1 KORINTRÜ 6 - AMÜSA BAIBEL (BSI)

Ajünirü Nyüm Yukhacho

¹ Nührü yola nyüh khüdunü ajünirü nyüm yu likhang, Tsingrangba nyitsarünü khiyu tsü kihtasohnung müli müyudsirü yukharü yang wünung nührünü khüta müci mülahro?

² Tsingrangba nyitsarünü limih yukhanungepü nührünü mümüdherü do? Nührünü limih yukhanung thsakhang, khiyu aikyah kihtanung nührünü mükohnung mah-o?

³ Ihsanü ninglang riwürüti yukhanungepü nührünü mümüdherü do? Khang, hiba limih nengdanglü khüta ajengpa.

⁴ Hitari khiyu chürode, Lithro la müzehrü khüdu khyang khasohnung arüh nowünung do?

⁵ Shahng! Khristan ajünirü kahla khiyu kihtachehnungthsa nührü yola khürülü linung.

⁶ Ta Khristan khüdunü ajünirü khüdu nyüm yukhaji lang würe, ko müyudsirü khyang yukhasohre!

⁷ Nührü yola yuji liba tsünü nührü amükoh ngucho ngusohre. Nührü uthring amülang thsaang. Nührü uthring kengchosohng.

⁸ Ta nührübürünü khristan jünirü te mii mülangjütare, ko kengchotare!

⁹ Amümüsarünü Tsingrangba yanglih müngunungepü nührünü müdhele. Abürü jangjang khürahyohchü; mabomashi, kyothri mübürü, nahtrahnaxengrü, ayahchah mükehcho mükhongba,

¹⁰ aführü, müruthsarü, mücharü, müthsamünyürü, ko akengchorü, hitari sünüsü Tsingrangba yanglih müngunung.

¹¹ Hütsütari khürü nührü yola licho. Ta Abüdongba Jisu Khrista nengla ko Ihsa Tsingrang Anbü la nührü thsütohko; nührü müsachehko; ko nührü langjüko.

Nührü Fü Tsingrangba Ahechi Nengdang Bichieng

¹² Khürünü yonung, “I nengdang lüpcho athsalang.” Ta nü nengdang apüm tsü atsa mah. I nengdang lüpcho athsalange; ta tu khyangsü Ih ayurü mükangsohnung.

¹³ “Tsuyongnung tsü ami nengdang, ko ami tsü tsuyongnung nengdang.” Ta Tsingrangba-nü anyüding changkasohnung. Afü tsü mabomashi nengdang mah, ta Abüdongba dikehnung nengdang; ko Abüdongba-nü afü nengdang chixire.

¹⁴ Tsingrangba-nü Abüdongba kanglisohcho, ko abi zii khu Ihsasü kanglisohnung.

¹⁵ Nührü fü Khrista lohlaepü mümüdherü do? Ihnü Khrista lohla khyücheh nahtrahnaxengrü lohla kangsohnung do? Khodesü mah!

¹⁶ Mahkhang sünü nahtrahnaxenglarü te mükhongnang, abükyü te shutsa khüdu kangrepü mümüdherü do? Amüsa yunü tsidsa yore, “Anyüh tsü shutsa khüdu du kangnung.”

¹⁷ Ta sü Abüdongba te chingkehtaro, abi te anbü la khüdu kangre.

¹⁸ Nahtrahnaxeng lanü za lieng. Amünyi shitpahba apanü apu fü müthahpüre; ta nahtrahnaxengba nyitsarünü apu fü nyüm amünyi bichire.

¹⁹ Nührü fü tsü, Tsingrangba-nü jüba nührü chah liba Anbü Amüsa amübükuh lilepü nührünü mümüdherü do? Nührü abürü yo mah ta Tsingrangba yo;

²⁰ abinü nührü alengnü lihcho. Hütsüeko nührü fü Tsingrangba ahechi nengdang bichieng.