1 ROHTHÜP 23 - AMÜSA BAIBEL (BSI)

¹ Khode David tsü dee shicho, abinü Solomon tsü Israel la yangthsaba kangsohcho.

Levirü Nguchi

² Yangthsaba David-nü Israel zirü, bebürüti ko Levirüti apüm müjang nübülungcho.

³ Abinü Levirü adhrerü kang sangre amilang mono khicho. Atümungnü hajar sangrepü keh thsacho.

⁴ Yangthsabanü arüh hajar mükyüpü müyü amübükuh nguchi dhingnung ko hajar dhüroh thrahkyanung ko yujitacho khanung,

⁵ ko hajar müyü anyahrü nguchi ko hajar müyü khi thsaba kohro bichi Abüdongba senung changta jücho.

⁶ David-nü Levirütisü arüh Gershon, Kohat ko Merari ahung aichi mülung asang kang changnahcho.

⁷ Gershon tsurü anyüh licho: Ladan ko Shimei.

⁸ Ladan tsurü asang licho: Jehiel, Zetham ko Joel,

⁹ ko arüh tsü Ladan trah la athah licho. (Shimei tsurü asang licho: Shelomoth, Haziel ko Haran.)

^10-11 Shimei tsurü müyü licho: Jahat, Zina, Jeush ko Beria ko abi chahnü adükeh du trahchocho, hütsünü arüh tsü ahung khüdu du khiyohcho.

¹² Kohat tsurü müyü licho: Amram, Izhar, Hebron ko Uziel.

¹³ Atsurü aukhuba Amram tsü Aron e Mosa nyüh au thsacho. (Aron ko abi trah tsü lede nengdang Amüsa kohro xükümrü, müchiji trüpnung, Abi dikehnung ko Abi nengla müyurü müwajünung.

¹⁴ Ta Tsingrangba nyitsarü, Mosa tsurüti tsü Levirü yola khiyohcho.)

¹⁵ Mosa tsurü anyüh licho: Gershom ko Eliezer.

¹⁶ Gershom tsurüti yola anüchiba tsü Shebuel licho.

¹⁷ Eliezer chahnü atsurü khüdu du Rehabia licho, ta Rehabia chahnü khütang trahchocho.

¹⁸ Kohat tsurü anyüuba Izhar chahnü atsurü khüdu Shelomit tsutpula athahthsa licho.

¹⁹ Kohat tsurü asanguba Hebron tsurü müyü licho: Jeria, Amaria, Jahaziel ko Jekameam.

²⁰ Kohat tsurü müyüuba Uziel tsurü anyüh Mika ko Ishia licho.

²¹ Merari tsurü anyüh licho: Mali ko Mushi. Mali atsurü anyüh licho, Eleazar ko Kish,

²² ta Eleazar chahnü khingkurü chah khu adhrerü mülipü sücho. Abi tsularüti tsü jüniza Kish-rü tsurü te kukangcho.

²³ Merari tsurü anyüuba Mushi tsurü asang licho: Mali, Eder, ko Jeremot.

²⁴ Levi chahnü trahchocho hiri apüm tsutpu ko ahungnü arüh nyitsarü müipi neng thrahyohcho. Abi chahnü trahchocho kang mükyü mihlang, Abüdongba kuh la nguchi jehcho.

²⁵ David-nü yocho, “Abüdongba Israel Tsingrang-nü Abi müyurü khyang yangtsa jüko ko Apusü Jerusalem la müchangka linung.

²⁶ Adelü Levirünü Abüdongba shükuh ko mübübala bichiba hiri hinung müdhsütah.”

²⁷ David-nü achangkathsa thülaba chah jükehpü Levirü apüm kang mükyü pikhang nguchila thrahyohcho,

²⁸ ko nguchi hiri jücho: Aron chahnü trahchocho bebürüti tronung, kekhüm ko chongsahti xümkümnung, Amüsa lüpcho mümünyisohpü yohpünung;

²⁹ amübü jücho hümdhse dhingyehnung, amübüla bichiba hüm, bhüpza müyohcho ko olive tuji yohrütacho hüm; amübükuh la amübü jücho müchehnung ko honung,

³⁰ ko nyangnyü romang mükhu Abüdongba hechinung,

³¹ ko Sabath nyümong amübü jücho trüpcho dhingyehnung ko Chonu Asi ko apa thsüti hiri dhingyehnung shulüm licho. Levirü nyüh khütoinü khütapü nguchinung hütsü nengdang yuzeng külüp licho. Levirü tsü lede Abüdongba mübüba nguchi tsü jücho.

³² Abüdongba shükuh ko Amübükuh dhingyehnung nguchi ko amübükuh la mübüba, Aron chahnü trahchocho bebürüti ko tsutpurüti tronung nguchi hiri licho.