1 KORINTRÜ 11 - AMÜSA BAIBEL (BSI)

¹ Ihnü Khrista saying iithsacho kyo, nührünü I saying dhingchoung.

Ashibülung la Ku Müshücho

² Ihnü nührü nengsere, tunüo nührünü lede Ih lümchehre ko Ihnü nührü te docho apüm bichire.

³ Ta nyitsarü atümung michah Khrista tsü athah, anii tsü anitpü michah athah, ko Tsingrangba tsü Khrista michah athah-epü nührü te nyichehsohnyüre.

⁴ Hütsünü adhrerü sünü ashibülung la dangkhidangnangde mahkhang yu chode ku müshünang, Khrista mühechijüre.

⁵ Khingkurü sünü ashibülung la ku mümüshüpü dangkhidangnang mahkhang yu chonang, abükyünü anii mühechijüre; hütsü thah hehpehcho te tu papa mühle.

⁶ Khingkurü khüdunü athah mümüshükhang, abükyü thah hehpehsohng. Ta khingkurü nengdang athah hehpehnung tsü ashah thsakhang, abükyü ku müshüsohng.

⁷ Adhrerü khüdu ku müshünung müdhsütah, tunüo abi tsü Tsingrangba thrizi ko ahechi lile. Ta khingkurü tsü adhrerü ahechi lile.

⁸ Tunüo adhrerü tsü khingkurü chahnü mah, ta khingkurü tsü adhrerü chahnü thricho.

⁹ Mahkhang adhrerü tsü khingkurü khyanglangnü mah, ta khingkurü tsü adhrerü khyanglangnü thricho.

¹⁰ Ninglang riwürü nengdangnü khingkurünü ku müshüng.

¹¹ Ta, Abüdongba la, khingkurü tsü adhrerü müzehpü apisa mah, mahkhang adhrerü tsü khingkurü müzehpü apisa mah.

¹² Tunüo khingkurü tsü adhrerü khu thrichonü, hütsü kyo adhrerü tsü khingkurü khu surore; ko lüpcho Tsingrangba khu lisohre.

¹³ Khingkurünü ashibülung la ku mümüshüpü dangkhidangnangnung athsalanga mahro nührü jangjang thsadsüng.

¹⁴ Tunüo, ayahnü adhrerünü kuva asheng viba tsü apu jowüsohre,

¹⁵ ta khingkurülü kuva asheng viba tsü alaa tsahtsasohre. Tunüo, abükyü kuva asheng tsü yangtisohnung nengdang jücho.

¹⁶ Ta khürünü hütsü nengdang ritakhang, Ihnü yonungnü, Ihrününye, mahkhang lithronünye ashibülung la nanathsaba apa tu mühle.

Abüdongba Thsüti

¹⁷ Ta hiba athülaba la Ihnü nührü neng müsere, tunüo nührü shibülungba tsü khüsha amütsauba nengdang lile.

¹⁸ Akhudibala, nührü mülung la achangnah lilepü yuchire ko hütsü Ihnü thrilü yudsire.

¹⁹ (Yuje chorü khohchehnung shulüm nührü yola changnah liba.)

²⁰ Nührü müjang shibülungpü tsuba tsü Abüdongba thsüti mah.

²¹ Tunüo, nührünü tsude, nyitsarü müipinü palu tsangdhi tsure, hütsünü khürü müchade khürülü yangsehre.

²² Nührü tsuyongnung kuh mülirü mah-o? Mahkhang nührünü Tsingrangba Lithro müthsamünyü ko ailümrü ashah khyüsohnyürü mah-o? Hi nengdang nührü te tu yosohnyüro? Nührü sesohnyürü mah-o? Ihnü hi nengdang nührü müsenung!

²³ Tunüo nührü te tu docho hütsü Ihnü Abüdongba chahnü khyüchocho: Abüdongba Jisu-nü abi kihyochüba romang, hümdhse khüdu khyücho,

²⁴ Tsingrangba khyang anengse jücho, ko hütsü chenahpü yocho, “Hiba hi nührü shulüm Ifü lile. Ih lümchehnungthsa hi bichieng.”

²⁵ Hütsü kyo, thsüti tsupü abinü Shingsü khyüpü yocho, “Hiba shing I shüh la asi azengtacho lile. Khodederü nührünü hi yongnang, Ih lümchehnungthsa bichieng.”

²⁶ Tunüo nührünü khüdopi hiba hümdhse tsunang ko shing hi yongnang, Abüdongba sücho abi müro yingcheh seyohjüre.

²⁷ Hütsüeko, sünü Abüdongba mühechisohnü hümdhse tsunang ko abi shing yongnang, Abüdongba fü ko shuh nyüm amülanglang linung.

²⁸ Hütsüeko, nyitsarü müipinü akhu abürü düzodhing, hütsüpü du hümdhse tsü tsung ko shing tsü yong.

²⁹ Tunüo abinü Abüdongba fü nengdang mühnyichehpü hümdhse tsü tsukhang ko shing tsü yongkhang, abinü abürü chah hütsü tsuyongnü yukhaba hirore.

³⁰ Hütsü khu nührü adrong füdhsare ko sumüzehre ko khürü süko.

³¹ Ta Ihsanü Ihsabürü akhudiba thsadsükhang, Ihsa yukhaba pohki müronung.

³² Ta müyudsirü yola Ihsa zeh mümülangjünung nengdang Abüdongba-nü Ihsa yukhare ko khatare.

³³ Hütsüeko, ajünirüti, nührünü Abüdongba thsüti tsunung shibülungde, nührünü yingtaang.

³⁴ Nührü shibülungde Tsingrangba yukhaba nührü chah müronungthsa, khürü yangkhang, abinü kuh lanü tsung. Khiyu apa nengdang tsü, Ih rode Ihnü tsidsajünung.