1 ROHTHÜP 13 - AMÜSA BAIBEL (BSI)

Kiriat Jearim Lanü Yuzeng Singdi Khyümüicho

¹ Yangthsaba David-nü hajar ko thsih mülung michah anüchirü atümung te kihtacho.

² Hütsüpü abinü Israel apüm te hita züdecho, “Nührünü mülajükhang ko hi Abüdongba Ihsa Tsingrang-nü lümkhang, Ihsanü Ihsa müyurü, bebürü ko Levirüti apüm hila Ihsa yang shimükhongnung arüh yangditi yang yuhirü müthehnung.

³ Hütsüpü Ihsanü Saul yangthsaba chichah thrüchahchüpehba Tsingrangba Yuzeng Singdi khyünung wünung.”

⁴ Hütsü alümcho tsü müyurünü künyang khyüchocho.

⁵ Achotsü David-nü yanglih apümlangnü kihjinglang Ijip lurü lanü kihku lahpi Hamath Lang chii, Kiriat Jearim lanü Jerusalem lang Yuzeng Singdi hironung Israelrü shimükhongsohcho.

⁶ Hütsüpü David ko müyurütinü Juda lih la Baalah yangdi hütsü Kiriat Jearim yang aqo kehba Cherufim michah Abüdongba neng thrahkeh liba, Tsingrangba Yuzeng Singdi khyünung wücho.

⁷ Abinadab kuh lanü arühnü Yuzeng Singdi tsü khyüchehcho ko misü akhüluba asi khüdu chah yohcho.

⁸ Hütsüpü Uzza ko Ahio nyühnü misü akhüluba tsü nüde, David ko müyurü apümnü Tsingrangba dhichi arühnü kohchonü nyiichicho. Arühnü tbenglah, honglilah, tbhang, dhingza ko rühti meh khi thsacho.

⁹ Arühnü Khidon pungkhyang chii rode, misü tsü ajing müthicho ko Uzza tsü akheh müyungchüde Yuzeng Singdi chah tsü thahpücho.

¹⁰ Hütsüde Uzza te Abüdongba zii chürocho ko Singdi thahpücho ngang abi süsohcho ko hütsütinü hiba müdüm te Perez Uzza dsicho.

¹¹ Abüdongba-nü zii chüro Uzza khingchichonü David rihlong chürocho.

¹² Hütsüpü David-nü Tsingrangba drü yocho, “Ihnü Yuzeng Singdi tsü khüta hiwünung?”

¹³ Achotsü David-nü hütsü Jerusalem lang mühiwücho. Ta hütsü Gath yangdila lirü Obed Edom kuh la pehjücho.

¹⁴ Yuzeng Singdi tsü hütsüla choo asang licho ko Abüdongba-nü Obed Edom kukhi ko abi yo lüpcho müwajücho.