1 KORINTRÜ 15 - AMÜSA BAIBEL (BSI)

Khrista Kanglicho

¹ Jünirüti, Ihnü nührü te thsingyuba Yuse Atsa, khüi nührünü khyüchocho ko tu la nührü yaro, hütsü nengdang ade Ihnü nührü te kepüchinyüre.

² Ihnü nührü te thsingyuchoba Yuse Atsa tsü nührünü drengdreng marekhang nührü khümcho lile; mahkhang nührünü amükhyu la yudsiko.

³ Apüm te ayingba Ihnü tu khyüchocho, hütsü nührü te yocho: Amüsa yula thrah licho kyo; Ihsa münyi nengdang Khrista sücho;

⁴ abi dhrürangcho ko nyümong asang lipü kanglicho;

⁵ hütsüpü abinü Peter te ko mono dhüreanyüh te chüro ngusohcho.

⁶ Hütsüpü abinü mono thsih münga mihlang te chüro ngusohcho, arüh adrongu ade yingcheh akang likhangle.

⁷ Hütsüpü Jakob, ko riwürü atümung te chüro ngusohcho.

⁸ Achangkathsa Ih, atphehchehcho za te chüro ngusohcho.

⁹ Tunüo Ih riwürü atümung tenü achangba. Ih riwürü pü dsinung mii müdekheng, tunüo Ihnü Tsingrangba Lithro dhsümthseko.

¹⁰ Ta Tsingrangba achomang khu Ih tu liro hütsü lile, ko abinü I khyang jüba achomang tsü amükang mükang. Hütsü mahpü, riwürü aparü tenü Ihnü alaa nguchicho, hütsü Ihnü mah, ta Ite liba Tsingrangba achomangnü nguchicho.

¹¹ Hütsünü, Ihnünye mahkhang arühnünye, ihrünü hütsü thsingyucho, ko nührünü yudsicho.

Ihsa Kangliroba

¹² Ade, ihrünü Khrista asücho lanü kanglichoepü thsingyukhang, asürü kangliba mülinungepü khüta nührü yola khürünü yoro?

¹³ Hütsü yuje thsakhang, adüzü Khrista kangchehli müro;

¹⁴ Khrista asücho lanü kangchehli mürokhang, ihrünü tu thsingyunung mühle, ko nührünü yudsinung tu mühle.

¹⁵ Hütsü te alaa, Tsingrangba nengdang ihrünü arahkheh chocho ngusohre, tunüo abinü Khrista kanglisohchoepü yoko, ta asürüti mükanglikang, abinü Khristasü mükanglisoh.

¹⁶ Tunüo asürü mükanglikhang Khristasü mükanglisoh.

¹⁷ Khrista mükanglikhang, nührü yudsi arahkheh, ko ade yingcheh amünyi la chang lile.

¹⁸ Hütsünü adesü sürü Khrista la sücho arüh tsüsü changkopü ngusohre.

¹⁹ Khrista chah Ihsa alongdi tsü hiba akang nengdang du thsakhang, hiba limih la atümung tenü Ihsa amüinung.

²⁰ Ta yujenü, yüpseh lirüti kanglinung amüdhethsa, Khrista asücho lanü kangliko.

²¹ Tunüo nyüh khüdu khu asüba rocho kyo, asücho lanü kangliba tsüsü nyüh khüdu khu rocho.

²² Adam khu nyitsarü atümung sücho kyo, Khrista khu nyitsarü atümung kanglinung.

²³ Ta nyitsarü müipi achungnü kanglinung: akhudi Khrista, hütsüpü abi rode abi yoti.

²⁴ Hütsüpü achangka tsü ronung; ko Khrista-nü anbü yangthsarüti, taseti ko ziiti apüm kohpü Au Tsingrang khyang yanglih tsü khakhuchüjünung.

²⁵ Tunüo Tsingrangba-nü abi rorüti apüm kohpü abi jing pohki müyohpüde Khrista-nü yangthsanung.

²⁶ Achangkathsa kohchehnung arorüh tsü asüba.

²⁷ Amüsa yunü yore, “Tsingrangba-nü apüm abi jing pohki yohpüko.” Hi tsidsa lile, “Apüm” pü yoba la tsü Tsingrangba apulü müzehpü apüm Khrista pohki yohpo lile.

²⁸ Ta khode apüm Khrista yangthsaba pohki yohpünang, hütsüde Atsudhre apu jangjang Tsingrangba pohki yohpünung, sünü apüm abi pohki yohpücho; ko Tsingrangba-nü lüpcho michah yangthsanung.

²⁹ Ade, asürü nengdang baptirü tsü khüta? Asürü tsü mükanglikhang, tuepü arühnü asürü nengdang baptiro?

