1 JOHAN 2 - AMÜSA BAIBEL (BSI)

Khrista Ihsa Trorü

¹ I tsurüti, nührü amünyi müshitpahsohnung nengdang Ihnü nührü yang hi thrahre; ta khürünü amünyi shitpahkhang, Ihsa phikhüm Au te kihchijürü khürü lile, hütsü amüsaba Jisu Khrista.

² Ko Khrista apu tsü Ihsa münyi mülang pehjübong tsü lile, ko Ihsa münyi du mah, ta atümung mülang pehjürü lile.

³ Ihsanü Tsingrangba yuzeng bichikhang, Ihsanü abi müdhelepü Ihsanü tsüpre.

⁴ Khürünü abi müdhelepü yokhang, ta abi yuzeng mübichikhang, hitari nyitsarü tsü arahkhehrü ko abi chah yuje tsü mühle.

⁵ Ta sünü abi yu bichiro abinü yujeba Tsingrangba müicho dekhing ngusohre. Hinü Ihsa Tsingrangba chah lilepü tsüpre.

⁶ Sünü abi Tsingrangba chah lilepü yoro abinü Jisu Khrista-nü nguchicho kyo nguchibae.

Yuzeng Asi

⁷ Amüi shangrüti, Ihnü nührü yanglang thrahba yuzeng hi asi mah; ta adikehdinü nührünü bichi rochoba yuzeng ahi du tsü lile. Ahiba yuzeng yu tsü nührünü yuchiko.

⁸ Ta ade Ihnü nührü yang thrahba yuzeng hi asi lile, tunüo hütsü yuje tsü Khrista chah ko nührü chahsü nguko. Tunüo ama tsü khu tsile, ko yuje atsingse tsü viyale.

⁹ Sünü abi atsingse la lilepü yoro, ta ajünirü thrünyiro, abi ade yingcheh amala lile.

¹⁰ Sünü ajünirü müiro abi atsingse la lile, ko abi chah amüdekheng tu mühle.

¹¹ Ta sünü ajünirü thrünyiro abi amala lile; abi amala rachire, ko abi khüilang würo hütsü mümüdhe, tunüo ama tsünü abi nahtohsohko.

¹² Ihnü nührü te thrahre, I tsurüti, tunüo Khrista khyanglangnü nührü mülang pehjüko.

¹³ Ihnü nührü te thrahre, auti, tunüo nührünü sü adikehdinü licho abi müdhele. Ihnü nührü te thrahre, dhrezarüti, tunüo nührünü amütsaba tsü kohko.

¹⁴ Ihnü nührü te thrahre, I tsurüti, tunüo nührünü Au müdhele. Ihnü nührü te thrahre, aurüti, tunüo nührünü sü adikehdinü licho abi müdhele. Ihnü nührü te thrahre, dhrezarüti, tunüo nührü rezeh lile; Tsingrangba yu nührü chah lile, ko nührünü amütsaba tsü kohko.

¹⁵ Limih mahkhang hütsüla liba kohro tümüi. Nühnü limih müikhang, Au mümüire.

¹⁶ Limih la liba atümung khüi shutsa mükhyahmürah liro, nyitsarünü tu nguro, ko khyünyüro ko hiba limih la lüpcho khüinü nyitsarü müthsehsohro, hiri tusü Au chahnü müro; hiri apüm limih lanü rore.

¹⁷ Limih ko hütsüla liba khüi nyitsarünü mükhyahro hütsü khu tsire; ta sünü Tsingrangba lümcho nguchiro abi lede lire.

Khrista Rorüh

¹⁸ I tsurüti, achangka tsü amünyethsa lile. Khrista rorüh ronungepü nührü te yoko; ko ade Khrista rorüh khütang chüroko, hütsünü achangka tsü amünyethsa lilepü Ihsanü müdhere.

¹⁹ Hiri nyitsarü tsü yuje Ihsa yola müzehchoe, hütsünü Ihsa arühnü pehtsicho; arüh tsü Ihsa yola zehrelanglü, arühnü Ihsa te liba thsako. Ta arühnü Ihsa pehtsicho, hütsünü arüh süsü Ihsa yola mühzeh pü ngusohre.

²⁰ Ta nührülü Khrista-nü Anbü Amüsa mükhakehjüko, hütsünü nührü atümungnü yuje tsü müdhele.

²¹ Hütsünü Ihnü nührü te thrahba tsü nührünü yuje tsü mütsüpchonü mah, ta nührünü hütsü müdhechonü; ko adesü yuje lanü tu arahkheh müchürorepü nührünü müdhele.

²² Akhang, arahkhehrü tsü süo? Hütsü sünü Jisu tsü Mesia mah pü yoro abi tsü lile. Hitari nyitsarü tsü Khrista rorüh lile, abinü Au ko atsurü anyüding mükhyüchore.

²³ Tunüo sünü atsurü mükhyüchoro abinü Ausü mükhyüchore; sünü atsurü khyüchoro abinü Ausü khyüchore.

²⁴ Hütsütakhang, nührünü adikeh lanü nyisiba yusi tsü nührü lasih la lisohng. Nührü chah hütsüba yusi tsü lisohkhang, lede atsurü ko Au chah nührü linung.

²⁵ Ko hiba müchangkaba akang tsü Khrista apunü Ihsa te nyengchoko.

²⁶ Ihnü hiba hi nührü thsüyohchünung müküprü nengdang thrahre.

²⁷ Ta nührülü, Khrista-nü abi nbü nührü chah mükhakehjüko. Abi nbü nührü chah litashilü, nührü te donung süsü müdhsütah. Tunüo abi nbünü nührü te lüpcho donung, ko abinü nührü te tu donang hütsü yuje. Hütsünü, Anbünü tu docho hütsü bichieng, ko Khrista chah chingkeh lieng.

²⁸ Ho! I tsurüti, abi chah lieng, hütsünü abi ro Nyümong Ihsa müshahpü mithrungmizi linung.

²⁹ Khrista tsü amüsabaepü nührünü müdhele; khang sürünü tu yuje hütsü nguchiro, arüh tsü Tsingrangba tsurüepü nührünü müdhebae.