Yona 2 - EBBAIBBO EMBOOSI YA NASAAE

Esaala ya Yona

¹ Mani Yona naali mu nda y'okung'eeni yasaba esaala eyiri Omwaami Nasaae wae,

² n'aboola ati, “Ewe Omwaami, nindali mu bidinyu, ndahulirira, mani wambulira; ni ndi aasi emakoombe ndahulirira, mani wawulira ekono lyaange.

³ Olwohuba waasukuna mu lusiba akatikaati w'enyaanja, mani emihula ch'amaachi nichindebodoohania; haandi amafwiinda kao k'amaani nikaambitaho.

⁴ Mani ndeecha ndaboola endi, ‘Njiruswe ohutula mu moni wao; ndahakaluheo endye haandi ohubonaho enyuumba yao enjolerefu?’

⁵ Amaachi kaamira, ndaaba aambi ohwoola emakoombe; amayombayoombe kaandeboyokania hu mutwe.

⁶ Ndeebira aasi ohwoola emakoombe. Ndeeha aasi ndoola yi njiki ch'eloba chanjikalira endaalo choosi; nae ewe wanunula obulamu bwaange ohutula mu liina leeyi, Ewe Omwaami Nasaae waange.

⁷ Nindali aambi ohukwiisa omwooyo, ndeechulisa Omwaami; mani ohusaba esaala hwaange nihwoola yooli, mu nyuumba yao enjoolerefu.

⁸ Abo abeenamira ebiloongaloongwe beetusaho obweyamo bwaabwe bwadyeeri yooli.

⁹ Nae ese, njia ohweemba nindeebasa njia ohuhuwaanira esiyaanwa; esyo syosi-syoosi sindeyama, njia ohuhuberesa. Obuwonia bwoosi bwao, ewe Omwaami!”

¹⁰ Omwaami yalomaloma neende okung'eeni, mani nikusala Yona hu genya.