³⁰ Tuepü ihrü rehtseh mükhu dhsürüla du liro?

³¹ Jünirüti, Ih nyümong müthe asü mütohre! Ihnü Ihsa Abüdongba Jisu Khrista la nührü nengdang dichonü hi yochehre.

³² Shutsa lahpinü choekhang, Ihnü Efesia la “rangmü kanglungrü” te ruhtacho, hütsünü Ih tu jingchocho? Asürü tsü mükanglikhang, “Ihsanü tsunung ko yongnung, tunüo atulü Ihsa sopehnung.”

³³ Nührü tükiyohchüsoh. “Shangrü amütsanü saying atsa thsangnyangjüre.”

³⁴ Nührü lümlong amüchonglang thalieng ko adelü amünyi tübichi. Ihnü nührü shahsohnung yore, nührü yola khürünü Tsingrangba mümüdhe.

Kanglirocho Fü

³⁵ Khürünü yonung, “Asürüti khüta kanglinung? Arüh fü tu kyonung?”

³⁶ Nührü amüsithsarü! Nühnü shuba majüh tsü müsühkhang müchire.

³⁷ Nühnü shuba tsü adong khüdu mah, ta majüh khüdu du; fürü apüm khüdu mahkhang apa majüh khüdu du lile.

³⁸ Tsingrangba-nü apu lümyunü hütsüba majüh khyang adong jüre; abinü majüh müipi khyang aphishu adong jüre.

³⁹ Shutsa apüm mükyota, ta nyitsarü shutsa lango, kanglungrü shutsa pa, uza shutsa pa, ko nguh shutsa pa lile.

⁴⁰ Adesü ninglangrü fü ko alih la lirü fü lile; ninglangrü fü atsah atsa tsü alih la lirü fü atsah atsa tenü pa lile.

⁴¹ Nyü ahechi, chonu ahechi, chenghi ahechi papa lile; ko chenghiti yolasü ahechi papa lile.

⁴² Asürü kanglidesü hütsü kyo linung. Shutsa dhrürangba tsü achangpehba; ko kangliroba tsü amüsüba.

⁴³ Tsah mütsa ko sumüzeh la dhrürangcho, tsah atsa ko rezeh la kanglinung.

⁴⁴ Shutsa fü dhrürangcho, anbü fü la kanglinung. Shutsa fü likhang, anbü füsü lile.

⁴⁵ Tunüo amüsa yunü yore, “Akhudiba nyitsarü Adam tsü akang liba khüdu thricho” ta achangkaba Adam tsü akang jürü Anbü kangcho.

⁴⁶ Akhudi roba tsü anbü mah ta shutsa, hütsüpü du anbü rore.

⁴⁷ Akhudiba Adam tsü alihnü thricho, alih lanü rocho; ta anyüuba Adam tsü ninglangnü rocho.

⁴⁸ Limih nyitsarü tsü alihnü thriba tsü kyonung; ko ninglangrü tsü ninglangnü roba tsü kyonung.

⁴⁹ Alihnü külüpcho nyitsarü kyosangcho roh-i Ihsa ninglangrü nyitsarü kyonung.

⁵⁰ Jünirüti, Ihnü yonyüba tsü: shuh ko ashühnü Tsingrangba yanglih ngunung mükoh, ko asübanü amüsüba ngunung mükoh.

⁵¹ Dhing! Ihnü nührü te arangyu khüdu yonung. Ihsa müsünung, ta khode achangka rühti mehnang, dhrongyengnü, nah mülülüp chahnü Ihsa atümung mülichipehnung.

⁵² Khode rühti mehnang, khodesü müsünungthsa asürü kangli ronung ko Ihsa atümung mülichipehnung.

⁵³ Tunüo hiba achangba fü amüchangba la mülichipehnung; ko hiba asüba fü amüsüba fü la mülichinung.

⁵⁴ Khode hi tikehnang, achangba tsü amüchangba la, amüsüba kang mülichinang, amüsa yunü: “Asüba tsü changpehko; akohba tsü jengpehko” ko yoba tsü tikehnung!

⁵⁵ “O asüba, nüh akohba khüde liro? O asüba, nü münyüh khüde liro?”

⁵⁶ Asüba münyüh tsü amünyi ko amünyi zii tsü yuzeng.

⁵⁷ Ta Abüdongba Jisu Khrista khu Ihsa khyang akohba jübong Tsingrangba khyang anengse jüng!

⁵⁸ Hütsüeko jünirüti, drengdreng müshehchipü yaang. Abüdongba nguchi nengdang lede müpah-müdeng, tunüo Abüdongba dikehba la nührü nguchi khodesü amükang müthsanung.