Yobbu 38 - EBBAIBBO EMBOOSI YA NASAAE

Omwaami akobola mu Yobbu

¹ Omwaami naali mu sifuusye yakobola mu Yobbu n'aboola ati:

² “Wuno niye wiina owikalira endekeha yaange ohumanyihana naalomaloma ebitaalimo amakesi?

³ Mani weboye olusibiro weeme koti omusaacha, mani wungobolemo esiteebo syaange.

⁴ “Ewe wali yeena ese ninoonga esyaalo? Mboolere, nooba noomanyire.

⁵ Wiina mweene owaheengao ati sinaake sitye omanyire obwadyeeri? Oba wiina owasipiima neende omukoye?

⁶ Emisiingi chasyo, cheema hu siina, oba wiina owafumita ekina lyomu soonda,

⁷ esulwe nicheembera alala koti abaandu, mani ebiloonge byomu kulu nibiyaasa hulw'esaangaalo?

⁸ “Oba wiina owataao emilyaango ohwiikalira enyaanja, lu yaadiha koti eyitula mu nda w'esyaalo;

⁹ nindahola ebireesi ohubwiiha enyaanja, mani ndayiboya neende ebireesi bimali,

¹⁰ haandi ndayiteerao olwaaho yi yaakama, mani ndayitaaho ebidiiri neende enjiki.

¹¹ Mani ndaboola endi, ‘Yakamaanga ano, ataali ohwemeeda ohusudaho, haandi ano niyo yi mafwiinda kao k'amaani kanaayenjeerereenge’?

¹² “Ohutula niwiibulwa, walagiraho obwiire oti buhye, haandi wakeraho amabwiibwi kaamanya ebiha byako,

¹³ hu bulafu bwako bunyale ohudiira esyaalo syoosi, mani bwiiruse abonooni bahaye ohweekisa?

¹⁴ Esideete sikera engulu neende ehooho byaaboneha, mani esyaalo syaahanya syaaba koti engubo yeehunyire-hunyire.

¹⁵ Abala mbi haba si badaha obulafu bw'esideete, olwohuba bubakaira ohuhola ebiindu bileeta emitowaano.

¹⁶ “Waali woolaho ebusiba yi nyaanja yisoohera, oba waali wakeenderaho hu lwaalo ly'enyaanja?

¹⁷ Aliwo owali niyahweekesaho enjiki ch'emakoombe, oba waali niwabonaho enjiki chiingira mu siirima eyiri abafu?

¹⁸ Omanyireho koti lu butakalafu bw'esyaalo bwaaka? Ngobolemo, nooba noomanyire bino byoosi.

¹⁹ “Engira yiicha yi bulafu bwamenya yiri yeena, nae esiirima situla yeena,

²⁰ mani hu onyale ohusiyira abuundu wasyo haandi onyale ohusiheengerao engira yi sibitiraho nisichia yi syamenya?

²¹ Omanyire olwohuba wali niwamala ohwiibulwa ebiha ebyo, haandi emyaaka kyao ky'obuhuluundu kyali emiingi!

²² “Wali weengiraho mu nyuumba chi babiihamo omunyiti, oba mu nyuumba chi babiihamo amakina k'efula,

²³ bitekehera ebiha bidinyu, oludaalo lw'ohulwaana neende olw'amaye?

²⁴ Ngira siina eyoola abuundu yi bulafu bukabuhaniramo, oba yi muyaka kutula ebukwe kusalaanira hu syaalo?

²⁵ “Wiina owatema muukulu emilongooti chi fula yibitamo niyikwa, haandi yeekula engira yeehubba?

²⁶ Wiina okwiisaanga efula mu bituundu bi baandu batamenyamo, efula yaakwa mu siparara, abuundu ataali neende omuundu kata mulala;

²⁷ ohuchuhiirisa esyaalo syooma haandi esyalehwa ao, mani yasihola syameramo obunyaasi?

²⁸ “Obaasa oti efula yiri laata yao, oba wiina oweebula amatoonde k'olume?

²⁹ Muhasi siina oweebula omunyiti, haandi wiina oweebula amakina k'efula?

³⁰ Amaachi kooma kaaba koti ekina, haandi aakulu w'enyaanja yaadiirana.

³¹ Onyala ohuboya eminyororo cha Pileyade, oba ohuboolola emikoye kya Orioni?

³² Onyala ohweekesa Masarooti ebiha byaachio, oba onyala ohwaaya enani liri neende abaana?

³³ Omanyire amalako katuka aakulu mu miyaka? Onyala ohukeehoonyera ohutuka esyaalo?

³⁴ “Onyala ohulagira ebireesi, mani omuhula kw'amaachi kwahubwiiha?

³⁵ Onyala ohulagira olumesu, mani lwaamyeesuha, mani lwaheecha yooli lwaaboola luti, ‘Mbano ndi ano’?

³⁶ Wiina owaberesa ebireesi amakesi, haandi yaaberesa enang'oong'o ohumanya?

³⁷ Wiina onyala ohwehoonyera amakesi mani yaabala ebireesi? Oba wiina onyala ohudengaania ebireesi by'efula mani byeedisa amaachi,

³⁸ olufu nilweehola edosi, mani edosi lyooma lyaadiirana alala?

³⁹ “Onyala ohuyiimira edalang'i esolo y'ohulya, oba yaaberesa edalang'i njere ebyohulya bichiikusa,

⁴⁰ nicheekisa mu ng'uungu chiachio, oba nicheeyalisa mu sichaha nichiliinda ohukwa hu bisolo eby'ohulya?

⁴¹ Wiina oberesaanga amayoni ebyohulya, obumwiinyi bwako nibuchwiilira Nasaae, mani bwakeendaana nibukoonya ebyohulya?