1 ROHTHÜP 26 - AMÜSA BAIBEL (BSI)

Amübükuh Nyahrü

¹ Amübükuh nyahrü Levirü nguchi tsü hiri licho. Kora hung lanü Asaf tsutpu Kore tsurü Meshelimia licho.

² Abi tsurü dhünyeh licho azi chunglangnü: Zekaria, Jediael, Zebadia, Jathniel,

³ Elam, Jehohanan ko Eliehoenai.

⁴ Adesü Tsingrangba-nü azarü keh müwajüba Obed Edom licho, azi chunglangnü: Shemaia, Jehozabad, Joa, Sakar, Nethanel,

⁵ Amiel, Isakar, ko Peulethai.

^6-7 Obed Edom tsurü aukhuba, Shemaia tsurü dhüroh licho: Othni, Refael, Obed, Elzabad, Elihu ko Semakia. Arüh tsü arüh hung la nguchi kohrü thsachonü dee ayingthsa licho: achangkaba anyüh tsü jiyü alaa kehcho.

⁸ Obed Edom kukhi lanü hiba nguchi nengdang adekheng nyüh rohrepü anyüh jücho.

⁹ Meshelimia kukhi lanü adekheng nyüh dhürekeh jücho.

¹⁰ Merari hung lanü Hosa licho, abi tsurü müyü licho: Shimri (abi aukhuba mahnye, aunü anüchiba kangsohcho),

¹¹ Hilkia, Tebalia ko Zekaria. Atümungnü Hosa kukhi lanü amübükuh nyahrü nyüh dhüreasang licho.

¹² Amübükuh nyahrü tsü tsutpu aichi mülung mülung changnahcho ko aparü Levirü roh-i Amübükuh la nguchi changjücho.

¹³ Tsutpu dicho müdhingpü khüiba tbükhüm jehnung hütsü zii thsadhingcho.

¹⁴ Shelemia nyüchürolang tbükhüm tsü throchehcho ko atsurü Zekaria, sünü lede athsüchiba atsa jo licho abi kihku lahpi tbükhüm tsü jehcho.

¹⁵ Obed Edom tsü kihjing lahpi tbükhüm jehcho ko atsurüti tsü kohro zahkehba chongsah nyahnung jehcho.

¹⁶ Shupim e Hosa nyüh nyüzüdulang tbükhüm ko athahlang langte Shalleket Tbükhüm nyahnung jehcho. Anyahnung tsü bekhyah changnahpü mülita nyahcho.

¹⁷ Nyüchürolang tsü nyümongla nyüh dhüroh, kihku lahpi nyüh müyü ko kihjing lahpi nyüh müyünü nyahsohcho. Kohro zahkehji chongsah tsü nyümong mükhu nyüh müyü, chongsah müipi anyüh-nyühnü nyahcho.

¹⁸ Nyüzüdu lahpi kuhmüzala tsü langte anyahrü müyü ko kuh yonglang nyüh anyüh yohpücho.

¹⁹ Kora hung ko Merari hung khyang anyahnung nguchi jüba tsü hütsüta licho.

Apa Amübükuh Nguchiti

²⁰ Aparü arüh jünirü Levirü tsü amübükuh kuthsi ko Tsingrangba khyang müsachehjüba jiyü yohpüji dhingyehrü thsacho.

²¹ Gershon tsurü yola Ladan tsü atsurü Jehiel kukhi mii zeh tsutpu adrong jümürü thsacho.

²² Ladan tsurü apa anyüh Zetham ko Joel nyüh tsü amübükuh kuthsi ko kohro zahkehji xükümrü thsacho.

²³ Amran, Izhar, Hebron ko Uziel trah khyangsü nguchi jücho.

²⁴ Shebuel, Mosa tsurü Gershom hung, abi tsü amübükuh kuthsi dhingyehrü adiuba licho.

²⁵ Gershom ani Eliezer lahpinü abi Shelomit te chingkehta licho. Eliezer tsü Rehabia au ko Rehabia tsü Jeshia au, Jeshia tsü Joram au, Joram tsü Zikri au ko Zikri tsü Shelomit au licho.

²⁶ Shelomit ko abi kukhirü tsü yangthsaba David, tsutputi michah athahti, ahung mülung la anüchirüti ko Tsingrangba khyang müsachehjüba jiyüti michah adhingyehrü thsacho.

²⁷ Arühnü chitalanü zang rocho kohro tsü Amübükuh la bichinung müsachehcho.

²⁸ Amübükuh la bichinung müsachehcho kohro lüpcho ko azikehrü Samuel-nü hirocho, yangthsaba Saul-nü hirocho, Ner tsurü Abner-nü hirocho ko Zeruia tsurü Joab-nü hirocho, hiri apüm michah Shelomit ko abi tsutpunü xükümcho.

Aparü Levirü Nguchi

²⁹ Izhar chahnü trahchocho yola, Kenania ko abi tsurüti tsü yangthsaba nguchi, athrahyohrü ko Israelrü yukharü thsacho.

³⁰ Hebron chahnü trahchocho yola, Hashabia ko tsutpurü hajar khüdupü thsih dhünyeh, apüm anengkhong, arüh tsü Jordan Yongkhi nyüzüdulang Israel la yudsi ko limih yangthsathsaba apüm arühnü xükümcho.

³¹ Jeria tsü Hebron trah michah anüchiba licho. David yangthsacho kang yüreula, Hebron trah la tsutpu jümü yangchitacho ko hiba tsutpula anengkhong rothsarüti tsü Gilead lih la Jazer la liyacho rangchehcho.

³² Yangthsaba David-nü Jeria tsutpu lanü athahti hajar anyüh thsih dhünyeh anengkhong throchehcho ko Jordan Yongkhi nyüchürolang Israel lih Reuben, Gad, ko nyüchürolang Manase lih apüm la yudsi ko limih yangthsathsaba apüm xükümnung arüh yohpücho.