1 KORINTRÜ 7 - AMÜSA BAIBEL (BSI)

Kukangba Nengdang

¹ Ade, nührünü thrahba nengdangsü. Adhrerü khüdu kuh mükangpü licho atsau.

² Ta nahtrahnaxeng dirachonü, adhrerü müipi palu nitpürü ko khingkurü müipi palu niirü yohpüng.

³ Nührünü nitpürü khyang tu jünung athsalang ko nitpürünü niirü khyang tu jünung athsalang hütsü jütaang.

⁴ Nitpürü abükyü fü michah abüdong mah, ta anii tsü abüdongba; hütsü kyo anii apu fü michah abüdong mah, ta anitpü abüdongtpü.

⁵ Nührünü dangkhidangnangla khakhuchüjüchehnung shulüm amüngunü yutrümpü, akhikyah chah khu khüdunü khüdu tüdhsongli; ko abürü jangjang mürahsehcho khu Satan-nü müthsadsüsohnung thali shirütaang.

⁶ Hi yuzengnü mah, ta Ihnü mülajüre.

⁷ Ihnülü nührü atümung Ih kyosohnyüre; ta Tsingrangba-nü nyitsarü müipi khyang jiyü papa jüre.

⁸ Kuh-mükangrü ko chomirü te Ih kyo nehbi linung atsauepü yore.

⁹ Ta nührü akhyünyüba mürahsehchehkhang, kukang. Tunüo mükhyahseh linung tenü kukangcho tsü atsau.

¹⁰ Kuthrirü nengdang Ipunü mah, ta Abüdongba chahnü yuzeng khüdu lile: anitpünü anii tüpehjü;

¹¹ ta zakhang, abükyü müleng lieng mahkhang anii te kehtachiling; ko aniinü anitpü tüpehjü.

¹² Aparü te Ihnü yore (Abüdongba-nü mah): Khristan khüdu nitpü müyudsilarü likhang ko abükyünü abi te hita du linyükhang, abinü abükyü tütsisoh.

¹³ Ko khristanlarü khüdu müyudsirü khüdu kuh la xeng likhang ko apunü abükyü te hita du linyükhang, abükyünü abi tenü tüza.

¹⁴ Tunüo müyudsiba anii tsü abükyü khu müsachehjüre, ko müyudsilarü anitpü tsü anii khu müsachehjüre. Hütsüta müthsakhang, arüh tsuzarü tsü müyudsirü tsuzarü thsanung; ta hütsütachonü, arüh amüsae.

¹⁵ Ta müyudsiba khüdu tsünü yudsiba tenü zanyükhang, abi tsisohng. Hitarila tsü yudsiba anii mahkhang anitpü rah mühle. Tunüo Tsingrangba-nü Ihsa atbachi la linung dsicho.

¹⁶ Khristan nitpü, nühnü nü nii mükhümchonungepü khüta müdhero? Mahkhang Khristan anii, nühnü nü nitpü mükhümchonungepü khüta müdhero?

Tsingrangba-nü Dsicho roh-i Lieng

¹⁷ Nyitsarü müipi Abüdongba-nü abi khyang tu lümcho jücho ko Tsingrangba-nü abi dside licho roh-i mütozah lieng. Yuzeng hi Ihnü Lithro apüm la dore.

¹⁸ Nyüh khüdu abi dside müjüp-pehpü licho mah-o? Müjüp-pehcho amüdhethsa tsü pehnung tümüküp. Nyüh khüdu abi dside mümüjüp-pehpü licho mah-o? Abi mümüjüp-pehpü lisohng.

¹⁹ Tunüo nyüh khüdu müjüp-pehcho ko mümüjüp-pehcho tu mühle; ta Tsingrangba yuzeng bichicho chah du kehle.

²⁰ Nyitsarü müipi tu surola li abi dsicho hütsü roh-i du lieng.

²¹ Nüh ayurü thsa lide dsicho mah-o? Tumüthsa; ta nüh nyüje kangnung detingkhang, hütsü roh-i kang.

