Yobbu 14 - EBBAIBBO EMBOOSI YA NASAAE

¹ “Omuundu yeesi oweebulwa neende omuhasi abeechaangao omulamu endaalo ndiidi sa, haandi echeechulamo esaando.

² Abaao koti esimuli, mani yaahooha; yahamao koti esiiniha, mani yaahaya ohwemeeda ohubaao omulamu.

³ Ewe Nasaae, lwaasiina onyaahana nae mani haandi waamuleeta mu moni wao ohumuheengera omusaango?

⁴ Wiina mweene onyala ohutusa esiindu syoolerefu mu siindu sitali esyoolerefu? Abulao kata mulala.

⁵ Koti lu ndaalo chi muundu ali neende ohuyiindira chamala ohuheengwao, haandi obuungi bw'emyoosi kyae kiri naawe, haandi wamuteerao olwaaho lwaatahanyala ohuhalakania.

⁶ Mani n'oleha ohumutingaalaho, mani waahaya ohumudeebaho, hu anyale ohuba neende esangaalo mu bulamu bwae, koti omuhalaabani mupaangise.

⁷ “Olwohuba omusaala kwosi kuba neende esuubi, kata neende kwahaba nikutemerwe kwaakwa aasi, esaga linyala lyaakulohaho haandi, mani esisina syakwo syaahaya ohufwa.

⁸ Kata neende emisi kyakwo kyahakofulirira mu loba, mani esichihi syakwo syafwiira mu loba,

⁹ nae nikuchuhiiriswa hooho sa kuti amaachi madiidi, kumalaanga kulohaho amasaga mani kuba koti omusaala mudoto.

¹⁰ Nae omuundu afwa, mani yaasiihwa; omuundu yakwiisa omwooyo, haandi bahamunyoola yeena?

¹¹ Koti enyaanja yahahama, haandi omwaalo kwaakama ohuhulukusa amaachi mani kwoomerera,

¹² nilwo lu muundu afwa mani yaahaya ohusiingira haandi; ohwoola lu kulu lyahaweeo haba saacha ohusimuha kata nabudiidi, oba yasiingiswa ohutula mu ndoolo chae.

¹³ Ewe, oba niwaangisa emakoombe, mani wangisula ohwoola lu tiima lyao lyahakwiire, mani wambiimira ebiha, haandi wanjichulisa!

¹⁴ Nae omuundu naafwa, mani haandi anyala ohubaao omulamu? Nae endaalo ch'ohuhalaabana chaange choosi, ese ndaahesimiirise, ohwoola lu huboololwa hwaange hwahoolere.

¹⁵ Ewe wahanaange, mani ndaahukobolamo; wahasaangaalire ese omulimo kw'amahono kao.

¹⁶ Olwohuba, ao niwo yiwahamanyire engeenda yaange, waahaya ohutingaalaanga hu bibi byaange.

¹⁷ Wahandeheremo ebyonoono byaange mani waabitusao, haandi waabyosao.

¹⁸ “Nae engulu chikwa mani chaanyoonyoboha, haandi olwaanda lwatusibwa abuundu walwo;

¹⁹ amaachi kasoomba amakina; emihula kyaahulukusa nikimala eloba hu syaalo; nilwo lwosihirisa esuubi ly'omuundu.

²⁰ Wiicha waamuhira amaani, mani yaakotao; mani yakaluuhania efwaani yae, waamutusao.

²¹ Abaana bae banyoola oluyaali n'atamanyire; haandi beeswa aasi n'atabona.

²² Awulira obuchuuni bw'omubiri kwae kwoong'ene, mani yelirira omweene.”