1 ROHTHÜP 18 - AMÜSA BAIBEL (BSI)

Khata la David Akoh

¹ Azachah lipü yangthsaba David-nü thali Filistinrü mahcho ko arüh kohcho. Abinü arüh khehlanü Gath yangdi ko hütsü mükangmüshü yangdongti khyücho.

² Abinü Moabrüsü kohcho ko arühnü abi pohki li akhüm tüpcho.

³ Hütsüpü, David-nü Hamath lih münyeh Zoba la Syria-rü yangthsaba Hadadezer mahcho, tunüo Hadadezer-nü athahlang Eufrates chii abi pohki yohpünung müküpcho.

⁴ David-nü kuri akhüluba hajar khüdu, kuri rothsarü hajar dhünyeh ko ajing rothsarü hajar mükyü kohcheh khyücho. Abinü kuri akhüluba thsih khüdu nengdang kuri kükyo yohpüpü anyingcho tsü amükhong lekhangjücho.

⁵ Khode Damaskas lanü yangthsaba Hadadezer tronung Syria-rü müthehcho, David-nü arüh beti nyüh hajar mükyüpü anyüh kyüsehcho.

⁶ Hütsüpü abinü arüh lih la rothsarü müdongji thsacho ko arüh tsü abi pohki li abi khyang akhüm tüpcho. Abüdongba-nü apümlang David khyang kohsohcho.

⁷ David-nü Hadadezer thsazirütinü bicho hon tsungti kengchocho ko hütsüri Jerusalem lang hirocho.

⁸ Abinü Hadadezer pohki liba Tibhat ko Kun yangditilanü imüyeng khütang khyücho. (Akhanglang hiri tsü Solomon-nü Amübükuh la kihbong, dongdi ko shingtbhürü külüpla khyücho.)

⁹ David-nü Hadadezer rothsarü apüm kohchehkopü Hamath yangthsaba Toi-nü yuchicho.

¹⁰ Achotsü; Toi-nü adrongpi khatapü mükohba Hadadezer kohcho nengdang anengse jünung atsudhre Joram David yang müthehcho. Joram-nü David khyang hon, taripi ko imüyengnü külüpcho kohro jiyünung hijücho.

¹¹ Yangthsaba David-nü hütsüri tsü amübüla bichinung abinü kohchehba, Edom, Moab, Amon, Filistia ko Amalek-rü chahnü khyüba yola yohrüta müsachehcho.

¹² Abishai, sü atpa Zeruia licho, abinü Mih Ngah la Edomrü kohchehko ko arüh hajar dhürekeh kyüsehcho.

¹³ Abinü Edom lih apümlang rothsarü müdongji külüpcho ko nyitsarüti tsü David müyurü kangcho. Abüdongba-nü apümlang David khyang kohsohcho.

¹⁴ David-nü Israel apüm michah yangthsacho ko abi müyurüti lede tsa ko müinü bichicho.

¹⁵ Abishai ani Joab tsü rothsarü michah anüchiba, Ahilud tsurü Jehoshafat tsü athrahcho xükümba;

¹⁶ Ahitub tsurü Zadok ko Abiathar tsurü Ahimelek nyüh tsü bebürü; Seraia tsü yukhajila athrahba,

¹⁷ Jehoiada tsurü Benaia tsü David nyahrü dhingyehba; ko yangthsaba David tsurüti tsü abi nguchila ayingthsarü licho.