1 ROHTHÜP 12 - AMÜSA BAIBEL (BSI)

Benjamin Hung lanü Akhulang David Mono

¹ David tsü yangthsaba Saul tenü rang wü Ziklag la licho.

² Abi hütsüla lide abi yola alümjing, adrengdreng rothsarü ko Saul roba Benjamin hung la khiyohti ro zehcho. Arühnü tbüdeng kyanung kohcho ko tsalang ko fülilang anyüdinglangnü lung kyanung kohcho.

^3-7 Arüh tsü Gibea lanü Shema tsurü Ahiezer ko Joash pohki licho. Rothsarü tsü hiri licho: Azmavet tsurü Jeziel ko Pelet Anathot lanü Beraka ko Jehu Gibeon lanü Ishmaia, anengkhong rothsarü khüdu ko “sangre” yola langnürü khüdu. Gedera lanü Jeremia, Jahaziel, Johanan ko Jozabad. Harif lanü Eluzai, Jerimoth, Bealia, Shemaria ko Shefatia. Kora hung lanü Elkana, Ishia, Azarel, Joezer ko Jashobeam Gedor lanü Jehoram tsurü Joela ko Zebadia.

Gad Hung lanü David Mono

⁸ Rothsarü hiri hi Gad hung lanü alümjing ko anengkhong rothsarü David lipilih la roshengvi la lide wü abi yola zehrüti tsü lile. Arüh tsü thsunohrü bichinungla axangcheh ko kihkhünying kyo adrünung ko Shuhu kyo adsaya licho.

^9-13 Arüh adi chunglangnü hiroh-i licho: Ezer, Obadia, Eliab, Mishmana, Jeremia, Attai, Eliel, Johanan, Elzabad, Jeremia ko Makbanai.

¹⁴ Gad hung lanü nyitsarü hiri khürü hajar michah anüchirü ko khürü thsih michah anüchirü licho.

¹⁵ Kang la akhudiba choo, Jordan Yongkhi mülümthoh dii yade, arühnü Yongkhi tsü kehcho ko yongkhi nyüchürolang ko nyüzüdulang angah la lirüti apüm iipehcho.

Benjamin ko Juda lanü Mono

¹⁶ Nyümong khüdu Benjamin ko Juda hung lanü mülung khüdu David lii yaba roshengvilang tsü wücho.

¹⁷ David-nü wü arüh shiro yocho, “Nührü Ih tronung shangrü roh-i rokhang, nührü künyang khyüchore. Ihrü yola zehng! Ta nührünü Ihnü nührü te amütsa münguchipü Ih kihyochünung lümkhang, Ihsa jümürü Tsingrang-nü hütsü müdhele ko nührü khingchinung.”

¹⁸ Arüh yola nyüh khüdu Amasai, sü akhanglang “sangre” michah anüchiba kangcho, abi chah Tsingrangba anbü rocho ko abinü züde yocho, “Jesse tsurü David, ihrü nüyo lile! Nüh ko nü trorü kohsohng! Tsingrangba nü lahpi lile.” David-nü arüh khyüchocho ko abi rothsarü yola anüchirü kangsohcho.

Manase lanü Mono

¹⁹ Manase hung lanü rothsarü khürü David-nü yangthsaba Saul te khatanung Filistinrü yola wüyade, abi yola iiwücho. Yujebalü abinü Filistinrü tsü mütro, tunüo arüh yangthsarütinü abinü arüh kihyocho apu abüdongba Saul trokhang mütsapü arühnü abi Ziklag lang thali müthehcho.

²⁰ David thali rode, abi yola zehnung Manase lanü würü rothsarüti tsü hiri: Adna, Jozabad, Jediael, Mikal, Jozabad, Elihu ko Zillethai. Manase la arüh atümungnü nyüh hajar michah anüchirü thsacho.

²¹ Arühnü abi rothsarü michah anüchirüthsa David dikehcho, tunüo arüh atümung axangcheh athrungrü du thsacho. Akhanglang arüh tsü Israelrü rothsarü yola anüchirü kangcho.

²² Nyümong mükhu alaa alaa zürocho ko tunyah mülipü abi rothsarü tsü mükhilong kangcho.

David Rothsarüti

^23-37 David Hebron la lide, Abüdongba-nü nyengchocho kyo, abi Saul mülih yangthsaba kangsohnungla tronungba athsachehcho rothsarü khütang abi yola zehcho. Arüh khiyoh tsü hitoi thsacho: Judarü: hajar dhüroh thsih keh thsunohrü xangcheh küdang birü; Simeon-rü: hajar dhünyeh thsih khüdu athsachehcho; Levirü: adhrerü hajar müyü thsih dhüroh; Jehoiada mono, Aron trah hajar asang thsih dhünyeh; Zadok tsutpurü athrungrü: anüchirü mükyüpü anyüh; Benjaminrü (Saul apu hung): hajar asang (Benjaminrü adrongunü Saul te yochonyi licho) Efraim: palu nah la anengkhong hajar mükyü thsih keh; Nyüzüdulang Manase: hajar dhürekeh; David yangthsaba throchehnung wüsohcho; Isakar: anüchirüti thsih anyüh, arüh pohki lirü zeh (Hiri langnürü Israel-nü tu nguchinung ko hütsü nguchinung becho atsauba müdhe licho) Zebulun: hajar dhünyang yocho anyi ko khatanung rungnüm liba ko thsunohrü adhangpi bichinung thsachehrü. Naftali: hajar khüdu anüchirü ko thsunohrü kükyo biba adhrerü hajar sangrepü dhünyeh zehnü; Dan: hajar mükyüpü keh thsih dhüroh athsachehcho; Asher: hajar yüre khatanung rungnüm liba; Jordan nyüchürolang yuchoti: Reuben, Gad, ko nyüchürolang Manase: lakh khüdupü hajar mükyü thsunohrü adhangpi bichichehba adhrerü.

³⁸ Hiri rothsarü apüm khatanung rungnümpü Hebron lang Israel la David yangthsaba kangsohnung dhrongchehpü wücho. Anyingcho Israel apümnü hütsü nengdang bemüjangpü licho.

³⁹ Arühnü David yola hütsüla nyümong asang abürü nyitsarünü küdangjücho tsuyongnung tsuyong thsüti khyücho.

⁴⁰ Kihku lahpi yuchoti Isakar, Zebulun, ko Naftali langnü müyurütinü gadu, ut, gaduza ko misüpung chah tsang, hüm, ngurüsih ko akungcho singsih, yongkha ko olive tuji zang hipü rocho. Arühnü müpseh tsunung san ko misüsü hirocho. Hi apüm tsü limih apümlang müyurü akünyang ngusohnung nguchicho.