1 KORINTRÜ 14 - AMÜSA BAIBEL (BSI)

Anbü Jiyü Alaa Nengdang

¹ Khang, nührünü amüi yangching. Anbü jiyüti nengdang mürung, ta thsingyunung alaa mürung.

² Yu pa la choba tsü nyitsarü te mah, ta Tsingrangba te chotare, tunüo sünüsü hütsü mühnyichehre. Abinü anbü ziinü rang liba yuje nengdang chore.

³ Ta sünü thsingyuro abinü nyitsarü te atronung, athsüchiba ko atbachi yu yore.

⁴ Sünü yu pa la choro abinü apu du trore, ta sünü thsingyuro, abinü lithro shünü trore.

⁵ Ihnü nührü atümung yu pa la chosohnyüre; ta alaa thsingyusohnyüre. Lithro shünü trochehnungthsa yu thsamülarü mülikhang, yu pa la chocho tenü thsingyuba tsü atsau.

⁶ Hütsünü, jünirüti, Ih nührü yanglang yu pa la cho rokhang, nührü nengdang tu ajingcho-o? Ihnü Tsingrangba chahnü mishacho khürü, amüdheba khürü, choyoh khürü mahkhang adoba khürü mühirokhang, tu ajingcho mühle.

⁷ Adüzünü, akang müliba khithsaba kohro honglilah mahkhang ikhong roh-i, yuva tsidsa müchürokhang khütapü arühnü thsaba khi tsü müdhenung?

⁸ Rühti mehba tsünü adsiba yuva tsü tsidsa mümehkhang, sünü rothsa wünung küdangnung?

⁹ Hütsü kyo, nührünü yu pa la choba tsü tsidsa müchokhang sünü nyichehnung. Nührü yu tsü nyübongla changkapehnung.

¹⁰ Limih la yu khütang lile, ta adüzü mülipü tu yu mühle.

¹¹ Ta achoba yu tsü Ihnü adüzü mühnyichehkhang, hütsü choba tsü Ih, ko arüh nengdang yangpirü thsanung.

¹² Nührünü Anbü jiyü mükhyahreko, khüinü Lithro külüpkehnung hütsü apüm tenü alaa müküpm.

¹³ Hütsüeko, yu pa la chorünü, abinü choba tsü thsamüla yochehnungba zii ching dangkhidangnang.

¹⁴ Tunüo Ihnü yu pa lanü dangkhidangnangkhang, I nbüsü dangkhidangnangre, ta I lümlonglü müjingcho.

¹⁵ Khang, Ihnü tu nguchinung? Ihnü anbünü dangkhidangnangnung, ta Ihnü lasih lasü dangkhidangnangnung; Ihnü I nbü la khi thsanung, ta I lasih lasü thsanung.

¹⁶ Nühnü anbü la du Tsingrangba khyang anengse jükhang, ashibülung la zehrünü khüta anengse jübanü dangkhidangnangla “Amen” pü yonung? Nühnü choba tsü abinü tu mümüdhenung.

¹⁷ Nü dangkhidangnang tsü dee tsanye, aparülü tu müjingcho.

¹⁸ Nührü atümung tenü yu pa la Ihnü alaa chocho nengdang Tsingrangba sere.

¹⁹ Ta Lithro shibülung lalü Ihnü yutse hajar dhüre yu pa la chocho tenü aparü te donung nengdang nyichehnungthsa yutse münga du chonung.

²⁰ Jünirüti, akhungarü roh-i tülüm, amütsa lahpi akhungarü thsaang, ta nüh lümlong la lümjing.

²¹ Amüsa yula hi thrah lile: “Yu pa la chorü nyitsarü khu Ihnü I nyitsarü te chotanung pü Abüdongba-nü yore. Ihnü yangpirü khu chotanung, ta I nyitsarünü I yocho mühnyinung.”

²² Hütsüeko, yu pa la choba tsü yudsirü nengdang mah, ta müyudsirü nengdang lile; ta choyohba tsü müyudsirü nengdang mah, ta yudsirü nengdang lile.

²³ Akhang, lithro shünü shibülung yu pa la chonung dikehkhang, ko hütsüde müyurü ko müyudsirü rokhang, nührü mükyanglepü müyonung do?

²⁴ Ta atümungnü choyoh yade, müyurü ko müyudsirü khürü zürokhang, abinü hütsü yuchi alasih thsamülanung.

²⁵ Abi lasih la rang licho apüm mishanung, ko mükhukeh mülang nyengcho yonung, “Tsingrangba hila nührü yola yuje lile.”

Lithro la Achunglangnü Nguchiba

²⁶ Jünirüti, Ihnü yoba tsü hi. Nührünü mübünung shibülungde nyüh khüdunü khi, khüdunü adoba, khüdunü mishanung, khüdunü yu pa la chonung, ko aparü khüdunü yu tsü thsamüla nünung. Hiri apüm tsü Lithro tronung nengdang du nguching.

²⁷ Khürünü yu pa la chonung thsakhang, nyüh anyüh mahkhang adrongubanü nyüh asang khyang mülita chosohng, ko nyüh khüdu khyang yu tsü thsamülasohng.

²⁸ Ta yu thsamülarü mülikhang, yu pa la chorü tsü sahmüthsa lisohng, ko apu te ko Tsingrangba te du chotasohng.

²⁹ Ko choyohrü nyüh anyüh mahkhang asang khyang chosohng, ko aparü tsü nyieng.

³⁰ Ashibülung la khürü yang yusi rokhang, choyohba tsü zahng.

³¹ Atümung nyichonung ko thsüchinung shulüm nührü apümnü mülita thsingyung.

³² Choyohba anbü tsü achoba apunü rahsehbae.

³³ Tsingrangba-nü yubejarong mah, ta müjang ko tbachi lisohnyüre. Tsingrangba Lithro apüm la licho kyo,

³⁴ ashibülung la khingkurünü sahmüthsa püm. Jihudarü yuzengnü yocho kyo, arüh chonung mümülare, arüh atrotarü du thsaang.

³⁵ Arühnü lango müdhenyükhang, palu kuh la niirü te tsingdhing. Lithro ashibülung la khingkurünü chonung tsü ashah lile.

³⁶ Mahkhang Tsingrangba yu nührü chahnü rocho do? Mahkhang nührü yanglang du hütsü rocho do?

³⁷ Nührü yola khürünü azikehrü mahkhang Anbü jiyü kehlepü lümkhang, Ihnü nührü yang tu thrahro, hütsü Abüdongba yuzengepü abinü nyichehng.

³⁸ Ta abinü mühnyikhang, abi tükhichi.

³⁹ Hütsüeko, jünirüti, thsingyunung dee mürung, ta yu pa la choba tüyati.

⁴⁰ Lüpcho athsalangnü ko achunglangnü nguching.