1 JOHAN 4 - AMÜSA BAIBEL (BSI)

Yuje Anbü ko Arahkheh Anbü

¹ Amüi jünirüti, Anbü kehlepü yorü atümung chah tüyudsi, ta arüh chah kehba anbü tsü Tsingrangba chahnü rocho Anbü a mahnang müdhenung nengdang arüh thsadsüdhing. Tunüo arahkheh azikehrü limih la khütango chüroko.

² Hinü nührünü Tsingrangba Anbü a mahnang müdhenung: Sünü Jisu Khrista tsü shutsa la rochoepü chechorünang hütsü Tsingrangba chahnü rocho Anbü.

³ Ta sünü Jisu nengdang hiroh-i münyengchorünang Tsingrangba chahnü rocho anbü mah. Hütsüba anbü tsü Khrista rorüh chahnü lile; tunüo ronungepü nührünü yuchiko ko hütsü adelü limih la lile.

⁴ I tsurüti, nührü Tsingrangba yo lile, ko arahkheh azikehrüti nührünü kohko, tunüo limih nyitsarüti chah liba anbü tenü nührü chah liba anbü tsü rezehba lile.

⁵ Arahkheh azikehrü tsünü limih kohro nengdang chore, ko limihnü arüh te nyire tunüo arüh limih yo lile.

⁶ Ta Ihsalü Tsingrangba yo lile. Sünü Tsingrangba müdhero abinü Ihsa te nyire; sü Tsingrangba yo mahro abinü Ihsa te mühnyire. Hi khu Ihsanü arahkheh anbü ko yuje anbü adukah tsü müdhere.

Tsingrangba tsü Amüi

⁷ Amüi jünirüti, Ihsanü khüdunü khüdu te müitanung, tunüo amüi tsü Tsingrangba chahnü rore. Sünü müiro abi Tsingrangba chahnü surocho, ko abinü Tsingrangba müdhele.

⁸ Sünü mümüiro abinü Tsingrangba mümüdhe, tunüo Tsingrangba tsü amüi.

⁹ Ko Tsingrangba-nü atsudhre hiba limih yang müthehcho khu abi amüi Ihsa te ngucho, hütsünü abi khu Ihsa akang ngunung.

¹⁰ Amüi tsü hi: Ihsanü Tsingrangba müicho mah, ta abinü Ihsa müichonü atsudhre Ihsa münyi pehjünung nengdang müthehcho.

¹¹ Amüi jünirüti, Tsingrangba-nü hütsüta Ihsa müichokhang, Ihsasü khüdunü khüdu te müitabae.

¹² Sünüsü Tsingrangba müngudhing, ta Ihsanü khüdunü khüdu te müitakhang, Tsingrangba Ihsa chah lire, ko abi amüi Ihsa chah apisa kangre.

¹³ Ihsa Tsingrangba chah ko abi Ihsa chah lirepü Ihsanü tsüpre, tunüo abinü apu anbü Ihsa khyang jüko.

¹⁴ Ko Aunü limih Kangchehjüba kangnung atsudhre müthehcho, hütsü Ihsanü nguko ko aparü te yuzi jüre.

¹⁵ Nyüh khüdunü Jisu tsü Tsingrangba Tsurüepü yudsinü nyengchokhang, Tsingrangba abi chah lire ko abi Tsingrangba chah lire.

¹⁶ Ko Ihsabürünüsü Ihsa nengdang Tsingrangba amüi tsü müdhere ko yudsire. Tsingrangba tsü amüi, sü amüila liro abi Tsingrangba chah lire ko Tsingrangba abi chah lire.

¹⁷ Yukha Nyümongla Ihsa mixüpsohnung nengdang amüi tsü Ihsa chah apisa kangsohre; ko Ihsanü hütsü ngunung tunüo hiba limih la Ihsa akang tsü Khrista kyo lile.

¹⁸ Amüila adrü mühle, ta apisa amüinü adrü iipehre. Tunüo adrüba tsü akhingchi, ko sünü drüro, abi amüila apisaba mükange.

¹⁹ Tsingrangba-nü akhu Ihsa müichonü Ihsanü abi müire.

²⁰ Khürünü Tsingrangba müirepü yokhang, ta ajünirü thrünyikhang, abi arahkhehrüe. Tunüo abinü nahnü nguba ajünirü mümüikhang, nahnü münguba Tsingrangba abinü mümüicheh.

²¹ Khrista-nü Ihsa khyang yuzeng jüba tsü hi: Sünü Tsingrangba müiro abinü ajünirüsü müibae.