1 ROHTHÜP 15 - AMÜSA BAIBEL (BSI)

Yuzeng Singdi Hitsinung Küdangcho

¹ David-nü apu nengdangsü yangdila tsü kuh thsacho. Abinü Yuzeng Singdi nengdang shükuh khüdu thsacho.

² Hütsüpü abinü yocho, “Levirü dunü Yuzeng Singdi tsü dhieng, tunüo hütsü dhinung ko lede abi dikehnung Abüdongba-nü arüh throchehcho.”

³ Hütsüta David-nü Yuzeng Singdi Jerusalem lang hiwü abinü thsachola yohpünung Israelrü apüm dsicho.

⁴ Hütsü khangte abinü Aron ko Levirü trah dsicho.

⁵ Levirü Kohat lanü nyüh 120 michah anüchiba Uriel;

⁶ Merari tsutpu lanü nyüh 220 michah anüchiba Asaia;

⁷ Gershon tsutpu lanü nyüh 130 michah anüchiba Joel;

⁸ Elizafan tsutpu lanü nyüh 200 michah anüchiba Shemaia;

⁹ Hebron tsutpu lanü nyüh 80 michah anüchiba Eliel;

¹⁰ ko Uziel tsutpu lanü nyüh 112 michah anüchiba Aminadab rocho.

¹¹ Hütsüpü David-nü bebürü Zadok ko Abiathar ko Levirü arüh dhüroh, Uriel, Joel, Shemaia, Eliel ko Aminadab dsicho.

¹² Abinü Levirü te yocho, “Nührü Levirü hung michah anüchirü lile. Ihnü thsaba müdümla tsü Israel Tsingrang Abüdongba Yuzeng Singdi hironung nengdang, nührübürü ko ajünirü Levirü nührü jangjang müsachehng.

¹³ Akhudi hütsü dhinung nührü mülichonü ko Ihsanü athsalangnü abi mümübüchonü, Abüdongba Ihsa Tsingrang-nü Ihsa khingchicho.”

¹⁴ Achotsü Israel Tsingrang Abüdongba Yuzeng Singdi dhinungthsa bebürüti ko Levirütinü arüh jangjang müsachehcho.

¹⁵ Ko Abüdongba-nü Mosa khu mülacho kyo, arühnü akhau yohpü arüh pünurü chahnü dhicho.

¹⁶ David-nü Levirü azibarüti te papa khyang akünyang khi honglilah ko dhingza tii thsasohnung yuzengjücho.

^17-21 Khithsarü hung lanü, arühnü dhingza tinung hiri throchehcho: Joel tsurü Heman, Berekia tsurü Asaf ko Merari tsutpu lanü Kushaia tsurü Ethan. Arüh trosohnung arühnü tbenglah zii thsasohnung Levirü hiri throchehcho: Zekaria, Jaziel, Shemiramoth, Jehiel, Unni, Eliab, Maaseia ko Benaia.

²² Khenania tsü khi thsanungla tsachonü, Levirü khithsarü xükümnung throchehcho.

^23-24 Yuzeng Singdi nyahnung Obed Edom ko Jehia yola Berekia ko Elkana throchehcho. Yuzeng Singdi bete rühti mehnung bebürü Shebania, Joshafat, Nethanel, Amasai, Zekaria, Benaia ko Eliezer throchehcho.

Jerusalem lang Yuzeng Singdi Hiwücho

²⁵ Hütsüpü yangthsaba David, Israel azibarüti ko rothsarü anüchirüti Yuzeng Singdi khyünung Obed Edom kulang wücho ko arühnü thsüti arangcheh khyücho.

²⁶ Arühnü Yuzeng Singdi dhirü Levirü chah tu alümxünung mülinung nengdang, misüpung dhünyeh ko san dhünyeh kangmübü jücho.

²⁷ David ko khithsarüti, arüh anüchiba Khenania ko Yuzeng Singdi dhirü Levirü arüh apüm anana shü atsaubanü kyahcho fükhüm khümcho. David-nü anana bebü jengki tsü khyücho.

²⁸ Hütsüta Israelrü apümnü Yuzeng Singdi yola rühti, shujüh, dhingza ko honglilah bipü khi thsa Jerusalem lang wücho.

²⁹ Singdi tsü hiro yangdi tsü chihde, Saul tsulatpü Mikal-nü nyübongkhilanü chehchü dhingcho ko yangthsaba David akünyanglangnü nyiichi tsohchi ngu mükünyang lümcho.