Yosua 4 - EBBAIBBO EMBOOSI YA NASAAE

Amakina k'esiichuliso koombahwa

¹ Mani esyaalo syoosi nisyali nisimalire ohuhalakania Yorodaani, Omwaami yaboolera Yosua ati,

² “Doola abasaacha ehumi neende babiri, mulala ohutula mu buli nono,

³ mani obalagire ohudoola amakina ehumi neende kabiri ohutula akatikaati wa Yorodaani, ohutula abuundu bweene yi balaamisi beemaanga. Baboolere bakiinge amakina kano bachie nako mani bakate aasi abuundu yimuchia ohuta ekaambi esiro syaleero.”

⁴ Bulaanu Yosua yalaanga abasaacha ehumi neende babiri ba yali n'adoolere,

⁵ yaboola ati, “Muchie mwiingire mu Yorodaani mu moni w'Esanduuku ly'Endagaano y'Omwaami Nasaae weeng'we. Buli mulala hweeng'we, ahoyere ohukiinga ekina lala hu beka, buli litula hulw'enono ya Yisiraeli.

⁶ Amakina kano kachia ohwiichulisaanga abaandu esiindu si Omwaami aholere. Mu biha biicha, abaandu beeng'we nibahabateebeenge amahuluundu k'amakina kano yi muli,

⁷ muba muchia ohubabooleraanga muti, amaachi ka Yorodaani kaakama ohuhulukusa Esanduuku ly'Endagaano y'Omwaami lyahalakania omwaalo kuno. Amakina kano kachia ebiha byoosi ohwiichulisaanga abaandu ba Yisiraeli hu siindu syaholehanira ano.”

⁸ Abasaacha bano baloondakana neende elako lya Yosua elyo. Koti lu Omwaami yali n'alagiire Yosua, babukula amakina ehumi neende kabiri ohutula akatikaati wa Yorodaani, buli lala hulw'enono ndala ya Yisiraeli, baakakiinga baakayira abuundu w'ohwoombahamo ekaambi, bakatuula abweene ao.

⁹ Yosua yesi yoombaha amakina ehumi neende kabiri akatikaati wa Yorodaani, abuundu yi balaamisi bakiingaanga Esanduuku ly'Endagaano beemaanga. (Amakina kano kasisiiri abweene ao ohwoola olwaalero.)

¹⁰ Abalaamisi bano beema sa akatikaati wa Yorodaani ohwoola lu buli siindu si Omwaami yalagira Yosua ohuboolera abaandu ohuhola syeeholehera. Sino sa nisyo si Musa yesi yali niyalagira. Abaandu baalaala muno nibahalakania omwaalo kuno.

¹¹ Mani boosi nibali niboolere hu lu koongo luundi, abalaamisi alala neende Esanduuku ly'Endagaano y'Omwaami bataangisamo mani beemirira abaandu.

¹² Abasaacha b'enono chia Rubbeeni neende Gaadi haandi neende esituundu sy'enono ya Manaase, nibeetekeheere ebiita, bataangirira buli muundu yeesi ohuhalakania, koti lu Musa yali n'ababoolere ohuhola.

¹³ Mani mu hubaao hw'Omwaami, aambi abasaacha elifu amahumi kane (40,000), abali nibamalire ohwetekehera ebiita baambuha baachia boola hu syaalo sikwalaafu esiri aambi neende Yeriko.

¹⁴ Esiindu si Omwaami yahola hu ludaalo olwo, syakera abaandu ba Yisiraeli baabukula Yosua ohuba omusaacha muhunuufu muno. Bamwiisamo oluyaali obulamu bwae bwoosi, koti sa lu bali nibeesa mu Musa.

¹⁵ Mani Omwaami haandi yaboolera Yosua

¹⁶ ohulagira abalaamisi abali nibakiingire Esanduuku ly'Endagaano ohuniina batule mu Yorodaani.

¹⁷ Yosua yahola sa atyo,

¹⁸ mani abalaamisi nibali hu bahoola hu genya ly'omwaalo, omwaalo kwachaaka haandi ohuhulukusa, mani kwaafuuchira aakulu w'amagenya kakwo.

¹⁹ Abaandu baambuha Yorodaani hu ludaalo lw'ehumi olw'omwoosi kutaangira mani baachia boombaha ekaambi mu Giligaali, ebukwe wa Yeriko.

²⁰ Ao niwo yi Yosua yoombaha amakina ehumi neende kabiri kala akatuswa mu Yorodaani.

²¹ Yaboolera abaandu ba Yisiraeli ati, “Mu biha biicha, abaandu beeng'we nibabateeba amahuluundu k'amakina kano,

²² muba munababooleraanga ebidiira hu biha bi Yisiraeli yaambuhiramo Yorodaani hu loba lyoomu lyeene.

²³ Mubabooleraanga muti, Omwaami Nasaae weeng'we yabahamisira amaachi ka Yorodaani ohwoola lu mwali nimumalire ohuhalakaniamo, koti sa lu yatuhamisira Enyaanja Njahanyu.

²⁴ Mani ohweema hu siholwa sino, buli muundu yeesi oli hu syaalo achia ohumanya obuhunuufu bw'amaani k'Omwaami koti bwaaka, mani mwiise oluyaali mu Omwaami Nasaae weeng'we endaalo choosi pe.”