1 SAMUEL 1 - AMÜSA BAIBEL (BSI)

Shiloh la Elkana ko Abi Kukhi

¹ Efraim hung lanü nyüh khüdu anengnü Elkana, Efraim azong lih Rama yangdila licho. Abi Jeroham tsurü ko Elihu shümtsurü, Zuf hung changsho lanü Tohu tsutpu lanü licho.

² Elkana anitpü anyüh licho, Hanna ko Penina. Penina tsuzarü licho ta Hanna-lü mülicho.

³ Kang mükhu Elkana-nü Eli tsurü Hofni ko Finehas nyüh Abüdongba bebürü nguchiba Shiloh yang Rama lanü Abüdongba Akohba khyang kangmübü jünung wücho.

⁴ Elkana-nü kangmübü jüh müipi, Penina khyang nohlüm khüdu ko atsu nyüh khyang nohlüm khüdu-khüdu jücho.

⁵ Ko abinü Hanna khütang müinye, abükyü khyangsü nohlüm khüdu du jücho, tunüo Abüdongba-nü abükyü khyang tsuzarü müthsasohcho.

⁶ Penina-nü abükyü dee dhsümthsecho, ko mükhimüngucho, tunüo Abüdongba-nü abükyü azarü müthsasohcho.

⁷ Hütsüta, kangnü kang tsicho; khodederü arühnü Abüdongba kulang wünang, Penina-nü Hanna khütang wahsohcho, ko abükyünü tranü tusü mütsucho.

⁸ Anii Elkana-nü yorü, “Hanna, tuepü traro? Tuepü müyangtsuro? Tuepü nüh lede hitoi mükünyangro? Tsuzarü dhüre tenü nü nengdang Ih awüu mahrü do?”

Hanna ko Eli

⁹ Nyümong khüdu, arühnü Shiloh la Abüdongba kuh la tsuyongkapü, Hanna-nü shemüsucho. Abükyü khura longricho ko abükyünü Abüdongba te khütang tra kihchicho.

¹⁰ Hütsütade bebürü Eli tsü trahtri te apümji la pümcho.

¹¹ Hanna-nü Abüdongba te yuchüm yocho, “Akohba Abüdongba, Ih Nü dikehlatpü chah dhing. I chongcha dhing ko Ih lümchehng. Ih tünbüchü. Nühnü I khyang azarü khüdu jükhang, Ihnü abi akang ayung Nü khyang khakhuchüjünung ko khodesü akuva mühehjünung yuchümre.”

¹² Hanna-nü Abüdongba te hütsüta anyahli dangkhidangnangcho, ko Eli-nü abükyü beküp dhingyacho.

¹³ Abükyünü sahmüthsapü dangkhidangnangcho; abeküp lülüpcho, ta yuva müchürocho.

¹⁴ Achotsü Eli-nü abükyü tsü müchacho thsaepü lüm abükyü te yocho, “Khütoi nyahli mücha linung! Hitadung ko mütsaa kang!”

¹⁵ Ta abükyünü lalingcho, “Ih mümücha, I büdongba. Ih yongkha müyong. Ih longriseh dangkhidangnangre ko Abüdongba te I chongcha thohchahchü ngusohre.

¹⁶ Ih adongmücho khingkurü kyo tülüm. Ih khura thsachonü hita dangkhidangnangre.”

¹⁷ Eli-nü yocho, “Atsathsa tsieng, ko Israel Tsingrang-nü nühnü chingcho tsü jüngtü.”

¹⁸ Abükyünü lalingcho, “Nühnü Ih lede müi lümkehng.” Hütsüpü abükyünü tsicho, ko tsuyongnung aza tsucho, ko adelü wah mülicho.

Samuel Surocho

¹⁹ Nyangnyü khüu Elkana ko abi kukhi mütoh surocho ko Abüdongba mübüpü khanglang, arühnü Rama yang kulang thalicho. Elkana-nü anitpü Hanna te mükhongcho ko Abüdongba-nü abükyü kihchicho lalingcho.

²⁰ Hütsü, abükyü fü müdeng kangcho ko adhrerü khüdu nümüsucho. Ko abi neng Samuel dsicho, tunüo abükyünü yocho, “Ihnü Abüdongba chahnü chingchocho.”

²¹ Elkana ko abi kukhi thali Shiloh lang Abüdongba khyang kang müthe jüba kangmübü ko abinü nyengchocho amübü jünung bekhyah chiirocho.

²² Ta hütsü nyümonglü Hanna müwücho. Abükyünü anii te yocho, “Akhunga tsü lümjingpü du, Ihnü abi akang ayung linung nengdang Abüdongba yang nowünung.”

²³ Elkana-nü lalingcho, “Tumüthsa, nühnü tu tsalero hütsüta nguching; abi mülümjingde, kuh la du lieng. Ko Abüdongba-nü nü yuchüm tikehsohng.” Hütsüta Hanna-nü nyehli kuh la licho ko akhunga rükucho.

²⁴ Abi lümjingko khanglang, abükyünü abi yola misü bongtho khüdu ko hüm süreh dhüre ko yongkha shinga khüdu hipü Shiloh lang wücho. Abükyünü akhunga Samuel nüpü Shiloh la Abüdongba kulang wücho.

²⁵ Arühnü misü bongtho tsü müpsehpü, akhunga tsü Eli yanglang nowücho.

²⁶ Hanna-nü abi te yocho, “Abüdongba, nühnü Ih mülümkeh-o? Hila Abüdongba te dangkhidangnang nühnü nguba khingkurüsü Ih-e.

²⁷ Ihnü Abi te akhunga hi nengdang kihchicho ko I kihchicho laling Abinü I khyang jüko.

²⁸ Hütsüeko Ihnü abi Abüdongba khyang khakhuchüjüre. Abi akangli ayung, abi Abüdongba yo thsanung.” Hütsütapü arühnü hütsüla Abüdongba mübücho.