1 KORINTRÜ 13 - AMÜSA BAIBEL (BSI)

Amüi

¹ Ihnü nyitsarü ko ninglang riwürü yunü mii chonung kohnye, ta amüi mülikhang, Ihnü choba tsü amüpchiba ikhong kyole.

² Ih choyohnung jiyü, amüdhe apüm ko rang liba apüm nyichehnung; ko azong dhipehnungthsa yudsi linye; ta amüi mülikhang, Ih tu mah.

³ Ihnü I licho apüm jünye, ko Ipu fü mii tahpehnungthsa khakhuchüjünye, ta amüi mülikhang, Ih tu müjingcho.

⁴ Amüinü rangchore ko chomangre; amüinü nah mümohre, mümüthsehre, hong müzire ko tüzümükhüm müthsare.

⁵ Amüinü bürü mütsa müchore, mahkhang abürü nengdang tu mülümre mahkhang zii müchürore; amüinü amütsa mülümkehre,

⁶ amüinü amünyi la mükünyangre, ta yuje la künyangre.

⁷ Amüinü sumüzahre, apüm yudsire, apüm longdire, apüm rangchore.

⁸ Amüi tsü achangka mühle. Choyohba tsü khu tsinung; yu pa la choba tsü zahnung, amüdhe tsü khu tsinung.

⁹ Tunüo Ihsa amüdhe tsü amüpisa, ko Ihsa choyohba tsü amüjeng;

¹⁰ ta khode apisaba ronang, amüpisaba tsü khu tsinung.

¹¹ Khode Ih azarü thsacho, azarü kyo chocho, azarü roh-i lümcho, ko lümdhingcho; ta adelü Ih azirü kangchonü, Ihnü azarü yangthsa pehko.

¹² Ade Ihsanü tsahrising la roh-i rümrüm ngure; ta hütsüde romih e romihrü ngutanung. Ihnü ade changsho du müdhere; hütsüde Ihnü nyicheh licho roh-i ajeng nyichehnung.

¹³ Hütsünü yudsi, alongdi ko amüi; hiri asang lede lile; ta hiri yola amüi adiuba.