1 JOHAN 3 - AMÜSA BAIBEL (BSI)

Tsingrangba Tsurüti

¹ Dhing Aunü Ihsa khütoh-i müicho! Abi amüi dirachonü Ihsa te Tsingrangba tsurü pü dsire, hütsü roh-i yuje, Ihsa abi tsurüti lile. Hütsünü limihnü Ihsa mümüdhere: tunüo limihnü abi mümüdhe.

² Amüi jünirüti, ade Ihsa Tsingrangba tsurüti lile, ta Ihsa tu kangnungnang ade mütsidsae. Ta khode Khrista ronang Ihsa abi kyo kangnungepü Ihsanü müdhele, tunüo Ihsanü apu tsatsa ngunung.

³ Khrista chah sünü hiba alongdi liro arühnü khüroh-i Khrista amüsa hütsü roh-i apu jangjang müsa yohpüre.

⁴ Sünü amünyi shitpahro abinü Tsingrangba yuzeng thsangnyangre; tunüo amünyi tsü yuzeng thsangnyangba.

⁵ Amünyiti hitsinung Khrista rochoepü nührünü müdhele, ko abi chah amünyi mühle.

⁶ Hütsünü sü Khrista chah liro abinü amünyi mübichire; ta sünü amünyi bichiro abinü abi müngu ko mümüdhe.

⁷ Sünüsü nüh tüthsüyohchüsoh, I tsurüti! Sünü yuje tsü nguchiro abi Khrista kyo müsa lile.

⁸ Sünü amünyi bichiro abi motsing chahnü lile, tunüo adikeh lanü motsingnü amünyi shitpahko. Motsingnü tu nguchicho hütsü changjünung nengdang Tsingrangba Tsurü rocho.

⁹ Sü Tsingrangba tsurü liro abinü amünyi mübichire, tunüo Tsingrangba yangthsa abi chah kehle; ko Tsingrangba tsü Au thsachonü, abinü amünyi mübichire.

¹⁰ Hinü Tsingrangba tsurü ko motsing tsurü adukah tsidsajüre: sünü yuje tsü münguchiro ko ajünirü mümüiro abi Tsingrangba tsurü mah.

Khüdunü Khüdu te Müitaang

¹¹ Adikeh lanü nührünü yuchiba yusi tsü hi: Ihsanü khüdunü khüdu te müitabae.

¹² Ihsa Kain mükyobae; abi motsing chahnü licho ko anikhung Abel müpsehcho. Tuepü Kain-nü abi müpsehcho? Tunüo abinü nguchiba tsü amüthsalang licho; ko aninü nguchiba tsü athsalang licho.

¹³ Hütsüeko jünirüti, limih nyitsarünü nührü thrünyikhang tünyemüyang.

¹⁴ Ihsa asücho lanü akang langi rokopü Ihsanü müdhele; ko Ihsanü Ihsa jünirü müichonüepü Ihsanü müdhele. Sünü mümüiro abi ade yingcheh asüba tase pohki lile.

¹⁵ Sünü ajünirü thrünyiro abi amüpsehrü lile, ko amüpsehrü khüdu chah tsü müchangkaba akang tsü mühlepü nührünü müdhele.

¹⁶ Khrista-nü Ihsa khyang apu akang jüba hinü amüi tsü tunang Ihsanü müdhere. Hütsütakhang, Ihsanüsü Ihsa jünirüti nengdang Ihsa akang jübae!

¹⁷ Alirü khüdunü, jünirü khüdu dhsütah ngupü, ta alasih mülehchehkhang, abinü Tsingrangba müirepü khüta yonung?

¹⁸ I tsurüti, Ihsa amüi tsü yu ko abe dunü mah, ta nguchinü ngusohba yuje amüi thsabae.

Tsingrangba Bete Mithrungmizi

¹⁹ Hinü Ihsa yuje yo lilepü Ihsanü müdhenung; ko hinü Ihsa Tsingrangba jingte longlang kangnung.

²⁰ Ihsa lasihnü Ihsa mülangjükhang, Tsingrangba tsü Ihsa lasih tenü adiubaepü ko abinü lüpcho müdherepü Ihsanü müdhere.

²¹ Hütsüeko, amüi shangrüti, Ihsa lasihnü Ihsa mümülangjükhang, Tsingrangba jingte Ihsa mixüpnung.

²² Ihsanü tuturü chingnang abi chahnü ngure, tunüo Ihsanü abi yuzengti bichire ko abi künyangnungthsa Ihsanü nguchire.

²³ Abinü Ihsa khyang yuzeng jüba tsü Khrista-nü Ihsa khyang yuzengjücho roh-i, Atsurü Jisu Khrista chah yudsinung ko khüdunü khüdu te müitanung nengdang jücho.

²⁴ Sünü Tsingrangba yuzeng bichiro abi Tsingrangba chah lire ko Tsingrangba abi chah lire. Tsingrangba-nü Ihsa khyang jüba Anbü khunü Ihsa chah Tsingrangba lirepü Ihsanü müdhere.