ta nührünü mütozah amünyi shitpahkhang, nührü ko nührü yangthsaba changnung.”