1 JOHAN 5 - AMÜSA BAIBEL (BSI)

Liküp chah Ihsa Akohba

¹ Sünü Jisu tsü Mesia-epü yudsiro abi Tsingrangba tsurü lile; ko sünü Au müiro abinü Atsurüsü müire.

² Ihsanü Tsingrangba tsurüti müirepü müdheba tsü: Tsingrangba müiba ko ayuzeng bichicho khunü müdhere.

³ Tunüo Ihsanü Tsingrangba müireba tsü abi yuzeng bichicho du tsü lile. Ko abi yuzengti tsü Ihsa nengdang dee amülinglü mah,

⁴ tunüo Tsingrangba tsurü müipinü limih kohnung kohle. Ko Ihsanü Ihsa yudsi khunü limih chah akoh tsü ngure.

⁵ Sünü limih kohchehnung kohro? Jisu tsü Tsingrangba Tsurüepü sünü yudsiro abi dunü kohchehnung.

Jisu Khrista Nengdang Yuzi

⁶ Jisu Khrista tsü kih ko ashüh la rocho; abi kih la du mah, ta kih ko ashüh la rocho. Ko anbü apu tsü yuzi, tunüo anbü tsü yuje.

⁷ Yuzi asang lile:

⁸ Anbü, Kih ko Ashüh; ko asangdingnü yuzi sako jüre.

⁹ Ihsanü nyitsarü yuzisü yudsire; ta Tsingrangba yuzi tsü alaa amülinguba, ko abinü yuzi hi Atsudhre nengdang jücho.

¹⁰ Hütsünü sünü Tsingrangba Tsurü chah yudsiro abi lasih la hiba yuzi hi lile; ta sünü Tsingrangba chah müyudsiro, abinü abi arahkhehrü kangjüre; tunüo Tsingrangba-nü Atsudhre nengdang tu yocho abinü hütsü yumüdsi.

¹¹ Yuzi tsü hi: Tsingrangba-nü Ihsa khyang müchangkaba akang jüko, ko hiba akang tsü Atsudhre chah lile.

¹² Sü chah Atsudhre tsü liro abi chah akang tsü lile; sü chah Atsudhre tsü müliro abi akang tsü mühle.

Müchangkaba Akang

¹³ Nührü Tsingrangba Tsurü chah yudsirüti, nührü müchangkaba akang lilepü müdhenung nengdang, Ihnü nührü yanglang hi thrahre.

¹⁴ Abinü lümcho la Ihsanü lango chingkhang abinü nyirepü tsüpchonü Tsingrangba jingte Ihsa longlangre.

¹⁵ Khodederü Ihsanü abi te tsingdhingnang abinü Ihsa te nyire; ko hi yuje-epü Ihsanü müdhechonü, Ihsanü abi te tu chingnang abinü jürepü Ihsanü müdhele.

¹⁶ Nü jünirü khüdunü sünung lengnü mahpü amünyi bichi ngukhang, nühnü Tsingrangba sünü abi khyang akang jünung abi te dangkhidangnangjüng. Hiba hi asünung müthsaba amünyi nengdang du lile.Ta asünung amünyi khüdu lile, hütsü nengdang dangkhidangnangjüng pü Ihnü müyore.

¹⁷ Thsamehcho apüm tsü amünyi; ta asünung müthsaba amünyi khüdu lile.

¹⁸ Tsingrangba tsurünülü amünyi mübichirepü Ihsanü müdhele, tunüo Tsingrangba Tsurünü abi khümcho yohpüre, ko münyirünü abi thsakehjünung mükoh.

¹⁹ Limih apüm amünyi yangthsathsaba pohki linye, Ihsalü Tsingrangba yo lilepü Ihsanü müdhele.

²⁰ Tsingrangba Tsurü ronü, Ihsa khyang yuje Tsingrangba müdhenung anyichehba jüchoepü Ihsanü müdhele. Ihsa yuje Tsingrangba chah ko Atsudhre Jisu chah lire. Hiba hi yuje Tsingrang ko müchangkaba akang.

²¹ I tsurüti, arahkheh tsingrangti tenü nührü jangjang za lieng!