1 ROHTHÜP 19 - AMÜSA BAIBEL (BSI)

David-nü Amon ko Syria Kohcho

¹ Azachah lipü Amon-rü yangthsaba Nahash sücho ko atsurü Hanun yangthsaba kangcho.

² Yangthsaba David-nü yocho, “Ihnü Hanun te au Nahash-nü Ite nguchicho kyo amüi ngusohnung.” Hütsüpü David-nü abi amüi müdhesohnung yuhirü müthehcho.

³ Khode arüh Amon chihcho ko yangthsaba Hanun te shirücho, Amon-rü zirünü yangthsaba te yocho, “Nüu khyang jengreng jonü David-nü nüh yang amüi yuva hipü hiri nyitsarü rosohrepü nühnü lümrü mah-o? Khodesü mah. Ta nüh mahnung alih kodhingnung füzathsarü rosohchoba lile!”

⁴ Hanun-nü David yusi hirü tsü rang arüh benbüh hehpehjücho, arüh jengki arüh kihrüm chahnü müjüp-pehjüpü tsisohcho.

⁵ Arüh kulang thalinung dee shahcho ko David-nü atikehcho tsü yuchide, abinü arüh te arüh benbüh müchilangde, Jeriko la liyanung yuva müthehcho.

⁶ Yangthsaba Hanun ko Amon-rünü arüh David te arorüh kangkopü müdhecho, hütsünü athahlang Mesopotamia ko Syria lih Maka ko Zoba lanü kuri akhüluba ko hütsü nüchirüti mülihnung taripi süreh hajar sangrepü müyü jücho.

⁷ Arühnü mülihba kuri akhüluba hajar sangrepü anyüh ko Maka yangthsaba rothsarü ronü Medeba shündhün müdongcho. Amon-rüsü arüh yangdilanü chüro khatanung rungnüm licho.

⁸ Khode David-nü hütsü yuchicho, abinü Joab ko rothsarüti apüm müthehcho.

⁹ Amon-rünü shemüsu chüro arüh yangdiba Raba lang züduba langla tsü jüm licho ko arüh tronung rorüh yangthsarütinü ro asehsa la pümti yingcho.

¹⁰ Joab rorünü abi belang ko khanglang abi beticho ngucho, achotsü abinü Israel yola rothsarü athrungrüti throcheh Syria-rü lahpi pipü pümsohcho.

¹¹ Abinü anyingcho rothsarüti tsü ani Abishai khyang nüsohcho ko abinü arüh tsü Amon-rü lahpi pipü pümsohcho.

¹² Joab-nü abi te yocho, “Syria-rünü Ih koh nühnü ngukhang, ro Ih troung ko Amon-rünü nüh koh ngukhang, Ihnü ro nüh tronung.

¹³ Müci mülahng ko rezehng! Ihsanü Ihsa müyurü ko Ihsa Tsingrang yangditi nengdang müküp khatanung. Ko Abüdongba lümcho thsasohng.”

¹⁴ Joab ko abi nyitsarütinü benung bekhu wücho ko Syria-rünü drü tsicho.

¹⁵ Khode Amon-rünü Syria-rü drü tsicho tsü ngucho, arühnü Abishai betenü drü yangdi lang shehlicho. Hütsüpü Joab-nü Jerusalem lang thalicho.

¹⁶ Israelrünü arüh kohchehkopü Syria-rünü müdhecho, arühnü Eufrates Yongkhi nyüchürolang Syria limih lanü rothsarüti noro Zoba la yangthsaba Hadadezer rothsarü anüchiba Shobak kheh la yohpüjücho.

¹⁷ Khode hütsü David-nü yuchicho, abinü Jordan khüulang Israel rothsarüti nübülungcho ko Syria-rü lahpi pipü pümsohcho.

¹⁸ Khata suwücho ko Israelrünü Syria-rü rothsarü dhsongwücho David ko abi nyitsarünü Syria-rü kuri akhüluba nürüh hajar dhünyeh ko ajing rothsarü nyüh hajar yüre kyüsehcho. Arühnü Syria-rü rothsarü anüchiba Shobak mii kyüsehcho.

¹⁹ Khode Hadadezer pohki yangthsarütinü Israelrünü arüh kohchehkopü müdhecho, arühnü David te yangtsa külüpcho ko abi pohki licho. Syria-rünü hütsükolü khodesü Amon-rü mütrocho.