Yobbu 3 - EBBAIBBO EMBOOSI YA NASAAE

Yobbu yeekanyiirisira Nasaae

¹ Bino nibyawa, Yobbu yachaaka ohulomaloma mani n'abwaaba oludaalo lu yebulirwaho.

² Yobbu yaboola ati:

³ “Leha oludaalo lundeebulirwaho lusihirire, neende esiro si babooleramo bati, ‘Omwaana musyaani ayererwe mu nda.’

⁴ Leha oludaalo olwo lube olw'esiirima! Leha Nasaae oli aakulu atatwiichulisa, oba obulafu bwalukwaaho.

⁵ Leha lube olw'obumali neende esiirima sya titititi. Leha enang'oong'o lilubeeho; leha esiirima sy'esideete silutiise.

⁶ Esiro esyo, leha esiirima sidiirane silubeeho! leha oludaalo olwo luhaye ohubalirwa mu ndaalo ch'omwaaka, leha luhaye ohuba lulala hu ndaalo ch'omwoosi.

⁷ Eee, leha esiro esyo sibe esikuumba; leha abaandu bahaye ohuhusisaangaaliramo.

⁸ Leha abaandu babwaaba oludaalo olwo basibwaabe, abo abamanyire ohusiingisa Okuyuha.

⁹ Leha eng'ining'ini chomu mabwiibwi chihayeenge ohwaaduha hu ludaalo olwo; leha obulafu bu lwekoomba, buhaye ohulwoolaho, noomba lubonaho echuli.

¹⁰ Olwohuba, oludaalo olwo haba silweekalira maama engira ch'ohwiibula, oba lwaangayira ohubona ebidinyu.

¹¹ “Lwasiina sindafwiirao hu bahanjibula sa bati, ndaatula mu nda mani ndaafwa?

¹² Lwasiina ndeehala hu makulu baandera? Haandi embeere ch'ohunuuna chabaao mani ndaanuuna?

¹³ Olwohuba, bino biba nibyabulao, mba ndafwa mani ndaawuleera; mba ndeeyalisa; mani ndaawuluuhira,

¹⁴ alala neende abatuki neende abeemirisi bohu syaalo abeyoombahira buyaaha amadooho.

¹⁵ Oba neende abaana b'abatuki abali neende esaabbu, abeechusa enyuumba chaabwe efeesa.

¹⁶ Oba lwasiina haba sibanjibula koti esituluucho, koti abaana beebulwa nibafwiire mani bahaya ohubonaho elyuuba?

¹⁷ Eyomu ng'ani, abonooni baakama ohwonoona, haandi eyo, abajoong'u bawuluuhirayo.

¹⁸ Eyo, ababoye bakwiisaho omwooyo; mani baahaya ohuwulira ohuyibuuha hw'abanyaapara baabwe.

¹⁹ Abayere neende abahuluundu bali eyo, haandi abawaambe haba sibatukwa neende abaami baabwe.

²⁰ “Lwasiina abaandu bali mu bidinyu baba neende obulafu, haandi neende abasaanda baaba abalamu,

²¹ abo abekoomba ohufwa, nae sihwoola, mani bahukoonya ohuhiraho abakoonya amakina k'engaanga;

²² abasangaala muno, haandi beehoya, nibanyoola owohusiihwa?

²³ Lwasiina obulafu buhosa omuundu yakiswa, oyo yi Nasaae yasitiraho olukaka?

²⁴ Olwohuba ohunyaahana hwaange hwiicha koti omugaati, mani ohwekanyiirisa hwaange haba sihwaakama.

²⁵ Olwohuba esiindu si ndatya nisyo esiinjichireho, haandi esyo si ndesiinduhiraanga muno nisyo esingwiireho.

²⁶ Ese haba simbuluuhaho, oba ndaabuleera; haba si ndi neende omuleembe; ohutusaho ebidinyu bitawa byoong'ene nibyo ebiingwaaho.”