1 PETER 2 - AMÜSA BAIBEL (BSI)

Akang liba Lung ko Amüsa Yanglih

¹ Hütsüeko, nührü jangjang amünyi apüm lanü za lieng; adelü arahkheh, akhürah, mükohdhing ko nyüpmüseh yu tücho.

² Akhungarüti roh-i, anbü nyikih amüdhseng mürung, hütsü yongchonü nührü zinung ko khümchonung.

³ Amüsa yunü yocho roh-i, “Abüdongba tsü khütoh-i atsanang nührünü müdheko.”

⁴ Akang liba lung nyitsarünü amii mühli pehba ta Tsingrangba-nü thsidi roh-i throchehba Abüdongba yang rung.

⁵ Akang liba lung kyo rung, ko anbü amübükuh thsaba la tsü bichisohng, hütsüla Jisu Khrista khu Tsingrangba te akhyüchochehba akang mübünung amüsa bebürü roh-i dikehnung.

⁶ Tunüo amüsa yunü yore: “Ihnü thsidilung khüdu throchehre, Zion la khüi jongnah lung roh-i Ihnü müdongre; Ko sürünü abi chah yudsinang khodesü müshahsohnung.”

⁷ Sürünü yudsiro arüh nengdang hiba thsidilung hi dee amii lile; ta müyudsirü nengdang: “Lung khüi kuthsarünü amii mühli pehcho apüm tenü ayingba kangcho.”

⁸ Ko adesü amüsa yu khüdunü yore: “Hiba lung hi nyitsarü müthikehsing, arüh khülusohba lung.” Arühnü yu chah tsü müyudsichonü müthikehcho; arüh nengdang Tsingrangba alümcho hütsü licho.

⁹ Ta nührü athrochehcho yucho, yangthsaba bebürüti, amüsa yanglih, Tsingrangba apu nyitsarü, abi anyemüyangnung nguchi sobhosohnung throchehcho, sünü nührü ama lanü apu anyemüyangnung atsingse yang dsicho.

¹⁰ Khüdupi nührü Tsingrangba tsurü müthsacho, ta ade nührü abi nyitsarü lile; khüdupi nührünü Tsingrangba yanglilüm mümüdhecho, ta ade nührünü abi achomang khyüchoko.

Tsingrangba Yurüti

¹¹ Jünirüti, Ihnü hiba limih la nührü shirü ko tsichi rümchirü roh-i khichire! Shutsa mükhyahmürah, khüi lede anbü nyüm khataro hütsü lanü za lieng.

¹² Müyudsirü yola nührü saying tsa yohpüng, hütsünü athsamehrü roh-i mülangjünye, arühnü nührü nguchi atsa ngunung, ko abi roba Nyümong Tsingrangba neng senung.

¹³ Nührünü Abüdongba khyanglangnü nyitsarü yuzeng apüm pohki lieng: Yangthsaba amichahba tase,

¹⁴ ko Governorti, sürü abinü amütsa nguchirüti khingchinung ko atsa nguchirüti senung throchehcho, arüh pohki lieng.

¹⁵ Tunüo Tsingrangba-nü nührü nguchi atsa tsünü amümüdherü amüsithsa choba tsü yah-a dusohnyüre.

¹⁶ Nührü nyüje nyitsarü roh-i lieng; tanye amünyi khürü hüptinung nengdang nührü nyüje tübichi, ta Tsingrangba yurü kyo lieng.

¹⁷ Atümung khyang jengreng jüng, jünirüti müing, Tsingrangba drüng, ko yangthsarü khyang jengreng jüng.

Khrista Chongchacho Adüzü

¹⁸ Kulirüti, nührünü abüdongrü alümdhingrü ko amüi kehrü te du mah, ta ashühkhangrü pohki mii dee jengrengjo lieng.

¹⁹ Nühnü abi lümcho müdhe mülengcho adhsa apüm rangchokhang, hütsü nengdang Tsingrangba-nü nüh müwajünung.

²⁰ Tunüo nü thsamehcho nengdang xüpcho rangchocholü tu ajingcho liro? Ta nührünü athsalang nguchipü adhsa rangchocholü, hütsü nengdang Tsingrangba-nü müwajünung.

²¹ Tunüo hi nengdang du Tsingrangba-nü nührü dsicho, ko nührünü abi jingdrang la iiwünungthsa Khristanüsü nührü nengdang chongchacho ko adüzü khüdu pehjücho.

²² Abinü amünyi tu müshitpah, ko sünüsü abi be lanü arahkheh cho müyuchidhing.

²³ Khode abi nyüpmüsehcho, abinü nyüpmüseh yunü mülaling; khode abi chongchacho abinü mümütichi, ta yuje yukhaba, Tsingrangba chah alongdi yohpücho.

²⁴ Ihsa amünyi la sünung ko amüsaba nengdang linung nengdang, Khrista apunü khala chah apu fü la Ihsa münyi hicho. Abi ihanü Ihsa kyangko.

²⁵ Nührü thrümeh tsiba san kyo licho, ta adelü nührü San Nyahrü ko nührü nbü dhingyehrü yang thali roko.