1 SAMUEL 11 - AMÜSA BAIBEL (BSI)

Saul-nü Amon-rü Kohcho

¹ Choo khüdu-o lipü Amon Yangthsaba Nahash-nü arothsarü nüpü Gilead lih la Jebesh yangdi nyüm wücho ko hütsü beticho. Jabesh-rünü Nahash te yocho, “Ihrü te mongtsa külüpm, ko ihrünü nüh ihrü yangthsarü kangsohnung.”

² Nahash-nü lalingcho, “Ihnü nührü te anyengchota khüdula mongtsa külüpnung: Ihnü nyitsarü müipi tsalang nahtse hehchehchüpehjünung ko hütsüta Israel la ashah hirojünung.”

³ Jabesh zirünü yocho, “Israel lih apümlang yuva jünungthsa ihrü khyang nyümong dhünyeh mülajüng. Sünüsü ihrü mütrokhang, ihrünü nüh müpu ronung.”

⁴ Yusi hirü tsü ro Saul liba Gibea chihcho ko yusi tsü arüh te yode, nyitsarüti adrüchonü tramüsucho.

⁵ Hütsüde Saul tsü luhlangnü misü nüpü lungchi yacho, ko abinü tsingdhingcho, “Tu külüpcho? Tuepü atümung trataro?” Hütsüde abi te Jabesh langnü yusi tsü yocho.

⁶ Khode Saul-nü hi yuchicho, Abüdongba nbü abi chah rocho ko abi rihlong chürocho.

⁷ Abinü misüpung anyüh müpsehcho ko zangzang khanahpü yu hirite Israel lih apümlang shuh tsü hi müthehcho, “Sünü khatalang Saul e Samuel nyüh yola müronang, abi misüpung chah hiroh-i nguchinung.” Israelrünü Abüdongba-nü tu nguchinung hütsü lümxü, süsü münyingpü atümung chürocho.

⁸ Saul-nü arüh tsü Bezek la shibülungsohcho: arüh tsü Israel lanü lakh asang ko Juda lanü lakh asang thsacho.

⁹ Arühnü Jabesh lanü yusi hirü te tsü yocho, “Atu münyüzehde nührü khümchonungepü nührü nyitsarü te young.” Khode Jabesh-rünü yusi hütsü yuchicho,

¹⁰ arüh künyangsehcho ko Nahash te yocho, “Atu ihrünü nüh müpu ronung ko ihrü chah nü thsanyücho thsaang.”

¹¹ Nyangnyü khüu mütoh Saul-nü abi nyitsarüti chang asang kang changnahcho ko wawa lanü wü Amon-rü müdong liba tsü becho ko nyüthung chii kyücho. Ko asünyingrü tsü palu palu tsishocho.

¹² Hütsüpü Israelrünü Samuel te yocho, “Saul ihrü yangthsaba müthsasohnungerü tsü khülo? Ihrü khyang khülo, ihrünü arüh kyüsehnung!”

¹³ Ta Saul-nü yocho, “Chünye süsü müsüsohnung, tunüo hi Abüdongba-nü Israelrü khümcho nyümong lile.”

¹⁴ Ko Samuel-nü arüh te yocho, “Ihsa atümung Gilgal lang wünung ko thali khüdupi Saul tsü Ihsa yangthsabaepü sobhonung.”

¹⁵ Achotsü arüh atümung Gilgal lang wücho ko hütsüla Amüsa müdümla Saul tsü yangthsabaepü sobhocho. Arühnü akehta kangmübü mübücho ko Saul ko Israelrü atümungnü thsüti müzeh künyangtacho.