1 KORINTRÜ 9 - AMÜSA BAIBEL (BSI)

Riwürü Khüdu Anguchinung ko Athsalang

¹ Ih nyüje nyitsarü mahrü do? Ih riwürü khüdu mahrü do? Ihnü Ihsa Abüdongba Jisu müngucho mah-o? Ko nührü tsü Abüdongba nengdang I nguchi amii mahrü do?

² Aparünü Ih riwürü khüdu roh-i mükhyüchonye, nührü nülü khyüchore! Tunüo Ih riwürü khüduepü nührü tsü Abüdongba jingte I yuzi lile.

³ Ih mülangjüde Ipu alanglang hiroh-i yare:

⁴ I nguchi ngang I khyang tüptinung athsalang mahrü do?

⁵ Ihnü aparü riwürü, Abüdongba nirü ko Peter kyo shitsehlang yudsirü nitpü khüdu nünung athsalang mahrü do?

⁶ Mahkhang ihrü akang nengdang nguchiba tsü Barnabas ihjü müleng do?

⁷ Rothsarü khüdunü apu thsi tsu dikehrü mah-o? Shükusih luh thsapü hütsü lanü mütsurü sü liro? Sünü Santi nyahnü arüh chahnü nyikih müyongrü sü liro?

⁸ Ihnü hi nyitsarü yuzeng lanü yorü do? Amüsa yuzeng nüsü hita müyorü do?

⁹ Mosa yuzeng la hita thrah lile, “Misüpung ma nyehde abe türahjü.” Tsingrangba-nü misüpung nengdang lümrü mah-o?

¹⁰ Abinü hütsü Ihsa nengdang yorü mahrü do? Hütsü Ihsa nengdang thrahcho. Axünahrü ko anyehrünü arüh nohlüm fürü ngunung alongdila nguchire.

¹¹ Ihrünü nührü yola anbü mashuko. Nührü chahnü limih dhsütah khyünung tsü amüthsalang mah-o?

¹² Aparünü mii nührü chahnü ngunung longdikhang, ihrünü alaa mülongdinung do? Ta ihrünü hütsüta müthsa. Ta, Khrista nengdang Yuse Atsa langla tu müthsungkyangsohnung ihrünü lüpcho rangchore.

¹³ Amübükuh la nguchirütinü amübükuh lanü tsuyongnung ngure, ko bholu chah dikehrünü kangmübü lanü arüh nohlüm ngure.

¹⁴ Hütsü kyo, sürünü Yuse Atsa thsingyuro hütsü lanü akang linung ngubaepü Abüdongba-nü yuzeng jüko.

¹⁵ Ta hütsüta müthsa, mahkhang I nengdang hütsütari ching thrahrü mah. Ih dinung athsalang adeng kangsohnung tenülü Ih sopehcho atsau.

¹⁶ Ihnü Yuse Atsa thsingyucho khyanglangnü Ih dinung tu mühle. Hi nguchinung I chah phungkehjü lile. Ihnü Yuse Atsa tsü müthsingyukhang, Ih ahohah!

¹⁷ Ihnü hi I lümyunü nguchire lang, Ihnü angang longdibae; ta hi I lümyunü mah, Tsingrangba-nü hiba nguchi hi I chah nyümkehjo lile.

¹⁸ Khang Ih tu angang nguro? Yuse Atsa dikehcho nengdang angang mükhyüpü, Yuse atsa thsingyunung tsü I nganglang atsa lile.

¹⁹ Ih nyüje, sü yurüsü mah; ta nyitsarü adrong noronung nengdang Ipu jangjang atümung yurü kangre.

²⁰ Jihudarü noronung Jihudarü te Ih Jihudarü kangcho; Ih yuzeng pohki mülinye arüh noronung yuzeng pohki lirü te Ih yuzeng pohki lirü roh-i kangcho.

²¹ Hütsü kyo, yangpirü noronung Jihudarü yuzeng mülirü te Ih yangpirü yola nguchide Ih yangpirü kangcho. Hütsünü Ihnü Tsingrangba yuzeng mübichirerü mah; Ih yuje Khrista yuzeng pohki lile.

²² Sumüzehrü noronung sumüzehrü yola Ih sumüzehrü kangcho. Khürü dusü khümchonung nengdangnü nyitsarü atümung te Ih atümung kangcho.

²³ Yuse Atsa khyanglangnü ko abi amüwa nohlüm ngunung nengdang Ihnü hiri apüm nguchire.

²⁴ Shangmülita la adrongnü nohlüm khyüre, ta arüh yola nyüh khüdu dunü jiyü ngure. Khang, jiyü tsü ngunungthsa shang.

²⁵ Pingbarü atümungnü abürü jangjang rahsehre. Arühnü changpehba kuthri nengdang nguchire, ta Ihsanü müchangba nengdang nguchire.

²⁶ Hütsünü Ihnü müchungkhüti dhingkeh shangre; ko Ihnü shingtarü kyo adeng la müshingre.

²⁷ Ta Ihnü bürüte thsingyuko khanglang, Ipu mükhyücholo pü, Ihnü Ifü rahseh hütsü yurü kangre.