1 PETER 1 - AMÜSA BAIBEL (BSI)

¹ Jisu Khrista riwürü Peter chahnü— Tsingrangba athrochehcho nyitsarü sürü Pontius, Galatia, Kapadocia, Asia ko Bithynia lih atümunglang yangpirü tsisho lirüti yanglang.

² Au Tsingrang-nü lümcho la, anbünü nührü amüsa nyitsarü kangsoh, Jisu Khrista yochonyi ko abi shühnü thsütohsohnung nengdang nührü throchehcho. Nührü te achomang ko atbachi bholo lisohng.

Akang liba Alongdi

³ Ihsa Abüdongba Jisu Khrista Au Tsingrang khyang Ihsanü anengse jonung! Tunüo abi yanglilüm amülahnü asücho lanü Jisu Khrista kanglisohcho khu Ihsa khyang akang asi jüko. Hinü Ihsa khyang akang liba alongdi khüdu jüre,

⁴ hütsü khu Tsingrangba-nü abi müyurüti khyang yohpüjüba amüwa khütango Ihsanü ngunung longdire. Müsühnahba, müthsangnyangba mahkhang mütrülohba ninglang yanglih la abinü nührü khyang yohpüjüle.

⁵ Achangka nyümongla mishanung rungnüm liba akangcheh khüi Tsingrangba ziinü yudsi khu khümcho yohpüro, arüh tsü nührü yo.

⁶ Nührü nengdang akhingchi alang adrongnü nührü chongchasohchonü azachah nengdang longrinung tsü athsalang thsanye, hi nengdang nührü künyang.

⁷ Hütsü nührü yudsi tsü yuje-epü müdhenung nengdang lile. Achangpehba hon mii michangnü düzodhingre; hütsü rangchonungthsa nührü yudsi khüi hon tenü dee awüba liro hütsüsü düzodhing. Hütsütakhang, Jisu Khrista mishaba Nyümong nührünü anengse, ahechi ko adhichi ngunung.

⁸ Nührünü abi müngu, ta abi müire, nührünü abi müngu, ta abi chah yudsire. Hütsü benü müyochehba akünyang arangcheh la künyangtare,

⁹ tunüo nührünü abi chah yudsiba nahdhingkeh, nührü anbü akangcheh ngure.

¹⁰ Hiba akangcheh nengdang azikehrütinü müzah yangchicho ko bhucho, ko Tsingrangba-nü nührü khyang jünung liba jiyü hi nengdang arühnü choyohcho.

¹¹ Bekhyah tsü khode ko khüta tikehnung hütsü rangchehnung arühnü müküpcho. Hiba bekhyah nengdang arüh chah liba Khrista nbünü, Khrista-nü chongcha rangchonung hütsü khangte ahechi ronung nengdang thongucho.

¹² Ninglangnü müthehchücho Anbü Amüsa ziinü riwürüti sürü chahnü yuse atsa seyohchücho, arühnü hütsüri nengdang chonü khüi nührünü ade yuchicho; arüh nguchi tsü arühbürü ajingcho nengdang mah, ta nührü nengdangepü hiri azikehrüti te Tsingrangba-nü mishako. Ninglang riwürütinü mii nyichehnyüba tsü hiri nengdang licho.

Müsa Linung Athsüchiba

¹³ Hütsünü, nguchinung nengdang nührü lüm thsachehng. Jisu Khrista mishade nührü khyang jünung liba achomang nengdang mungkhung longdieng ko lümkang.

¹⁴ Tsingrangba te yocho nyieng, ko nührü amümüdhe shikhe liba saying roh-i akang tüli.

¹⁵ Hütsü mülih, nührü dsiba Tsingrang kyo, nührüsü apüm la müsa lieng.

¹⁶ Tunüo amüsa yunü yore, “Nührü müsa lieng tunüo Ih amüsa lile.”

¹⁷ Nührünü Tsingrangba te dangkhidangnangde, Uwa pü dsire, abinü tsah müdhingpü nyitsarü müipi palu nguchi aichi jingkih khüdula yukhare; hütsütakhang, limih la akangli ayung abi jengreng drü lieng.

¹⁸ Tunüo nührü jümürü chahnü amii müliba akang lanü rochehnung tu nguchichonang hütsü nührünü müdhele. Hütsü achangpehba hon mahkhang taripinü mah;

¹⁹ ta arah ko lapha mükehba sanza Khrista thsidi shühnü rochehcho.

²⁰ Limih müthridenü abi Tsingrangba-nü throchehcho ko nührü khyanglangnü hiri achangka nyümongti la mishacho.

²¹ Abi khu asücho lanü abi kanglisohba ko ahechi jüba Tsingrangba chah nührünü yudsire; hütsü nührü yudsi ko alongdi Tsingrangba chah lile.

²² Ade nührünü yuje te yochonyichonü nührübürü müdhsengchehko ko müjang yudsirüti nengdang khele müire, nührü lasih atümungnü khüdunü khüdu te müitaang.

²³ Tunüo akang liba ko müchangkaba Tsingrangba yu khu asüba mah, ta amüsüba tpurü chahnü tsuzarü roh-i nührü anyüpiu suroko.

²⁴ Amüsa yunü yocho roh-i: “Amüi tsurü atümung za kyole, ko arüh ahechi apüm rangmü yungpi kyole. Za tsü kungre ko yungpi tsü trülohre,

²⁵ ta Abüdongba yu tsü lede lire.” Nührü te sobhoba yu tsü hiba Yuse Atsa nengdang lile.