1 KORINTRÜ 1 - AMÜSA BAIBEL (BSI)

¹ Paul, Jisu Khrista riwürü thsanung Tsingrangba lümcho la dsiba, ko Ihsa jünirü Sosthenes chahnü.

² Korint la liba Tsingrangba Lithro, amüsa nyitsarü thsanung dsirü atümung, Ihsa ko arüh Abüdongba, apümlang liba Ihsa Abüdongba Jisu Khrista mübürü atümung yanglang.

³ Ihsa Au Tsingrang ko Abüdongba Jisu Khrista chahnü nührü khyang achomang ko atbachi thsaang.

Khrista la Amüwa

⁴ Jisu Khrista khu abinü nührü khyang achomang jüchonü Ihnü nührü nengdang I Tsingrang nengsere.

⁵ Tunüo Khrista la nührü lüpcho la yu choba ko amüdhe mii zeh alirü kangko.

⁶ Ihsa Abüdongba Jisu Khrista mishanung nührünü nahmürah yingde,

⁷ nührü chah Khrista yusi tsü drengdreng rarangpehchonü nührünü amüwa khüdusü mükhyüchopü mühle.

⁸ Ihsa Abüdongba Jisu Khrista Nyümongla nührü amülang mülisohnung shulüm abinü nührü achangchi drengdrengsohnung.

⁹ Tsingrangba sünü apu Tsurü Jisu Khrista, Ihsa Abüdongba te kehtasohnung nührü dsicho, abi tsü longlangchehba lile.

Lithro la Achangnah

¹⁰ Jünirüti, nührü yola achangnah mülipü nyichehta linung shulüm Ihnü nührü atümung te Khrista nengla thsüchire. Alümcho ko nahdhingkeh khüdula nührü kehtaang.

¹¹ Tunüo jünirüti, nührü yola mükehta lilepü Kloi-rü kukhirü chahnü Ite tsidsa yoko.

¹² Nührü müipinü papa yore. Nyüh khüdunü yorü, “Ih Paul mono; Khüdunü yorü, Ih Apollos mono; Khürünü yorü, Ih Peter mono; ko khürünü yorü, Ih Khrista mono.”

¹³ Khrista tsü changnahcho mah-o? Nührü nengdang khala chah süba tsü Paul mah-o? Nührü Paul monoepü bapticho mah-o?

¹⁴ Khrispus ko Gaius nyüh chah khu Ihnü nührü süsü mübaptijücho nengdang Ih künyangre.

¹⁵ Hütsünü I monothsa baptichoepü nührü sünüsü müyocheh.

¹⁶ (Ho, Ihnü Stefanas ko abi kukhirü baptijüko; hütsü chah khu Ihnü aparü baptijücho mülümkeh.)

¹⁷ Baptijüsohnung Khrista-nü Ih mümütheh, ta nyitsarü lümlong chah müngakehpü, Khrista khala chah sücho yuje ngusohnung, ko Yuse Atsa sobhonung abinü Ih müthehcho.

Khrista tsü Tsingrangba Zii ko Lümlong

¹⁸ Tunüo chang tsiyarü nengdang Khrista khala yu tsü amüsithsa, ta Ihsa khümcho lirü nengdang hi Tsingrangba zii.

¹⁹ Amüsa yunü yore: “Amüdherü lümlong tsü Ihnü changjünung ko asithsarü anyichehba tsü khyükhujünung.”

²⁰ Akhang, amüdherü khüde liro? Asithsarü khüde liro? Limih yuthrungrü khüde liro? Tsingrangba-nü hiba limih lümlongrü amüsithsa kangjüko!

²¹ Tunüo nyitsarü abürü lümlongnü Tsingrangba müdhenung mükohsohnung Tsingrangba lümlongnü yatiko. Ta Ihsanü thsingyuba yusi “amüsithsa” pü dsiba khunü sürünü yudsiro arüh khümchonung Tsingrangba-nü dhrongchehcho.

²² Jihudarünü thsayahiya ngunyüre, ko Greek-rünü lümlong yangchire.

²³ Ta Ihsanülü Jihudarü müthikehsohba ko Greek-rü nengdang amüsithsa Khrista hamkehcho yusi sobhore.

²⁴ Ta sürü Tsingrangba-nü dsicho, Jihudarü ko Greek-rü anyüding, hiba Khrista tsü Tsingrangba zii ko lümlong lile.

²⁵ Tunüo Tsingrangba amüsithsa tsü nyitsarü lümlong asithsa tenü asithsau, ko Tsingrangba sumüzeh tsü nyitsarü suh azeh tenü azehba.

²⁶ Jünirüti, Tsingrangba-nü dside tu kyo licho lümdhing. Shutsa lahpinü yoekhang, nührü yola amüdherü, rezeh ko adirü azikyah du licho.

²⁷ Ta Tsingrangba-nü ahsa asithsarü ashah khyüsohnung amüsithsarü ko rezehrü ashah khyüsohnung remüzehrü throchehcho.

²⁸ Limihnü ayingbaeba tsü changjünung nengdang, limihnü mükhimünguba ko müdhingchehba abinü throchehcho.

²⁹ Hütsü khu Tsingrangba jingte sünüsü mümüthsehnung.

³⁰ Ta nührülü Tsingrangba-nü Jisu Khrista te kehtasohko, ko Tsingrangba-nü Khrista tsü Ihsa lümlong kangsohko; Ihsa Tsingrangba amüsa nyitsarü ko nyüje kangsohko.

³¹ Hütsünü, amüsa yunü yocho kyo, “Khürünü müthsehnyükhang Abüdongba la müthsehng.”