1 KORINTRÜ 12 - AMÜSA BAIBEL (BSI)

Anbü Amüsa Chahnü Jiyü

¹ Ade, nührünü thrahba Anbü Amüsa chahnü jiyü nengdangsü. Jünirüti, arüh nengdang yuje tsü Ihnü nührü khyang müdhesohnyüre.

² Nührü müyudsiede, akang müliba kyothri yanglang nührü nüchicho nührünü müdhele.

³ Tsingrangba Nbünü nüchirü sünüsü, “Jisu chokehcholaang” pü müyonung ko Anbü Amüsanü münüchikhang sünüsü, “Jisu tsü Abüdongbaepü” müyonungepü Ihnü nührü khyang müdhesohnyüre.

⁴ Anbü jiyü lang papa, ta Anbü khüdu dunü jüre.

⁵ Dikehba lang papa, ta Abüdongba khüdu du dikehre.

⁶ Dikehba akohnung lang papa lile, ta Tsingrang khüdu dunü nyitsarü müipi khyang nguchi papa nengdang akohnung jüre.

⁷ Nyitsarü müipi chah atümung tsanung nengdang langkhüru la anbü mishasohre.

⁸ Nyüh khüdu khyang anbü khu lümlong, ko aparü khüdu khyang hütsüba anbü tsünü amüdheba jüre.

⁹ Nyüh khüdu khyang anbü khüdu khu yudsi, aparü khüdu khyang akyangnung zii jüre.

¹⁰ Nyüh khüdu khyang thsayahiya nguchinung; khüdu khyang thsingyunung; khüdu khyang anbüti changcheh yochehba jiyü. Khüdu khyang yu pa la chonung ko khüdu khyang hütsü thsamüla yonung jüre.

¹¹ Ta hi anbü khüdu du tsünü apu lümchonü nyitsarü müipi khyang jiyü papa jüre.

Lohla Adrong Zehba Füpüm Khüdu

¹² Khrista tsü lohla adrong zehba füpüm khüdu kyo lile; hütsü lohla adrongnü kang linye füpüm khüdu du.

¹³ Hütsü kyo, Ihsa atümung, Jihudarü thsanye, yangpirü thsanye, ayurü thsanye, nyüje thsanye, Anbü khüdu du tsünü füpüm khüdula baptijücho, ko Ihsa atümung khyang Anbü khüdu lanü tihcho.

¹⁴ Tunüo füpüm tsü lohla khüdu dunü müthri, ta adrongnü kang lile.

¹⁵ Ajingnü, “Ih akheh mah, hütsüeko Ih afü la müzeh pü yokhang” hütsü yochonü abi afü la müzehpü mühle.

¹⁶ Ko nangkunü, “Ih anahtse mah, Ih afü la müzeh pü yokhang” hütsü yochonü abi afü la müzeh pü mühle.

¹⁷ Füpüm shünü nahtse thsakhang, tunü yuchinung? Ko nangku du thsakhang, tunü xümnung?

¹⁸ Ta hiroh-i tsü, Tsingrangba-nü abinü khyünyücho roh-i afü la lohla papa yohpücho.

¹⁹ Apüm tsü lohla khüdu du thsakhang, afü mülinung!

²⁰ Hütsü roh-i, lohla adrong ta afü khüdu du.

²¹ Hütsüeko, nahtsenü kheh te, “Nüh müdhsütah” pü müyocheh. Mahkhang thahnü ajing te, “Nüh müdhsütah” pü müyocheh.

²² Hütsü mahpü, afü la re amüzeh-u lohla tsü müzehpü Ihsanü tu münguchicheh;

²³ ko lohlati khüiri Ihsanü müdekhing pü lümro hütsüri tsü alaa xükümre; ko lohla atsah amütsauba tsü alaa rungnümre,

²⁴ ta lohla atsah atsa shulüm hütsü adhsütah mühle. Tsingrangba-nü müdekhingba lohlati khyang alaa jengrengjo bichisohnung afü la müjang thricho.

²⁵ Hütsünü afü la tu achangnah mühle, ta lohlati papanü khüdunü khüdu shulüm lümre.

²⁶ Afü la lohla khüdu tohdhsakhang, apa lohlati apüm tohdhsare; lohla khüdu hechikhang, hütsüba akünyang tsü apümnü changtare.

²⁷ Nührü atümung Khrista fü, ko nührü müipi hütsüla lohla lile.

²⁸ Tsingrangba-nü Lithro la akhudibala riwürü, anyüula azikehrü, asangubala adorü, hütsüpü thsayahiya nguchirü, akyangjürü, atrorü, anüchirü, ko yu papa la chonung jehjücho.

²⁹ Arüh atümung riwürü, azikehrü mahkhang adorü mah. Nyitsarü mükhu thsayahiya nguchinung

³⁰ mahkhang akyangnung, mahkhang yu papa la chonung mahkhang hütsü adüzü changnah yonung zii mühle.

³¹ Hütsükhang, jiyü ayingba nengdang nührü lasih jüng. Ta Ihnü nührü te lang alaa atsauba khüdu ngusohnung.