1 KORINTRÜ 2 - AMÜSA BAIBEL (BSI)

Khala Chah Hamkehba Khrista Yusi

¹ Jünirüti, Ih nührü yang ro Tsingrangba yu thsingyude Ihnü yu amüling ko lümlong asoh mübichi.

² Tunüo Ih nührü yola Jisu Khrista ko abi khala chah hamkehcho chah khu tusü mülümchehnung dhrongchehcho.

³ Hütsünü sumüzeh ko adrüchonü dhridhriseh Ih nührü yang rocho,

⁴ ko Ihnü nyitsarü lümlong asithsa yunü I yusi müdo, ta Tsingrangba Anbü zii la docho.

⁵ Hütsükhang nührü yudsi tsü nyitsarü lümlong la mah, ta Tsingrangba zii la müdongkeh lile.

Tsingrangba Lümlong

⁶ Ta anbü la lümjing lirüti te Ihnü lümlong changtare. Ta limih lümlong mahkhang chang tsiba limih yangthsarü lümlong la mah.

⁷ Tsingrangba arang lümlong khüiba amüi tsurü tenü rang yohpüro, ta limih müthridenü Ihsa ahechi nengdang abinü throchehpehcho; hiba lümlong tsü Ihnü sobhore.

⁸ Limih yangthsarü sünüsü hiba lümlong tsü mümüdhe. Arühnü hi müdherelang, arühnü ahechi Abüdongba mühamkehnung.

⁹ Ta, Amüsa yunü yocho kyo: “Sünüsü müngucho mahkhang müyuchicho, sünüsü tikehnung mülümcho, hütsü Tsingrangba-nü abi müirüti shulüm rungnümcho.”

¹⁰ Ta Ihsa te Tsingrangba-nü abi anbü khu rang liba tsü mishacho. Anbü tsünü Tsingrangba alümcho asoh mii yangchire.

¹¹ Nyitsarü khüdu apu nbü dunü apu nengdang atümung müdhere; hütsü kyo, Tsingrangba Nbü dunü Tsingrangba nengdang apüm müdhere.

¹² Ihsanü hiba limih nbü mükhyücho; ta Tsingrangba-nü Ihsa khyang jücho apüm müdhenung nengdang, Ihsanü Tsingrangba-nü müthehcho Anbü khyüchocho.

¹³ Hütsünü, nyitsarü lümlongnü docho yunü Ihsanü müchore, ta anbü lirü te Ihrünü anbü yuje Anbünü docho roh-i chore.

¹⁴ Anbü müliba nyitsarünü Tsingrangba jiyü khyüchonung mükoh. Hütsütari nyitsarünü arüh nyichehnung mükoh, abi nengdang arüh tsü amüsithsa lile, tunüo arüh amii tsü anbü aichi yukhare.

¹⁵ Anbü liba nyitsarünü lüpcho yukhare, ta abi yu sünüsü mükhachehre.

¹⁶ Amüsa yunü yocho roh-i: “Sünü Abüdongba lasih müdhero? Sünü abi thülachehro?” Ta Ihsalü, Khrista lasih lile.