1 PETER 4 - AMÜSA BAIBEL (BSI)

Amülichicho Akang

¹ Khrista shutsa la chongchachonü, nührünüsü abinü lümcho roh-i nührü jangjang rezehchi lüm; tunüo sürü shutsa la chongcharo arüh adelü amünyi la mühle.

² Hütsüeko, ade tinü anyingcho akangli ayung shutsa müruchola mah, ta Tsingrangba lümcho la rahseh libae.

³ Atsicho shikhela müyudsirünü mürubala nührü bekhyah kükyo pehko. Nührü akang tsü mabomashi, mükhyahmürah, müchamüloh, khatamüna, ayongrü mülung ko kyothri mübüchola zeh roko.

⁴ Ko adelü nührünü arüh athrünyinung akang liba yola müzehchonü, arüh nyemüyangre ko nührü mükhimüngure.

⁵ Ta Tsingrangba sünü akang lirü ko asürü yukhanung rungnüm liro, abi jingte arühnü palu akang yuzi jünung.

⁶ Hütsünü asürü sürü shutsa la yukhapehcho, nyitsarü müipi roh-i arühsü anbü la Tsingrangba akang licho kyo linung nengdang arüh te Yuse Atsa tsü thsingyucho.

Tsingrangba Jiyü Müshorüti Atsa

⁷ Lüpcho achangka amünyethsa lile. Nührünü dangkhidangnangchehnungthsa abürü jangjang rahseh xengxeng.

⁸ Alathsa khüdunü khüdu te dee müitaang, tunüo amüinü amünyi khütango niitire.

⁹ Khüunü khüu te müsusüpü amüi nguchi nguching.

¹⁰ Nyitsarü müipinü Tsingrangba jiyüti papa müshorü atsa khüdu kyo, abinü jiyü pathsa Tsingrangba chahnü khyüchocho roh-i, aparü tsasohnung bichibae.

¹¹ Jisu Khrista sü chah ahechi ko zii lede lidu liro, abi khu Tsingrangba khyang lüpcho la nengse jünungthsa, sünü thsingyuro abinü Tsingrangba yusi thsingyung; sünü dikehro abinü Tsingrangba-nü jücho re tsünü dikehng. Ahechi ko yanglih müchangkapü abi yo thsaang Amen.

Khristan khüdu Chongcha

¹² Amüibati, nührü chah amülongdicho lango tikehnü, athsadsü adhsanü nührü chongcha mütohcho hi nengdang tünyemüyang.

¹³ Hütsü tenülü, abi ahechi mishade nührü akünyang ajeng kangnungthsa nührü Khrista chongcha changtarepü müdhe künyang.

¹⁴ Khrista mono thsacho khyanglangnü nührü mükhimüngukhang, nührü künyang; tunüo Tsingrangba ahechi anbü tsü nührü chah lile.

¹⁵ Nührü amüpsehrü, aführü mahkhang yuzeng thsangnyangrü, mahkhang aparü nguchi dongzijürü roh-i nührülü tüchongcha.

¹⁶ Atanye khristan thsachonü nührü chongchakhang, hütsü nengdang tüshah, ta Khrista nengla Tsingrangba neng seing.

¹⁷ Yukhanung becho chihko, ko Tsingrangba apu nyitsarüti akhu yu khanung. Hütsü Ihsa chahnü dikehkhang, Tsingrangba Yuse Atsa chah müyudsirü achangka suro tu thsanung?

¹⁸ Amüsa yunü yocho roh-i: “Amüsarü mii hariri khümchokhang; Tsingrangba müdrürü münyirü tu kangnung?”

¹⁹ Hütsüeko sürü Tsingrangba-nü lümcho roh-i chongcharo, arühnü atsa nguching ko longlangchehba Akülüprü kheh la palu nbü khakhuchüjüng.