1 ROHTHÜP 20 - AMÜSA BAIBEL (BSI)David-nü Raba Kohcho ( 2 Sam 12.26-31 ) 1 Kang khüu chisi bekhyah, kangmütoh yangthsarünü khata wüba bekhyah, Joab-nü rothsarü nüpü wü Amon lih mahcho, ta yangthsaba Davidlü Jerusalem la licho. Arühnü Raba yangdi beticho, hütsü mahcho ko changjücho. 2 Amon-rü tsingrang kyothri Milkom kuthri hon süreh sangrepü müyü-o amüling khüdu licho. Hütsüla thsidilung khüdu zehcho, hütsü David-nü khyo apu kuthrila yohcho. Hütsüpü abinü yangdila tsünü kuthsi adrong khyücho. 3 Abinü yangdila tsünü nyitsarü nowü singxasing, fühjeng ko püh bi nguchisohcho. Abinü hütsüroh-i tsü Amon yangdiba lanü nororü khyangsü nguchisohcho. Hütsüpü abi ko abi nyitsarüti Jerusalem lang thalicho. Filistin Akurahrü te Khatacho ( 2 Sam 21.15-22 ) 4 Akhanglang, adesü Filistinrü te Gezer la khata suwücho. Hila Husha-rü Sibekai-nü akurahrü nyüh khüdu anengnü Sippai kyüsehcho ko Filistinrü kohcho. 5 Adesü Filistinrü te khata apa khüdu khatacho ko Jair tsurü Elhanan-nü Gath-rü Goliath anithre Lahmi, sü kheh la thsuh shükyahrü kihdüm toh-i acheh bicho, hütsü kyüsehcho. 6 Gath la apa khata khüdu chürocho ko hütsüla ajing-akheh chah müyungza dhürüroh kehba akurahrü khüdu rocho. Abi tsü papade akurahrü khüdu chahnü trahchocho licho. 7 Abinü Israelrü khyangchicho ko David amung Shama tsurü Jonathan-nü abi kyüsehcho. 8 David ko abi nyitsarünü kyüsehba hiri asang hi Gath la akurahrü chahnü trahchocho licho. |
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
Bible Society of India