Yosua 3 - EBBAIBBO EMBOOSI YA NASAAE

Abaandu ba Yisiraeli baambuha Yorodaani

¹ Nibwahya echuli, Yosua alala neende abaandu ba Yisiraeli boosi, basiingira echuli muno, baatula mu kaambi yali mu Akasia, mani baachia hu Yorodaani, yiboombaha ekaambi nibaliindire ohukwaambuha.

² Luunyuma lw'endaalo chidatu, abeemirisi bachaaka ohubita mu kaambi

³ nibaboolera abaandu bati, “Nimubonaho sa abalaamisi nibakiingire Esanduuku ly'Endagaano y'Omwaami Nasaae weeng'we, sakuule ekaambi mani muchaake ohubaloondaho.

⁴ Mwali nimutabaaho abuundu ano, mani nibo abachia ohubeekesa engira y'ohuchiiraho. Nae haba simuhoyeere ohusuda aambi neende Esanduuku ly'Endagaano daawe; mubecheenge koti obweyaango bw'ekilomiita ndala enyuma walyo.”

⁵ Yosua yesi yaboolera abaandu ati, “Mweelabye, olwohuba muchuli Omwaami achia ohubaholamo eby'amayia.”

⁶ Mani niyamala atyo yaboolera abalaamisi bulaanu ohubukula Esanduuku ly'Endagaano mani bachaake ohukeenda nalyo nibatangiisemo. Bosi bahola koti lu yali n'aboolere.

⁷ Omwaami yaboolera Yosua ati, “Esiindu siinjia ohuhola enyaanga yino, sichia ohukera abaandu ba Yisiraeli boosi bachaake ohuhwiisamo oluyaali koti omusaacha muhunuufu muno, haandi bachia ohumanyira elalira bati ese hane ndi naawe koti lu ndabeechaanga neende Musa.

⁸ Boolera abalaamisi bakiingire Esanduuku ly'Endagaano abo oti niboola hu mwaalo bweene, bahoyere ohwiingira mani beema mu Yorodaani kweene, aambi neende egenya.”

⁹ Mani Yosua yaboolera abaandu ati, “Mwiiche ano mani mutekeerese bulai bi Omwaami Nasaae weeng'we adaha ohuboola.

¹⁰ Koti lu muchia ohukeenda nimwiingira mu syaalo omwo, achia ohuba nga yesi yeerusamo, Abakanani, Abahiiti, Abahiifi, Abaperisi, Abagirigaasi, Abaamoori, neende Abayebbusi. Ao niwo yi munamanyira muti hane Nasaae mulamu abalimo

¹¹ Esanduuku ly'Endagaano y'Omwaami w'esyaalo syoosi lichia ohwaambuha Yorodaani mu moni weeng'we.

¹² Mani bulaanu doolamo abasaacha ehumi neende babiri, mulala ohutula mu buli nono ya Yisiraeli.

¹³ Mani abalaamisi bakiinga Esanduuku ly'Endagaano y'Omwaami, w'esyaalo syoosi, bachia ohugeeng'a amakulu kaabwe sa bati mu maachi, Yorodaani kuchia ohuleha ohuhulukusa, mani amaachi kehaanga neende omwoombe kachia ohwebbiiba alala.”

¹⁴ Mani sakira, abaandu nibanaba nibatula mu mayeema kaabwe, ohwaambuha hu Yorodaani, neende abalaamisi nibakiingire Esanduuku ly'Endagaano mu moni w'abaandu,

¹⁵ mani abo abachia ohuba nibakiingire Esanduuku ly'Endagaano nibanoola hu Yorodaani, mani amakulu k'abalaamisi bakiingire Esanduuku ly'Endagaano keengiraho sa kati mu maachi, (Yorodaani kwali nikwanala ohwiichulaanga nikuchuhira aakulu w'egenya amaachi, endaalo cheekesa choosi),

¹⁶ amaachi kaakama ohuhulukusa mani kebbiiba alala, ohuchaakira eyale emukulu w'omwoombe mu Adamu, esiko siyikihaane neende Saretaani. Ohuhulukusa hwiisa amaachi mu mwoombe nikeeha ohwoola mu Enyaanja y'Omuunyu hwoosi hwahalihira elalira, mani abaandu baahalakanisira aambi neende Yeriko.

¹⁷ Mani abaandu nibali nibakeenda nibahalakania hu loba lyoomu, abalaamisi bakiingaanga Esanduuku ly'Endagaano y'Omwaami bosi bali nibeemere sa hu loba lyoomu akatikaati wa Yorodaani ohwoolera elalira lu abaandu boosi bahalakania.