1 KORINTRÜ 10 - AMÜSA BAIBEL (BSI)

Kyothri Nyüm Amüzahnung

¹ Jünirüti, Mosa khanglang wüba Ihsa jümürüti chah tu tikehcho hütsü nührü khyang lümchehsohnyüre. Nyükhi atsungtiba pohki arüh apüm khümcho amoh kihdi kehcho.

² Nyükhi la ko kihdi la arüh atümung Mosa mono kang bapticho.

³ Arüh atümungnü anbü tsuyongnung khüdu du tsucho, ko anbü kih khüdu du yongcho.

⁴ Arühnü arüh yola wünü anbü lung la tsünü yongcho; ko hütsüba lung tsü Khrista apu.

⁵ Hütsütanye arüh adronguba te Tsingrangba-nü mükünyangcho, hütsünü arüh me tsü lipilih la shupishuza pehcho.

⁶ Ade, arüh kyo, Ihsanü amütsa mümürunung shulüm hütsüri tsü Ihsa nengdang adüzü lile.

⁷ Arüh khürü kyo kyothri mümübünung. Amüsa yunü yocho kyo, “Nyitsarünü tsuyongnung nengdang pümcho ko arühnü nyiichinung shemüsucho.”

⁸ Arüh khürünü mabomashi nguchicho khu nyümong khüdunü nyüh hajar mükyüpü asang trümyoh sücho roh-i Ihsanü mübichinung.

⁹ Arüh khürünü Abüdongba thsadsüpü mürünü mükyüsehcho kyo Ihsanü Abüdongba müthsadsünung.

¹⁰ Arüh khürünü jümjümpü ko asüba riwürünü changsohcho kyo, Ihsanü müjümjümnung.

¹¹ Hiri apüm aparü nengdang adüzünung arüh chah tikehcho, ko hütsü Ihsa nengdang amüzahnung thrah yohpücho. Tunüo Ihsa achangkaba shang la lire.

¹² Sünü drengdreng yarepü lümro abinü müngahsehnung müzahng.

¹³ Nührü chah tikehba athsadsü roh-i tsü aparü chahsü tikehre. Ta Tsingrangba-nü abi anyengchocho yohponü nührünü mürangchehnungthsa müthsadsüsohnung; ko nührü thsadsüde nührünü rangchonung ko tsiphunung suhre jünung.

¹⁴ Hütsüeko, jünirüti, kyothri mübüba lanü za lieng.

¹⁵ Ihnü athsehdhsarü te roh-i chore; Ihnü tu yoro hütsü nührübürünü lümdhing.

¹⁶ Abüdongba thsüti shing ko Ihsanü Tsingrangba khyang anengse jüba; hütsü lanü yongde Ihsanü Khrista shüh changtare. Ko Ihsanü chenahba hümdhse: hütsü tsude Ihsanü Khrista fü changtare.

¹⁷ Ihsa adrong thsanye, hümdhse khüdu du, ko afü khüdu du, tunüo Ihsa atümung hümdhse khüdu du changtare.

¹⁸ Israelrü lümdhing; arühnü kangmübücho tsuba tsü Tsingrangba bholu dikehba la changtarü mahrü do?

¹⁹ Khang Ihnü tu yoro? Kyothri khyang mübücho tsuyongba mahkhang kyothri tsü langoepü yorü mah-o?

²⁰ Mah! Ihnü yoba tsü müyudsirü bholu chah tu mübüro hütsü Tsingrangba khyang mah, ta motsing khyang. Ko Ihnü nührü motsing te mütrümtasohnyüre.

²¹ Nührünü Abüdongba shing ko motsing shing lanüsü müyongcheh; nührünü Abüdongba tsingthsang ko motsing tsingthsang chahnü mütsucheh.

²² Mahkhang Ihsanü Abüdongba nahmohsohrü do? Abi tenü Ihsa suh azehba mah-o?

²³ “Apüm tsü athsalang, ta apüm tsü atsa mah.” Apüm tsü athsalang, ta apüm tsü ajingcho mah.

²⁴ Sünüsü abürü tsanung du tüyangchi, ta aparü tsanung yangching.

²⁵ Tu müzongpü aichah iba shuh masü tsung.

²⁶ Tunüo, amüsa yunü yocho roh-i, “Limih ko hütsüla liba lüpcho Abüdongba yo.”

²⁷ Müyudsirü nyüh khüdunü nüh yangtsunung dsikhang ko nühnü wünung dhrongchehkhang, tu tüptinang müzongpü tsung.

²⁸ Ta khürünü nüte, “Hütsü kyothri khyang mübüchoe” pü yokhang, ayoba ko abi nüpu nengdang hütsü tütsu

²⁹ hütsü, nüh mah ta aparü nengdang yore. “Khürünü yonung, Tsale, tuepü I mürucho aparü lümchonü yatijüro?

³⁰ Ihnü I tsuyongnung nengdang Tsingrangba khyang anengse jükhang, tuepü Ihnü nengse jüpü tsucho nengdang müchümükehro?”

³¹ Hütsüeko, nührünü tu nguchinang, tsunye ko yongnye, Tsingrangba hechinung nengdang nguching.

³² Jihudarünye, yangpirünye, mahkhang Tsingrangba Lithronye, sü khyangsü adhsangthsi müjüpü lieng.

³³ Ih kyo nguching; Ihnü Ipu nengdang mülümpü, atümung khümchonung ko tsanung nengdang du lüm, I nguchicho apüm la atümung künyangsohnung müküpre.