Yobbu 31 - EBBAIBBO EMBOOSI YA NASAAE

¹ “Ndahola endagaano neende emoni chaange; ohutatingaalaho hu muhasi otaali owaange neende obwekoombi.

² Omukabo kwaange ohutula aakulu eyiri Nasaae kwahabeere siina? Neende obusiha bwaange ohutula eyiri ow'Obunyala bwoosi?

³ Ebidinyu haba sibichiraanga abaandu bataali abaluungifu, mani esaando yikwiira abonooni?

⁴ Nasaae amanyire buli siindu si hola, haandi abona yi ngeendera.

⁵ “Niimba ndakeendera mu bulamu butaali obwadyeeri, oba amakulu kaange kaanjira mu bubacha;

⁶ (Leha ngererwe hu sikero syadyeeri, haandi leha Nasaae amanye ati mbulaho omusaango!)

⁷ niimba nindatula hu ngira ndai, mani omwooyo kwaange kwaabachiriswa neende ebiindu bi ndabona, mani yabaa hoo ekoondo lyaanda hu mahono kaange;

⁸ mani leha ese ndaake, nae abaandi balye; leha ebyohulya bi ndaakire biiywe haandi bisukunwe.

⁹ “Niwiichuhana omwooyo kwaange kwekoombaho omuhasi w'omuundu wuundi, mani ndeboondeerera omuhasi chana oyo nindeekisire amulyango w'enyuumba yae;

¹⁰ leha omuhasi waange asyeere haandi afukire omusaacha wuundi obusuma, haandi leha omusaacha wuundi yesi akone nae.

¹¹ Olwohuba sino siba esyonoono sihoyera ohufwa; haandi okwo kuba omusaango kuleetwa eyiri abakayi b'emisaango.

¹² Olwohuba kuba omuliro kusihirisa ohwoola hu Abbudoni, mani kwaasaamba buli siindu si ndi nasyo.

¹³ “Niimba ndahaya ohuwulira omuhalaabani waange musaacha oba omuhasi, nibeecha ohundekanyiirisira;

¹⁴ mani ndahahole siina Nasaae naasiingira? Niyahandeebe, ndahamukobolemo siina syeene?

¹⁵ Nasaae wanoonga yaanda mu nda, haba siniye oyo owamuloonga? Haba siniye omweene oyo owatuloonga mu nda?

¹⁶ “Teemaho omumanani esiindu syoosi si yekoomba ohutula yi ndi, oba ndeetaho esuubi ly'omuhasi mufwiirwe,

¹⁷ oba kata ndeemaho abaana bafwiirwe ebyohulya.

¹⁸ Ohutula mubuyere bwaange ndabahusaanga koti laata yaabwe, haandi ohutula ninjibulwa, ndabahoonyaanga.

¹⁹ Nindabonaanga omuundu ofwa esyekeenye, oba omumanani obula esy'ohwebwiiha;

²⁰ ndamuberesaanga engubo ch'obwooya bwatulaanga hu makoondi k'omusidwooli syaange. Mani yaafumia neende omwooyo kwae kwoosi.

²¹ Taabaaho omulyaanga hu mwaana mufwiirwe, olwohuba ndamanyaanga endi abakayi b'emisaango bachia ohuhoonya;

²² sakira leha oluliho lwaakuhe lukwe ohutula hu mabeka kaange, haandi leha omuhono kwaange kufunihire mu nyiingo yakwo.

²³ Olwohuba ndatichaanga endi Nasaae achia ohusaandya, mani haba sindahanyalire ohuhola esiindu siri sityo.

²⁴ “Niimba ndahola esaabbu esuubi lyaange, oba ndalaanga esaabbu ndai endi niiwe obweesikwa bwaange;

²⁵ niimba ndasaangaala olwohuba obuyiinda bwaange bwali obuungi, oba olwohuba omuhono kwaange kwali nikunyoolere ebiindu biingi;

²⁶ niimba nindatingaala hu lyuuba nilyaaduha, oba omwoosi nikung'enaang'ena,

²⁷ mani omwooyo kwaange kwekoomba mu bweekisi, haandi ndaachunjuuna esyaaba syaange;

²⁸ sino syoosi syahabeere esyonoono sy'ohufwa si baheengi b'emisaango baheenga, olwohuba mba ndebachirisa eyiri Nasaae oli aakulu.

²⁹ “Niimba nindaasaangaalire mu husihiriswa hw'omusuku waange, oba ndeniinia naakwiire mu sidinyu;

³⁰ (Haba sindafukiirira omunwa kwaange kwaahola esyonoono nimuchuba yaafwa);

³¹ liina lu bahalaabani bomu daala lyaange bateeba bati, ‘Wiina oteekuute enyama yi Yobbu akabuule?’

³² (Walukeenda haba siyeyalisaanga mu ngira chomu siko; ndaakaniraanga bawalukeenda mu daala lyaange);

³³ haba siingisaanga ebyonoono byaange, koti lu baandu bakisa ebyonoono byaabwe mu mwooyo,

³⁴ olwohuba esidiiyiha sy'abaandu syandiisa, sakira ndabuleera mani ndaahaya ohutula erwaanyi

³⁵ Eee, aba naaliwo omuundu wumbulira! (Kuno nikwo omuhono kwaange! leha ow'Obunyala bwoosi yangobolemo!) Eee, omuhono kuno kuba nikwandiikwa neende omusuku waange!

³⁶ Mubwadyeeri ndahakukingiire hu mabeka kaange; ndahakwebandiihire hu mutwe koti ekofia y'obutuki;

³⁷ ndahaboleere Nasaae buli siindu; si ndahamusudireho ataali ohutya esiindu syoosi.

³⁸ “Niimba nindeeba eloba li nima, mani ndaalitusa hu beeneelyo beene;

³⁹ niimba nindalya ebyaamo byalyo nitaatuungire, mani ndaakera abeenelyo baafwa;

⁴⁰ leha amawa kamere mu ndalo yaange mu bweyaango bw'engaano, haandi oluyoongo mu bweyaango bw'amabere masuungu.” Emboosi cha Yobbu chaakamiire ao.