Yobbu 27 - EBBAIBBO EMBOOSI YA NASAAE

Yobbu

¹ Yobbu yemeeda neende ohukaniaaya hwae, n'aboola ati:

² “Ndeechubire mu moni wa Nasaae mulamu, oyo owandusaho ebiindu bilai, haandi Omunyala w'ebiindu byoosi, okerere omwooyo kwaange kwaahaya ohuba neende omuleembe;

³ nisisiiri omulamu, haandi nisiyeera omuuya ku Nasaae yamberesa;

⁴ emboosi y'obubacha haba siyicha ohutulaho mu munwa kwaange, haandi olulimi lwaange haba silucha ohulomalomaho eby'obubacha.

⁵ Ese haba siinyala ohuboola endi muli abadyeeri; haandi nisisiiri ohufwa siinja ohuleha obulai bwaange.

⁶ Nyomiirira hu buluungifu bwaange, haandi haba siinja ohubuleha; mu bulamu bwaange bwoosi sibulao esiindu si mwooyo kwaange kuunjolobya.

⁷ “Leha omusuku waange abe koti omuhola-mbi, haandi leha oyo owunyiingania abe koti omuundu otaali omuluungifu.

⁸ Olwohuba esuubi ly'omuundu otatya Nasaae liri yeena Nasaae naamulaanga, Nasaae naamalao obulamu bwae?

⁹ Mubaasa muti Nasaae achia ohuwulira amaliro kae, obudiinyu nibumukwaaho?

¹⁰ Mani achia ohusaangaalira mu w'Obunyala bwoosi? Achia ohulaama Nasaae endaalo choosi?

¹¹ Njia ohubeekesa ebidiira hu muhono kwa Nasaae; lehe haye ohubakisa ebiri neende ow'Obunyala bwoosi.

¹² Bone, eng'we mwesi-mweesi mwamala ohweboneraho abeene; lwasiina haandi mweholere koti abataamanyireho elalira?

¹³ “Kuno nikwo omukabo kwa Nasaae eyiri omuhola-mbi, neende obusiha bu muundu osaandya abaasye anyoola ohutula eyiri ow'Obunyala bwoosi.

¹⁴ Abaana bae nibeengiya, beengiyira olugaanga; haandi abeechuhulu bae haba sibacha ohuba neende ebyohulya bibamala.

¹⁵ Abo abahawone bachia ohufwa oluumbe, haandi abahasi baabwe bafwiirwe haba sibacha ohulira abafu baabwe.

¹⁶ Kata yahabuusa ebituuli b'efeesa byaaba koti olufu, haandi yahung'aania engubo chaaba koti eloba;

¹⁷ anyala ohuchihung'aania, nae abaandu balai nibo abachia ohuchefwaala, haandi ababula omusaango nibo abachia ohukabana efeesa.

¹⁸ Enyuumba yi yoombaha yiri koti ey'olububi, yiri koti esikaali si muliindi w'endalo ahola.

¹⁹ Achia ohweyalisa naali omuyiinda, nae saacha ohukobolamo ohuba atyo haandi; asimuha mani yaanyoola obuyiinda bwae nibubweereo.

²⁰ Ebitiisa bimukwaaho koti amaachi k'omuhula; esifuusye simudumuula syaamumalao esiro.

²¹ Omuyaka kutula ebukwe kumudumuula aakulu mani kamumalao; kumweeya kwaamutusa mu bwiihalo bwae.

²² Nasaae amufuumula ataali ohusaasira hwoosi; nibateema ohwiiruha nibeewonia.

²³ Omuhono kwa Nasaae kumudiira kwamwomiisa, mani yaayulira Nasaae naali mu bwiihalo bwae.