1 PETER 3 - AMÜSA BAIBEL (BSI)

Anii ko Anitpü

¹ Hütsü roh-i nitpürüti, nührü niirü khürünü Tsingrangba yu müyudsinye, nührü sayingnü arüh yudsisohnungthsa arüh pohki lieng. Nührünü yu khüdusü yonung müdhsütah,

² tunüo arühnü nührü saying khütoh-i amüchong ko amüsa hütsü ngunung.

³ Nührü tsah tsasohnung kuva kyahnü, mahkhang ariri mükingkeh, mahkhang amichah abürü tangnung jengki nührünü tüsehyah.

⁴ Hütsü mülih, nührü lasiking tsah atsa, müshi-müziba tsah atsa, aküna ko alonglüm nbü, khüi Tsingrangba lahpi amii adiuba liro, hiri kehbae.

⁵ Tunüo atsicho shikhela khakhuchüjüba khingkurüti Tsingrangba chah longdinü arüh palu niirü pohki lichonü arühbürü tangsohcho.

⁶ Sara-sü hütsü roh-i thsacho; abükyünü Abraham te yochonyicho ko abi te abüdongba pü dsicho. Nührünü tu müdrüpü atsa nguchikhang, adelü nührü abükyü tsulatpürüti lile.

⁷ Hütsü roh-i, niirüti, nührü nitpürü tsü nührü tenü suh amüzehbaepü nyicheh libae. Arüh te jengrengjo bichieng, tunüo Tsingrangba akang jiyü tsü arühsü nührü te müjang ngunung. Nührü dangkhidangnang tunü mülongmüzinung nengdang hiroh-isü nguching.

Athsalang Nguchi Nengdang Chongcha

⁸ Achangkathsa, nührü atümung lümlong khüdu ko chomangtanü, jünirü kangnü khüdunü khüdu te müita, aküna lasih ko alonglüm lümlong thsaang.

⁹ Amütsa müli amütsa ko chokehchola müli chokehcholanü tümüli, hütsümüli müwajüng, tunüo nührü amüwa ngunung khyanglangnü nührü dsicho.

¹⁰ Amüsa yunü yocho roh-i: “Sünü akang müiro, ko nyümongti atsa ngunyüro, Amütsa choba nyehlieng ko arahkheh tücho.

¹¹ Abinü amünyi lanü ximüla atsa nguchisohng; Abinü lasih apümnü yangtsa iichisohng.

¹² Tunüo Abüdongba-nü amüsarü michah dhingyehre ko arüh kihchicho nyire; ta amünyi nguchirü abinü yatire.”

¹³ Nührünü atsa nguchinung longphikhang, sünü nührü lerohpehjünung?

¹⁴ Ko athsalang nguchi nengdang chongchakhang, nührü khüta akünyangnung! Süsü tüdrü ko tülümxü.

¹⁵ Ta nührü lasih la Khrista jengreng drüng, ko Abüdongba roh-i abi heching. Shikhe apüm la, masüte abi chah nührü alongdi changnah youngde yochehnungthsa rungnüm lieng,

¹⁶ ta hütsü longlüm jengrengjo nguching. Khrista mono roh-i nü saying atsa nengdang nyüm chode, ko müthsamünyüde, arühbürünü chochola ashah khyüsohnungthsa, nü lümlong müsa lieng.

¹⁷ Hi Tsingrangba-nü lümcho thsakhang, amünyi nguchinung tenülü, atsa nguchi nengdang chongchanung atsau.

¹⁸ Tunüo Tsingrangba yanglang nührü nowünung nengdang, münyirüti müli amüsa Khrista-nü münyiti shulüm lede nengdang khüdupi sücho. Abi shutsa la süsohcho, ta anbü la kanglisohcho,

¹⁹ ko anbü la abinü wü arangyoh la liba anbüti te thsingyucho.

²⁰ Hiri anbüti Noa singkong külüpba nyümongti la Tsingrangba-nü rangcho yingba shikhe ayocho mühnyirüti lile. Singkong la nyitsarü azikyah, atümungnü nyüh keh kih lanü khümchocho,

²¹ khüi nührü ade khümchoro hütsü baptiba adüzü thonguchoba lile. Hiba hi fü chah axüh mütsahpehchoba mah, ta lümlong amüchongnü Tsingrangba te anyengchoba külüpcho lile. Jisu Khrista kangli ropü,

²² sü ninglang tuwü Tsingrangba tsalang liro, ko ninglang riwürüti ko ninglangrü taseti ko ziiti michah yangthsa thsaro, hütsü khu nührü khümchore.