²² Tunüo ayurü sü Abüdongba-nü dsicho abi tsü Abüdongba nyüje nyitsarü lile; hütsü kyo nyüje nyitsarü sü Khrista-nü dsicho abi Khrista yurü.

²³ Tsingrangba-nü nührü alengnü lihko; hütsüeko nyitsarü ayurü tükang.

²⁴ Jünirüti, nyitsarü müipi tu surola li dsicho, hütsü roh-i du Tsingrangba te lieng.

Kumüthrirü ko Chomirü Nengdang

²⁵ Kumüthrirü nengdang nührünü thrahbasü: Abüdongba chahnü yuzeng mühle, ta Abüdongba yanglilüm khunü longlangchehba thsachonü Ihnü I lümcho yonung.

²⁶ Ade adhsangthsi hi lümdhingde, kumüthrirü tsü hütsü roh-i du licho atsauepü Ihnü lümre.

²⁷ Nüh nitpü lirü mah-o? Khang abükyü pehnung tümüküp. Nüh kumüthrierü mah-o? Khang kuh tüthri.

²⁸ Ta nühnü kuthrinye, amünyi shitpahrü mah; ko müxengerü khüdu xengnye, abükyünü amünyi shitpahrü mah. Ta kuthrirü nyümong mükhu chongcha mütohba la tsü Ihnü nührü müzüdusohnyüre.

²⁹ Jünirüti, Ihnü yoba tsü hi: bekhyah asheng mühle, ade tinü kuthrirüsü kumüthricho roh-i du lieng;

³⁰ sürü traro mülongrirü roh-i lieng; sürü münyüro mükünyangrü roh-i du lieng; sürü kangro arüh liba tsü arüh yo mahrü roh-i du lieng;

³¹ sürü limih kuthsi bichiro mübichirü roh-i du lieng. Tunüo limih hi anyahli mülinung.

³² Alümxü lanü nührü za lisohnyüre. Kumüthrirünü Abüdongba nguchi nengdang lümre tunüo abinü Abüdongba künyangsohnung müküpre.

³³ Ta kuthrirünü limih nguchi nengdang du lümre, tunüo abinü anitpü künyangsohnyüre;

³⁴ hütsüta abi anyülang tphahre. Amüxengrü mahkhang lazarünü Abüdongba nguchi nengdang lümre, tunüo abükyünü afü ko anbü anyüding müsachehnyüre; ta axengrünü limih nguchi nengdang du lümre, tunüo abükyünü anii künyangsohnyüre.

³⁵ Hi nührü tronyüchonü yore. Ihnü nührü yatinung müküprü mah. Ta yuje tsü athsalangnü nguchi ko tu müthsungkyangpü Abüdongba dikehsohnung khyanglangnü yore.

³⁶ Müxingta lipü kumüthrinung dhrongchehrü nengdang: adhreba tsünü lazatpü te tsü athsalangnü mübichi pü lümkhang ko abi amükhyahba tsü dirakhang, ko kuthribaepü lümkhang, arüh kuthrisohng. Hütsüla tu amülang mühle.

³⁷ Ta nyüh khüdu hütsü roh-i müthsapü apunü kumüthrinung lümkhung lümkhang, ko abinü apu akhyünyüba tsü rahsehchehkhang ko tu nguchinung hütsü dhrongchehkhang, abinü lazatpü tsü mükhyünye tsale.

³⁸ Hütsüeko, sü kukangro abinü tsa nguchire, ta sü kumükangro abinü alaa atsau nguchire.

³⁹ Axengcho khingkurü khüdu tsü anii akang li yingcheh abükyü rah lile; ta anii tsü sükhang, abükyünü lümcho yudsirü masü te xengnung kohle.

⁴⁰ Ta I lümcholü, abükyü müxengpü licho akünyangba thsanung. Ko Tsingrangba Nbü Ite lilepü lümre.