1 KORINTRÜ 8 - AMÜSA BAIBEL (BSI)

Kyothri Khyang Mübücho Tsuyongnung Nengdang

¹ Ade, nührünü thrahba kyothri khyang mübücho tsuyongnung nengdangsü. Ihsa atümung “amüdheba lile.” Hitari amüdhe tsünü nyüh khüdu müthsehsohre; ta amüinü zisohre.

² Sünü lango müdhelepü lümro abinü müdhenung athsalang tu mümüdhe.

³ Ta sünü Tsingrangba müiro abinü abi müdhele.

⁴ Hütsüeko, kyothri khyang mübücho tsuyongba nengdang tsü: Kyothri khüdu tsü akang müliba lango mülih yarepü Ihsanü müdhele; ko Tsingrangba khüdu du lilepü Ihsanü müdhele.

⁵ Ninglangnye, limih lanye, “tsingrangti, ko abüdongrüti” adrong linye,

⁶ Ihsa nengdanglü Au Tsingrang khüdu du, sü lüpcho thribong ko sü nengdang Ihsa liro; ko Abüdongba khüdu du, hütsü Jisu Khrista, sü khu lüpcho thricho ko abi khu Ihsa lire.

⁷ Nyitsarü atümungnü hiba yuje tsü mümüdhe. Ta khürünü ade yingcheh kyothri nengdang du lümchonü arühnü hitari tsuyongde kyothri yoepü lümre; ko arüh lümlong sumüzehchonü hütsü khu arüh münyijüko pü lümre.

⁸ Ta, tsuyongbanü Tsingrangba te Ihsa achingkehta müzikehsohre; ko Ihsanü mütsunye tu mükohsha, mahkhang Ihsanü tsuchonü tu ajingcho mühle.

⁹ Ta hila nührü thsanyücho thsachonü yudsila sumüzehrü müthikehsohnung müzahng.

¹⁰ Adüzünü lümlong la sumüzehrü nyüh khüdunü nührü amüdherünü kyothri mübükuh la tsuyong ngude, hütsünü abi mii kyothri mübücho tsuyongba tsü tsusohnung müthsüchirü do?

¹¹ Hütsüta nührü amüdhenü sumüzehba jünirü, sü nengdang Khrista sücho abi changsohre.

¹² Hütsü roh-i nü jünirü nyüm ko arüh sumüzeh lümlong lerohpehjo amünyi shitpahde, nührünü Khrista nyüm amünyi shitpahre.

¹³ Hütsüeko, tsuyongnungnü I jünirü müthikehsohkhang, Ihnü I jünirü mümüthikehsohnung nengdang khodesü shuh mütsunung.