1 KORINTRÜ 16 - AMÜSA BAIBEL (BSI)

Ajünirüti shulüm Amübü

¹ Ade, yudsirüti shulüm amübü dhrinung nührünü thrahba nengdangsü: Ihnü Galatia la lithroti te yocho kyo, nührünüsü nguching.

² Ih rode thsi müdhrinungthsa, mübünyü mükhu palu shehcho aichi nührü atümungnü pathsa khyübülung yohpüng.

³ Ko Ih rode, nührünü adekhengepü yocherü, Ihnü arüh khyang vathrah jo, nührü amübü Jerusalem lang mühehnung.

⁴ Ih wünung dhsütahkhang, arüh yola wünung kohle.

Paul Lümchung

⁵ Ih Macedonia bongkhangpü nührü yang ronung, tunüo Ih Macedonia khu wünung lile.

⁶ Alümchonü, nührü yola azachah tsingkangzah linung kohle, hütsüpü Ih khüdederü wünang nührünü tronung thsaang.

⁷ Ihnü nührü te lahkhumükhyangthsa dulü müshirütanyüre; Abüdongba-nü mülakhang, nührü yola rüm-o mungnung lümle.

⁸ Dhünyang nyümong thsüti yingcheh Ih Efesia hila mungnung.

⁹ Anyümrü khütang linye, amülah nguchichehnungthsa hila lang müza lile.

¹⁰ Khode Timoti ronang, nührü yola lümkha müdongsohng, tunüo I roh-i, abinü Abüdongba nengdang nguchire.

¹¹ Sünüsü abi tünyüm, ta abi I yanglang rochehnungthsa, atbachi la abi müyangyohchüng; tunüo abi jünirüti zeh ronung Ihnü yingre.

¹² Ade, jünirü Apollos nengdang: Ihnü adrongpi abi te ajünirü aparüsü nüpü nührü xodhingnung thsüchinye, ade yingcheh abi lüm mükhüpcheh. Ta bekhyah tsade abisü ronung.

Aza Yu

¹³ Xengxeng, yudsi la drengdreng yaang, lasih zieng ko rezehng.

¹⁴ Nührü nguchi apüm amüila nguching.

¹⁵ Jünirüti, nührünü Stefanas ko abi kukhi müdhele; arüh Akaia la akhudiba yudsirü, ko arühnü yudsirü nengdang arühbürü jangjang khakhuchüjücho.

¹⁶ Hitari langnüba ko arüh te nguchirü iithsanung Ihnü nührü te thsüchire.

¹⁷ Stefanas, Fortunatus, ko Agaikus-rü rocho nengdang Ih künyangre; tunüo arühnü nührü mülihcho,

¹⁸ ko arühnü nührü thsüchicho kyo, Ihsü thsüchiko. Hiri roh-i nyitsarü müdhenung adhsütah.

¹⁹ Asia lih la liba lithrotinü nührü yang salüm müdhesohre; Aquila ko Priscila ko arüh kuh la shibülungba lithronü nührü te salüm müdhesohre.

²⁰ Hila lirü ajünirü atümungnü salüm müdhesohre. Nührü khüdunü khüdu khyang salüm jütaang.

²¹ Ipu khehnü hi thrahre: Paul chahnü salüm na.

²² Sünü Abüdongba mümüiro abi chokehchola thsaang. Marana tha Ihsa Abüdongba, rung!

²³ Abüdongba Jisu Khrista achomang nührü te lieng.

²⁴ Khrista Jisu la I amüi nührü atümung te lieng.