Yoeli 3 - EBBAIBBO EMBOOSI YA NASAAE

Nasaae aliheengera ebyaalo omusaango

¹ Omwaami aboola ati: “Bone, mu ndaalo echo, haandi mu biha ebyo, njia ohukobosao ehabi cha Buyudaaya neende Yerusalemu.

² Njia ohubuusa alala ebyaalo byoosi mani mbiihirise mu hooho lya Yehosafati, mani nibali eyo, ndahabaheengere omusaango hulw'ebiindu byoosi bi bahola abaandu baange, Abaisiraeli. Olwohuba babasalaania mu byaalo, mani nibakabanamo esyaalo syaange sya Yisiraeli.

³ Boobba eha ohukabanamo abaandu baange. Bakusamo abaandu basyaani, mani omusaara kwatulamo nibakwehoonyera ohukula abahasi bacheke. Haandi nibakusamo abaana bahaana, mani omusaara kwatulamo nibakwehoonyera ohukula amalwa, mani nibakang'wa.

⁴ “Munaahole mutye, eng'we Tiro neende Sidoni, neende ebituundu byoosi ebya Filisitia? Siruwo esiindu si mudaha ohundetuunga? Bulaanu nimudaha ohundetuunga, syesi njia ohwaanguya muno ohubetuunga.

⁵ Olwohuba muyirire efeesa yaange neende esaabbu yaange, haandi mwakiinga obuyiinda bwaange bwoosi mani mwabuyira mu masabo keeng'we.

⁶ Abaandu baange bomu Buyudaaya neende abomu Yerusalemu, mwabatusa mu syaalo syaabwe syeene, mani nimubakusa Abagiriki.

⁷ Mani bulaanu, njia ohubatusayo mu byaalo bi mwabakusamo, mani male mbahole esyo simwabahola.

⁸ Njia ohukusa abaana beeng'we basyaani neende abaana beeng'we bahaana eyiri abaandu bomu Buyudaaya, mani Abayudaaya babakuse abaandu ba Seba, esyaalo sy'eyale muno. Ese Omwaami, Niise oboolere.”

⁹ “Laangirire sino mu byaalo: Mwetekehere ebiita, laange abasaacha b'amaani. Lehe ab'amaye boosi basude aambi, lehe bahuumbe nibeecha.

¹⁰ Embako chaabwe, lehe bachiitaanyemo engaanga, engeso chaabwe, lehe bachiitaanyemo amafumo. Leha kata omuundu mukata aboole ati: Njia ohulwaana.”

¹¹ “Mwaanguyeho mani mwiiche, eng'we ebyaalo byoosi ebyebodoohaanie, mani mwebuusire mu hooho eyo. Ewe Omwaami, siindihayo ab'amaye bao b'amaani.”

¹² Leha abaandu bomu byaalo boosi basiingire, mani beehirire mu hooho lya Yehosafati, olwohuba eyo niyo yiinjia ohwiihala mani heengere ebyaalo biri aambi ao byoosi omusaango.

¹³ Mubakese neende engeso, koti engaano yoolere ohukeswa. Mubahunye, koti abahunya omubisi kw'emisabbiibbu. Esinyuhiro sichuule, mani kwiidihe aasi. Olwohuba ebyonoono byaabwe bibitiirifu nibyo.

¹⁴ Abaandu elifu-elifu, beechuule mu hooho ohuheengerwa omusaango. Olwohuba oludaalo lw'Omwaami ohuheengera omusaango mu hooho luli aambi ohwoola.

¹⁵ Elyuuba neende omwoosi bimaliiye, neende eng'ining'ini chakaame ohwaaduha.

Nasaae yahaberese abaandu bae ehabi

¹⁶ Omwaami abuluulira hu sigulu Siyooni, ekono lyae liwulirihanira mu Yerusalemu, mani ekulu neende esyaalo nibiteengereha. Nae Omwaami niye obweyikamo bw'abaandu bae, esiiro y'Abaisiraeli.

¹⁷ “Ao mani mulimanya muti, Niise Omwaami, Nasaae weeng'we, oli mu Siyooni, olugulu lwaange lwoolerefu. Mani Yerusalemu syahabe esiko syoolerefu, haandi abateende haba sibahasiyiingire ehabi liindi daawe.

¹⁸ “Mani mu ndaalo echo, endalo ch'emisabbiibbu kiribwiiha engulu, haandi eng'oombe chihamwa chiriba hu buli sigulu. Emyaalo kyoosi ekyomu Buyudaaya kyaheechulemo amaachi. Mani esulo ch'amaachi chahasoohe nichitula mu nyuumba y'Omwaami nichichuhirira ehooho lya Akasia.

¹⁹ “Esyaalo sya Misiri syahehole ekuunda, haandi Edomu syahehole esiparara, olwohuba abaandu bomu byaalo ebyo byaseeta Buyudaaya mani beeta abaandu baandi ababulaho omusaango.

²⁰ Nae Buyudaaya neende Yerusalemu, byahabeemo abaandu endaalo choosi pe.

²¹ Njia ohwetuunga amabaanga kaabwe, haandi haba sindahalehe abaliho omusaango, olwohuba Ese Omwaami, njia ohubechaanga hu sigulu Siyooni.”