1 SAMUEL 10 - AMÜSA BAIBEL (BSI)

¹ Hütsüpü Samuel-nü olive tuji füh khüdu khyo Saul thah chah tungkehcho ko abi chah müthsüp-pü yocho, “Abüdongba-nü nüh Israel michah yangthsanung müyühjü throchehre. Nühnü abi müyurü michah thsanung ko arüh rorüh atümung tenü tsungtinung. Ko Abüdongba-nü Abi müyurü michah nüh yangthsaba throcheh yuzi hi linung:

² Chünye nüh I tenü za tsipü, Benjamin lih la Zelza la Rachel kong münyeh nühnü adhrerü anyüh mütohnung. Arühnü nüte yonung, Nühnü yangchiba gadu-sü nguko, ko hütsü nengdanglü nüu tu mülümxü, ta nü nengdang lümxü, ‘Ihnü I tsurü nengdang tu nguchinung’ pü mütozah tsingdhingre.

³ Nühnü hütsülanü Tabor la Amüsa singdong müchihde wünung ko hütsüla nyüh asang Bethel lang Tsingrangba khyang kangmübü mübünung wüchi nühnü mütohnung. Arüh yola nyüh khüdu miza asang nünung, nyüh khüdunü hümdhse asang hinung ko asanguba tsünü yongkha shibha khüdu hipü ngunung.

⁴ Arühnü nü khyang salüm jünung ko hümdhse anyüh jünung, hütsü nühnü khyüchoung.

⁵ Hütsüpü nühnü Filistinrü amüdongchah liba Gibea la Tsingrangba khang chah wünung. Yangdi tbükhüm la tsü azikehrü mülung khüdu akhangchah liba bholu lang tsünü tbenglah, tbhang, bongphelu ko honglilah bipü khithsa nyiichi jüro mütohnung.

⁶ Dhrongyengnü Abüdongba nbünü nüh rangnung ko nühnü arüh mülung la züdu khithsa nyiichinung ko nüh nyitsarü pathsa kangnung.

⁷ Khode hütsüta tikehnang, Tsingrangba-nü khüta mülanang hütsü nühnü nguching.

⁸ Nüh I müngu Gilgal lang wünung ko hütsüla Ihnü nüh shirünung ko trüp mübü ko akehta mübü mübünung. Ihnü ro nüte anguchinung müyode, hütsüla nyümong dhünyeh ying.”

⁹ Saul-nü Samuel pehjünung ximülade, Tsingrangba-nü Saul khyang akang asi jücho. Ko Samuel-nü yocho apüm hütsü nyümong tikehcho.

¹⁰ Khode Saul e akuliba nyüh ro Gibea chihcho, azikehrü mülung khüdu ro mütohcho. Dhrongyengnü abi chah anbü rocho ko abi arüh khithsa ko nyiichibala tsü zehcho.

¹¹ Abi müdherünü abi hütsüta nguchicho ngu tsingdhingtacho, “Kish tsudhre chah tu tikehcho? Saul mii azikehrü kangcho mah-o?”

¹² Hütsüla lirü nyüh khüdunü yocho, “Aparü azikehrüti hi khüta arüh tpurü sürüero?” Choyoh yu hi hita tikehcho, “Saul mii azikehrü kangcho mah-o?”

¹³ Khode Saul khithsa nyiichikacho, abinü akhangchah bholu lang wücho.

¹⁴ Saul au azabanü abi ko akuliba nyüh ngu tsingdhingcho, “Nühjü khüde wücho?” Saul-nü lalingcho, “Gadu yangchinung wücho. Ko münguchonü ihrünü Samuel yanglang wücho.”

¹⁵ Saul au azabanü tsingdhingcho, “Abinü nüte tu yocho?”

¹⁶ Saul-nü yocho, “Abinü Gadu tsü nguko pü yoko” ta abinü au azaba te Samuel-nü abi yangthsaba kangnung yoba tsülü müyocho.

Saul Yangthsaba Kangsohcho

¹⁷ Samuel-nü müyurüti Mizpa la mübünung dsibülungpü

¹⁸ arüh te yocho, “Abüdongba, Israel Tsingrang-nü yore, ‘Ihnü Ijip lanü nührü nüchehcho ko nührü sehchirü Ijiprü ko aparü apüm khehlanü khümchocho.

¹⁹ Nührü chongcha ko roto suro lanü khümchobong, Ih nührü Tsingrang, ta chünye nührünü Ih mükhyüchore ko yangthsarü khüdu chingre. Tsale, khang, Abüdongba jingte nührü jangjang ahung-ahung ko atsutpu-tsutpu shibülung.’”

²⁰ Hütsüpü Samuel-nü ahung khüdu-khüdu belang rosohcho ko Abüdongba-nü Benjamin hung throchehcho.

²¹ Hütsüpü Samuel-nü Benjamin hung tsü atsutpu-tsutpu belang rosohcho ko Matri tsutpu throchehcho. Hütsüpü Matri tsutpu belang rosohcho ko Kish tsurü Saul throchehcho. Arühnü abi yangchicho, ta khode arühnü abi müngucho,

²² arühnü Abüdongba te tsingdhingcho, “Adesü khürü mülio?” Abüdongba-nü lalingcho, “Saul tsü hütsüla bha khanglang rang pümle.”

²³ Achotsü arühnü shang wünü Saul tsü müyurü yanglang norocho ko arühnü abi tsü aparü atümung tenü apakyarütinü athsengu ngucho.

²⁴ Samuel-nü müyurü te yocho, “Abüdongba-nü throchehba nyitsarü tsü hila lile! Ihsa yola abi kyo süsü mühle.” Müyurü atümungnü züdecho, “Yangthsaba kutsüp lieng.”

²⁵ Samuel-nü müyurü te yangthsaba khüdu athsalang ko nguchi changnah yocho ko hütsüri tsü vakha khüdula thrahpü Amüsa müdümla yohpücho. Hütsüpü abinü atümung palu kulang tsisohcho.

²⁶ Saul-sü Gibea lang kulang thalicho. Tsingrangba-nü arüh lasih la chotarü athrungrü khürü abi yola wücho.

²⁷ Ta amükhyu nyitsarü khürünü yocho, “Nyitsarü hinü Ihsa khyang tu atsa nguchijünung?” Arühnü Saul müchümükehcho ko abi khyang jiyü tu mühirojücho.